Кодкӧ кӧ чайтӧ, мый нинӧмын оз везит, олӧмыс гудыр, сылы колӧ тӧдмасьны Эжваысь Дмитрий Осиповкӧд. Мужичӧй шуӧ, мый ставыс ас киын. Сӧмын колӧ эскыны аслад вынӧ.
Кӧдзыд вой
Дмитрийлы 40 арӧс. 2015 воын сійӧ кынталӧма чуньяссӧ. Казьтыліс, ӧти войӧн пӧ дзоньвидзаысь лои вермытӧмӧн.
–Ме эг вӧв юысь, но, рӧкыд вылӧ, буретш курыд зелля помысь и вошті чуньясӧс. Вӧлі февраль. Вежон шӧр. Ёртъяскӧд сур юыштім. Найӧ кольччисны гортас, асывсяньыс удж вылӧ вӧлі колӧ да, а ме мӧд тӧдсакӧд войся клубӧ ветлі. Сэні вывтіджык лои даръясьӧма. Мӧдӧдчи гортӧ, а палялі… больничаын. Войнас прамӧя кӧдздӧдӧма вӧлӧм да. Тайӧ вой бӧрас курыд юантортӧ вомӧ войт эг на босьтлы, – висьтасис ас йывсьыс Дмитрий Николаевич.
Вежон куйлӧма Эжваса больничаын. Бурдӧдысьяс туялӧмаӧсь дзоньвидзалунсӧ, ёна-ӧ кынмалӧма да мый позьӧ вӧчны, мед кисӧ кольны. И кывкӧрталӧмаӧсь: вундыны.
Татшӧм юӧрыс, дерт, нӧшкӧн вачкӧм кодь лоӧма. Рӧдвужыс ставныс майшасьӧмаӧсь. Тьӧтыс вӧзйӧма мунны бурдӧдчыны Санкт-Петербургӧ. Дмитрийлӧн мамыс став чӧжӧм сьӧмсӧ видзӧма, мед сӧмын пиыслӧн киыс кольӧ. Эжваса бурдӧдысьяс шуӧмаӧсь, весьшӧрӧ пӧ надейтчӧ, и Питерын вундасны.
Вермытӧм, а «качайтчӧ»
Век жӧ Дмитрий шыӧдчӧма Санкт-Петербургса больничаӧ. Сэтчӧс врачьяс шуӧмаӧсь, дзик пыр кӧ пӧ локтін, лечитім, а ӧні чуньястӧг колян.
–Ме пыр жӧ босьті ачымӧс, кыдз шуласны, киӧ. Ӧд оз дзоньнас ки лапаӧс вундыны, а чуньясӧс сӧмын, – водзӧ казьтылӧ Дмитрий. – Первойсӧ, дерт, ёна сьӧкыд вӧлі. Кизясьны ог вермы, ботинки кӧв кӧртавны ог вермы, пинь весавны ог вермы… Мам вӧлі кӧмӧдӧ-пасьтӧдӧ. А меным сэтшӧм яндзим сы водзын. Юрӧй кӧ вӧлі кык, эськӧ ӧтиыс уси. Да и йӧзсьыс яндыси, рӧмдӧм бӧрас вӧлі улич вылӧ петала, мед сӧмын некод менӧ оз аддзыв. Но ме аслым кыв сеті, мый олӧмысь ог лэдзчысь. Мый лоӧма – лои, но, мися, колӧ водзӧ овны.
Вӧляникысь велӧдчӧма кӧмасьны-пасьтасьны, телефонӧн, компьютерӧн вӧдитчыны. Сэсся ӧтуввезйысь аддзӧма важ тӧдсасӧ. Сёрнитӧмаӧсь «ВКонтактеын», да тӧдсаыс корӧма Дмитрийӧс тренажёр залӧ. Нинӧм пӧ гортад пукавны: чуньыд кӧ абу, выныд эм.
Водзті Дмитрий штангатӧ абу лэптавлӧма. Шуис, мый абу кажитчылӧма залын «качайтчыны». Сьӧлӧм сертиыс вӧлӧма футбол да баскетбол, котралӧм. А та пӧрйӧ мӧвпыштӧма видлыны. Ӧні нёль во нин вир-яйсӧ песӧ тренажёръясӧн. И таысь оз вештысь. Залсӧ кутысьыс вӧзйӧма, лоан пӧ миянлы реклама пыдди: вермытӧм, а «качайтчӧ».
Спорт. Удж. Муса ань
–Бур, мый спортас пырӧдчи. Сэсся и удж куті корсьны. Думайта, мися, сьӧкыдтор кӧ лэптала, и уджавны верма. Да и 2017 воын меным вӧчисны мӧд операция: пев вужсӧ торйӧдісны. Сы бӧрын ёна кокньыд лои, мыйсюрӧ кватитны верма. Ручкаӧн гижны велӧдчи, ӧні серпасасьны босьтчи. Кӧть эськӧ дзоньвидза дырйи эг рисуйтчыв.
–А уджыд кокньыда сюри? – юася Дмитрий Николаевичлысь.
–Эз, дерт. Менам первой рабочӧй группа, да нӧшта на и сьӧкыд категория лыдӧ пыра. Чуньтӧм ӧд. Кӧть и вуз помалі: Сыктывкарса вӧр институт. Доймавтӧдз Сыктывкарса ЛПК-ын зіли, «Снегурочка» вӧчанінын.
Шыӧдчи занятосьт шӧринӧ, мися, кӧсъя уджавны. Корсисны меным уджсӧ куим во, некодлы, тыдалӧ, вӧлі ог шогмы. Кольӧм во сӧмын медалісны стӧрӧжавны. Кӧзяиныс звӧнитіс да корис видзны ассьыс овмӧссӧ. Сылӧн вӧлӧма кутшӧмкӧ производство, вӧрӧн ноксьылӧма, но мыйкӧ абу ладмӧма. И меным коліс Зеленеч сайын сылысь эмбурсӧ видзны, мед оз гусявлыны.
Но уджалі сы дорын сӧмын нёль тӧлысь…
–А мыйла?
–Сьӧмсӧ оз вӧлі мынты. Чайті, мися, бӧбйӧдлӧ, да муні. Но сэсся уджйӧзсӧ вежон мысти вештіс. Бара шыӧдчи занятосьт шӧринӧ. Неважӧн на и уджыс сюри. Ӧні гортысь петавтӧг зіля, госзакупкаясӧн нокся. Уджӧн могмӧдысьыс ньӧбис меным компьютер, пызан да гортӧдз вайис. Менам мог тендерӧн ноксьыны: корсьыся, сёрнитча. Шуам, «тэрыб отсӧг» сетан станцияса уджалысьяслы номйысь резсян судзӧді…
Кыдзи висьталіс Дмитрий Осипов, сійӧ и ассьыс шудсӧ аддзӧма. Кор спортас пырӧдчӧма, ӧтуввезйын тӧдмасьӧма анькӧд. Первой сёрнитӧмаӧсь ӧттор-мӧдтор йылысь «ВКонтактеын». Медсясӧ пӧ, дерт, спорт йылысь. Сэсся аньыс вӧзйӧма аддзысьлыны. Дмитрий и шуӧма, медводз пӧ ас йылысь ӧти гусятор восьта, а сэсся тыдовтчас, колям ёртъясӧн али ог.
–Мися, ме чуньтӧм. А Оксана эз эскы. Сӧран пӧ. Да, мися, збыль. Кӧть и ӧтуввезйын йӧзӧдлі ассьым фотоясӧс, сэтысь абу казялӧма. Сэсся снимайті киӧс да ысті. Но и мед пӧ татшӧм кӧ. Ӧні ми шудаӧсь, – нимкодясьӧ мужичӧй.
Гӧри да пуктыси…
Дмитрийлӧн кывъяс серти, аньлӧн эм ныв. Первойсӧ сійӧ чушнитчӧма, мыйла мужичӧй олӧ накӧд, а гортас нинӧм оз вӧч. Сэсся Дмитрий вӧзйӧма патераас пелькӧдчан уджсӧ ас вылас босьтны.
–Пылесосита, тасьті-пань да ӧшинь мыськала, – висьталӧ Дмитрий.
–А кӧрт тув кӧ ковмас тувъявны либӧ кран письтас? – юася сылысь.
–Миянкӧд тесьт на олӧ, мужичӧй уджсӧ сійӧ бергӧдӧ. Дерт, вын сертиыс кӧ. А ӧд кран письтӧм йывсьыд эг на и мӧвпыштлы… Но менам эм кык протез: ӧтиыс – «рабочӧй», мӧдыс – «активнӧй». Воддзаас эмӧсь сідз шусяна насадкаяс: мӧлӧт, пурт, отвёртка, ножич… А мӧдыс чуньяса.
Но ме протезъяснас зэв гежӧда вӧдитча. Быттьӧ ог и надейтчы на вылӧ. Мыйта тырмӧ киын выныс, ставсӧ вӧча. Таво мам ньӧбӧма ки помысь вӧдитан культиватор да, став йӧрсӧ гӧри да пуктыси. Сідзкӧ, абу на дзик вермытӧм.
Екатерина МАКАРОВА.
Снимокъясыс Дмитрий Осиповлӧн «ВКонтактеын» лист бокысь.