Раиса Сметанина нима лызьӧн котралан республикаса комплексын муніс «Сыктывкарса лыжня» ставроссияса ордйысьӧм, кодӧс урчитӧма нуӧдны войтыркостса FIS календарын.
«Сыктывкарса лыжня» вылӧ таво воліс Россияса 41 регионысь да Белоруссияысь 450 спортсмен.
Ноябрь 30 лунӧ старт вылӧ петалісны 160 нывбаба да 250 мужичӧй. Воддзаясыс котӧртісны сідз шусяна свободнӧй стильӧн 10, а мӧдъясыс — 15 километр.
Нывбабаяс пиысь медся тэрыбӧн вӧлі Москвасянь да Приморье крайсянь котралысь Елизавета Шалабода. Гортса трассаыс отсаліс и Комиысь лыжникъяслы.
Ордйысьны петаліс республикаысь 21 спортсменка. Ксения Ванеева шедӧдіс эзысь медаль, а Виктория Мелина — бронза. Кыкнанныс сӧмын на воӧмаӧсь «Хибинская гонка» ставроссияса ордйысьӧм вылысь, а матысса лунъясӧ нин шутёвтасны Коми Республикаса сборнӧйкӧд Россияса Кубок вылӧ.
—Талун лызьлы бур мавтасыс эз и ковмы, сы вӧсна мый котӧртім «конькиӧн». Ёнджыка ковмис уджавны киӧн. Дерт, вермисны опытаджык да вынаджык спортсменъяс. Трассасӧ лӧсьӧдӧмаӧсь бура, кӧть эськӧ кӧнсюрӧ неуна «джӧмдалім», сы вӧсна мый уліас вӧлі чорыдджык ас вӧчӧм, а сы вылын — енэжсяньыс усьӧм небыд лым, — висьталіс Виктория Мелина.
Мужичӧйяс пиысь «Сыктывкарса лыжня» лоис шудаӧн республикаса сборнӧйысь Евгений Уляшевлы. Сійӧ котӧртіс дистанциясӧ 35,18 минутӧн да шедӧдіс зарни медаль.
Мӧдӧн воис Мордовияысь Александр Кулешов. Коймӧдӧн лоис Москваысь Илья Трегубов.
«Сыктывкарса лыжня» вылӧ воліс и Улыс Новгород обласьтысь лызьӧн нималана котралысь Пётр Седов, войтыркост класса спортса мастер, юниоръяс пӧвстын мирса витысь чемпион, Ванкуверын Олимпиада дырйи Россияса сборнӧйысь лыжник.
Кольӧм во Комиысь сійӧ нуис «зарни», а таво финиш дорӧ воис дас ӧтиӧдӧн.
Декабрь 1 лунӧ сборнӧй командаяс дасьтан республикаса спорт шӧринын водзӧ муніс «Сыктывкарса лыжня» ордйысьӧм.
Та пӧрйӧ 160 нывбаба да 238 мужичӧй котӧртісны «классикаӧн».
Вит километр медӧдйӧ котӧртіс Виктория Мелина да воддза «бронза» дорас содтіс «зарни».
Эзысь медаль шедӧдіс Комиысь Ольга Рочева. Финиш дорӧ найӧ воисны, позьӧ шуны, ӧттшӧтш. Ӧтиыслӧн кадыс 15,58.3, а мӧдыслӧн — 15,58.4 минут. Воддза зарни медаль дорас содтіс бронза Елизавета Шалабода.
Дас километр кузьта трасса вылын Комиысь мужичӧйяс эз веськавны призёръяс лыдӧ.
Медӧдйӧ котӧртіс Мордовияысь Александр Кулешов (воддза лунас сійӧ шедӧдіс эзысь медаль).
Мӧд да коймӧд места вичмис Удмуртияысь Александр Ившинлы да Тюмень обласьтысь Николай Мориловлы.
Декабрь 7-11 лунъясӧ нин Раиса Сметанина нима лызьӧн котралан республикаса комплексын нин ставроссияса ордйысьӧмъяс дырйи мӧдасны котравны 17-18 арӧса ныв-зон.