Республикаса юралысьлӧн Общественнӧй приёмнӧйын «веськыд йитӧда» телефон пыр сёрни нуӧдігӧн Коми Республикаын судса приставъяслӧн федеральнӧй служба управлениеӧн веськӧдлысьлысь уджмог вӧчысь Алексей Поминов висьталіс бать-мамтӧм челядьӧс патераӧн могмӧдӧм йылысь.
Сыктывкарысь ӧти нывлӧн, кыдз ачыс юӧртіс телефон пыр звӧнитчигас, став колана документыс приставъяс ордын нин. Кор пӧ вичмӧдасны патерасӧ да позьӧ-ӧ сы пыдди босьтны сьӧм?
—Оланпас серти та вылӧ сетсьӧ кык тӧлысь, но тадзсӧ овлӧ зэв шоча, ёна дырджык лоӧ виччысьны ола-нінсӧ, — висьталіс Алексей Юрьевич. — Бур, администрациялӧн кӧ эм нин дась патера либӧ сы вылӧ бюджетас урчитӧма сьӧм. Но бать-мамтӧм челядьӧс патераӧн могмӧдӧмыс, овлӧ, кыссьӧ воясӧн. Ӧд та вылӧ сьӧмыс вичмӧдсьӧ федеральнӧй, республикаса да кар-районса «розя» сьӧмкудъясысь. Но татшӧм челядьлӧн арлыд вылӧ видзӧдтӧг, тайӧ сідз шусяна исполнительнӧй производствоыс оз помась сэтчӧдз, кытчӧдз оз вичмӧдны патерасӧ. Та могысь позьӧ приставъяс отсӧгӧн регистрируйтчыны ӧтуввезйын «личнӧй кабинетын» и аслыд видзӧдны, кыдзи пӧртсьӧ олӧмӧ судлӧн шуӧмыс.
Алексей Поминов висьталіс и патера пыдди сьӧм босьтӧм йылысь. Та могысь пӧ колӧ шыӧдчыны ёрдӧ, сӧмын сэн вермасны мыйкӧ вежны.
Сэк жӧ Алексей Юрьевич ӧлӧдӧ таысь. Россияса лунвыв регионъясын пӧ тадзсӧ ёна дурӧны. Бать-мамтӧм челядь патера пыдди босьтӧны сьӧм, а сэсся йӧзӧс бӧбйӧдлысьяс найӧс ылӧдлӧны, да ныв-зон кольӧны и патератӧг, и сьӧмтӧг.
Тавося октябрь кежлӧ республикаын вӧлӧма бать-мамтӧм 2.117 челядь, кодъяс государствосянь виччысьӧны оланін. На пиысь 1.467-ыслы тырӧма нин 18 арӧс. Патера вылӧ списокас пыртӧны 14-23 арӧсаясӧс.
2017 воын Комиын патера вичмӧдӧмаӧсь тыр арлыда 296 сирӧталы. Та вылӧ видзӧмаӧсь 225,6 миллион шайт, сы лыдысь 61,4 миллионсӧ вичмӧдӧма федеральнӧй бюджет.
Мӧйму патера сетӧмаӧсь 193 морт-лы, ставсӧ 218,6 миллион шайт дон, сы лыдын 58,3 миллионыс — федеральнӧй кудйысь.
Таво та могысь урчитӧмаӧсь 372,9 миллион шайт, федеральнӧй отсӧгыс — 58,7 миллион. 147 ныв-зонлы сетӧмаӧсь нин оланін. Во помӧдзыс тайӧ лыдпасыс содас 165-ӧдз.
Медым Комиын бать-мамтӧм став челядьыслы вичмӧдны патера, колӧ кык миллиардысь унджык шайт. 2020-2022 воясӧ урчитӧма вичмӧдны патерасӧ 900 ныв-зонлы.
Николай Размыслов.