Комиын «Единая Россия» ютырлӧн Общественнӧй приёмнӧйын вӧчӧмаӧсь тавося ноябрь 25 — декабрь 1 лунъясӧ «Личнӧй приём» нуӧдан вежонлы кывкӧртӧд. Кыдз тыдовтчис, республикаын олысьяскӧд син на син аддзысьлӧм могысь восьтылӧмаӧсь содтӧд 139 площадка. Йӧзсянь воӧма 552 шыӧдчӧм. Ютырӧ пырысьяс дорӧ аслас тӧжд-могӧн волӧма 264 морт.
Налӧн юалӧмъяс вылӧ вочави-дзӧмаӧсь РФ-са Федерация Сӧветын Комисянь сенаторъяс, Госдумаысь да регионса парламентысь депутатъяс, министръяс, учреждение-организацияясӧн веськӧдлысьяс. Муниципалитетъясысь йӧзкӧд тайӧ уджас водзмӧстчӧмаӧсь Инта, Емдін, Чилимдін, Кулӧмдін, Сыктывдін, Княжпогост да Мылдін районъяс.
Комиын Д.А.Медведевлӧн Общественнӧй приёмнӧйӧн веськӧдлысь Надежда Дорофеева дорӧ аслас тӧжд-могӧн шыӧдчылӧма Максаковкаысь Мальцевъяслӧн уна челядя гозъя. Найӧ элясьӧмаӧсь, мый коммунальщикъяс омӧля пелькӧдӧны-весалӧны лымйысь налӧн посёлокын Мирнӧй, Арся да Гожся уличаяс.
Кыдз тыдовтчӧма, Максаковкаас лым весалан техниканас кызвыннас сӧмын шӧр уличаяссӧ пелькӧдӧны. Туй овмӧссянь кӧсйысьӧмаӧсь босьтны посёлокас олысьяс пӧвстысь содтӧд уджалысьӧс.
«Личнӧй приём» дырйиыс жӧ том гозъя корӧмаӧсь югзьӧдны улича, кӧні кыпалӧны выль олан керкаяс. Талун пӧ сэні олӧ вит семья, и бать-мам майшасьӧны челядь вӧснаыс, кодъяс локтӧны школасьыс рытнас, кор ывлаыс пемыд нин.
Посёлокса администрацияӧн веськӧдлысьяс серти, таво вель уна сьӧм видзӧмаӧсь Ыджыд улича да Яг-кар микрорайон югзьӧдӧм вылӧ. Во помӧдзыс кӧ пӧ кольыштас бюджетын сьӧмыс, ньӧбасны Мирнӧй улича югзьӧдны 15 светильник.
«Единороссъяс» вӧзйӧмаӧсь выль керкаясӧ овмӧдчысьяслы тшӧтш пырӧдчыны «Йӧзкостса бюджет» проектӧ. Та могысь пӧ став колана документ-кабаласӧ дасьтыны отсаласны «том гвардеечьяс».
Надежда Дорофеевалӧн висьталӧм серти, та пӧрйӧ республикаын олысьяс кызвыннас шыӧдчылӧмаӧсь жилищно-коммунальнӧй овмӧсын мытшӧд-падмӧг венӧм, социальнӧй услугаяс босьтӧм да удж вылӧ инасьӧм кузя. Этшаджык вӧлӧма пенсия арталӧм йылысь юалӧмыс. Кар-районын олысьяслы пӧ абу веськодь и, кыдз збыльмӧдсьӧны национальнӧй проектъяс.
Ӧткымын юалӧм вылӧ вочакывсӧ сетӧмаӧсь йӧзкӧд аддзысьлӧм дырйиыс, сэк жӧ пӧ вель уна шыӧдчӧм кузя мытшӧд-падмӧгсӧ ковмас венны-бырӧдны ведомствоясысь чина йӧзкӧд ӧтув видлалӧмӧн.
Надежда Дорофеева аттьӧалӧма ставнысӧ, кодъяс аддзысьлӧмаӧсь кар-районын олысьяскӧд «Личнӧй приём» дырйиыс да кодъяслӧн быдлунъя уджыс йитчӧма йӧзлы отсӧг сетӧмкӧд. Сылӧн висьталӧм серти, регионъясын Д.А.Медведевлӧн Общественнӧй приёмнӧйясын регыд нин босьтчасны йӧзкӧд выльнога уджӧ. Налы позяс шыӧдчыны асланыс тӧжд-могӧн да юалӧмъясӧн ӧтуввез пыр, а приёмнӧяс волігӧн тӧдмавны, кыдзи збыльмӧдсьӧны национальнӧй проектъяс да водзӧ вылӧ мый лӧсьӧдчӧ вӧчны «Единая Россия» ютыр йӧзлысь олӧмсӧ бурмӧдӧм могысь.
Снимокыс ӧтуввезйысь.