Кыдзи и быд во, ноябрь помын вӧчисны «Войвыв кодзув» журналӧн, Коми Республикаса гижысь котырӧн да национальнӧй политика министерствоӧн йӧзӧдан «Эзысь борд» конкурслы кывкӧртӧд. Конкурсӧ пырӧдчысьясӧс да сэні вермысьясӧс та пӧрйӧ шоныда вочаа—лісны—чолӧмалісны Питирим Сорокин нима госуниверситетлӧн Камернӧй залын.
Казьтыштам, «Эзысь борд» конкурссӧ йӧзӧдлӧны 2006 восянь коми кыв видзӧм—сӧвмӧдӧм да «Войвыв кодзув» журналӧ выль авторъясӧс гижны ышӧдӧм могысь. Уджъяссӧ донъялӧны «Проза», «Поэзия», «Драматургия», «Публицистика» да «Вуджӧдӧм» нимпасъясын.
«Проза» юкӧнын вермысьӧн таво лоис Алексей Мишарин «Из вылӧ из» романӧн, «Публицистика» номинацияын пасйисны Диана Холоповаӧс коми литературалы подув пуктысьяслысь творчество нимӧдӧмысь да Алексей Поповӧс «Мый сэні, чукыль саяс?» туй выв пасйӧдъясысь. «Поэзия» юкӧнын вермӧм шедӧдіс Нина Обрезкова «Кывбуръясын ӧзйӧ сись» кывбур чукӧрысь. «Вуджӧдӧм» нимпасын медвылӧ донъялісны Евгений Козловӧн Олег Павловлысь, Нина Ягодинцевалысь да Валентина Ерофеева-Тверскаялысь кывбуръяс вуджӧдан удж. «Драматургия» юкӧнын вермысьӧс таво эз индыны.
Кыдзи пасйисны конкурссӧ котыртысьяс, воысь-во сьӧкыд бӧрйыны вермысьӧс «Поэзия» нимпасын, комиӧн мича кывбур гижысьыс уна да. А со таво медся сьӧкыд вӧлӧма индыны медся-медсяӧс «Вуджӧдӧм» юкӧнын, «Войвыв кодзулын» зэв уна вуджӧдӧм йӧзӧдӧмаӧсь да.
Таво тшӧтш медводдзаысь на нимӧдісны «Видза, «Войвыв кодзув»!» конкурс-фестивальӧ пырӧдчысьясӧс. Сійӧс нуӧдісны Сыктывкарса госуниверситетын велӧдысь Елена Остаповалӧн водзмӧстчӧмӧн гижысьясӧс да лыддьысьысьясӧс журнал да ӧта-мӧд дораныс матыстӧм могысь. Орд-йысьӧмын кужӧмлун-сямсӧ петкӧдлісны республика пасьталаысь том и олӧма войтыр: лыддисны «Войвыв кодзулын» йӧзӧдлӧм кывбур-висьт, публицистика да пьеса. Конкурссӧ йӧзӧдысьяс весиг абу чайтӧмаӧсь, мый окотитысьыс та мында лоӧ, да ёна ковмӧма бӧрйыны медся-медсяяссӧ. Гран-присӧ ордйысьӧмын шуисны сетны Помӧсдінысь Валентина Соколюклы Нёбдінса Витторлысь «Тутуруту Семӧ» лыддьӧмысь.
Гажсӧ сигӧртігӧн «Войвыв кодзув» журналса главнӧй редактор Алексей Полугрудов сьӧлӧмсяньыс аттьӧаліс конкурс-ордйысьӧмӧ пырӧдчысьясӧс да, дерт, и найӧс нуӧдӧмын водзмӧстчысь-отсасьысьясӧс. Мед пӧ и водзӧ ӧтувъя уджыс оз кус да сӧвмас-нималас чужан коми кывным.