А Джульеттаыс – мужик!

Сыктывкарын петкӧдчис Москваысь «Театр Луны». Виктор Савин нима драмтеатрын артистъяс ворсісны «Ромео и Джульетта #алхимиялюбви».

Шекспир серти тайӧ постановкаыс зэв аслыспӧлӧс. Режиссёрыс Лилия Абаджиева трагедияас пыртӧма серамбанаторъяс, гротеск да клоунада. Шекспирлӧн сонетъясыскӧд юргӧны Поль Элюарлӧн кывбуръяс да Сёрен Кьеркегорлӧн философияыс.

Медшӧр аслыспӧлӧслуныс сыын, мый став рольсӧ ворсісны мужичӧйяс, кыдзи и Шекспир кадся «Глобус» театрын. Джульеттаӧс ворсіс Семён Литвинов, Ромеоӧс – Артур Сопельник.

Спектакльын сідзжӧ ворсӧны Дмитрий Воронин (Джульетталӧн няня), Артём Крестников (синьор Капулетти), Дмитрий Беседа (синьора Капулетти), Андрей Гаркунов (Парис) да Денис Рыжов (Тибальт).

Пӧжалуй, унаӧн, кор кылісны, мый постановкаын аньясӧс ворсӧны мужичӧйяс, дивитісны таысь. Но «Театр Луныысь» артистъяслӧн татшӧм петкӧдчӧмысь некодлы эз вӧв зывӧк, некутшӧм «пошлость» эз вӧв да.

Постановкаыс куслытӧм радейтчӧм йылысь. Дерт, коліс петкӧдлыны Ромео да Джульетта костын ыпъялысь муслунсӧ. Но кыдзи? И заводитісны кӧ классика пьесаын окасьны кык мужичӧй… Но режиссёрыс «ныла-зонма» костын мусукасьӧмсӧ петкӧдлӧма ёна вежавидзӧмӧн, мичаа, и видзӧдысьлӧн сэтшӧм-татшӧм сьӧлӧмкылӧмъяс оз чужны.

Пасъям, премьера бӧрын Лилия Абаджиева ӧти интервьюын шулӧма: «Чайта, видзӧдысьыс первойсяньыс вунӧдас, мый ворсысьясыс мужичӧйяс. Да кутас видзӧдны-донъявны актёръяслысь сямлунсӧ…». Сідзи и лои. Артистъяс збыльысь зэв енбиаӧсь!

Болгарияса режиссёр Лилия Абаджиеваӧс унаысь нин пасйылӧмаӧсь быдсикас премияӧн. Сійӧ ёна радейтӧ роч классика. Но медся ёна сылы сьӧлӧм вылас воӧ Шекспир, кодлӧн гижӧдъяс серти дасьтылӧма уна аслыспӧлӧс постановка.

Шекспирлӧн трагедияыс быд кӧленалы воӧ сьӧлӧм вылас.

–Ми ставӧн коркӧ да коркӧ кылам «Ромео да Джульетталысь синдромсӧ». Кор тэ том, став сьӧлӧмнад радейтан, мустӧмтан… А тайӧ постановкаыс буретш ён сьӧлӧмкылӧмъяс йылысь. И дасьтыны тайӧ спектакльсӧ – интереснӧй удж, – висьталіс Ромеоӧс ворсысь Артур Сопельник.

–Тайӧ спектакльыс налы, кодъяс «вошӧмаӧсь» олӧмас. Чайта, татысь позьӧ аддзыны уна вочакыв. Содтӧд на и зэв мича постановка! – содтіс Джульеттаӧс ворсысь Семён Литвинов.

Спектакльын эм куим серамбана эпизод. Тайӧ «Ромео и Джульетта» йылысь современниксянь висьталӧм. Артистъяс быттьӧ петалӧны классика образсьыс да гӧгӧрвоӧдӧны видзӧдысьыслы пьесалысь сюрӧссӧ. Но та пӧрйӧ татшӧм петкӧдчӧмыс абу ковтӧм. Видзӧдысь сьӧлӧмсяньыс сералӧ. А сідзсӧ актёръяс ворсӧны ассьыныс геройяссӧ сэкся эпоха паськӧмӧн да налӧн куӧ пырӧмӧн.

Колӧ пасйыны хореографиясӧ да музыкасӧ, кодъяс ӧзтӧны видзӧдысьяслысь ловсӧ. Йӧктӧм да «вуджӧрӧн ворсӧм» содтӧны джуджыд философия смысл, быд геройлысь сьӧлӧмкылӧмсӧ, мӧвпсӧ, майшасьӧмсӧ… А кор сцена вылын збыльысь зэрмӧ, сьӧлӧмыд ыркмунлӧ, тӧкӧтьӧ морӧс кудсьыд чеччыштас…

Зэв ыджыд аттьӧ Москваса артистъяслы енбиа петкӧдчӧмысь!

Екатерина МАКАРОВА.

А Джульеттаыс – мужик!

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх