Декабрь 10 лунӧ Коми Республикаса юралысь Сергей Гапликов воліс Княжпогост районса Емва карын регионса военнӧй комиссариатлӧн сборнӧй пунктӧ.
Армияӧ призывникъясӧс мӧдӧдӧм кузя уджыс миян республикаын мунӧ план серти. Муниципалитетъясын призывнӧй комиссияясӧ урчитӧм кадӧ локтӧма квайт сюрс гӧгӧр морт. Емваса сборнӧй пунктсянь военнӧй служба вылӧ ыстӧма нин 1.300 зонмӧс, на лыдысь 1.100-сӧ – Россия Федерацияса оборона министерстволӧн воинскӧй часьтъясӧ. Нёльсёыс веськалӧмаӧсь Войвыв флотӧ, а сё комыныс – Национальнӧй гвардияӧ.
Армияӧ мунӧмаӧсь нин и «Коми Республикаса медбур призывник-2019» регионса том йӧзлӧн конкурсӧ пырӧдчысь 15 зон. Налӧн кӧсйӧм да позянлун серти ӧкмыс мортӧс мӧдӧдӧмаӧсь Военно-морскӧй флотӧ (на пиысь квайтсӧ – Войвыв флотӧ). Конкурсын вермысь Алексей Смирновӧс да нӧшта кык том мортӧс босьтӧмаӧсь сухопутнӧй войскалӧн спецназ бригадаӧ. Кыкӧн мӧдасны служитны Воздушно-космическӧй войскаын, нӧшта ӧти – Россия Федерацияса оборона министерстволӧн велӧдан шӧринын.
Емваса сборнӧй пунктын аскиа военнослужащӧйясӧс нӧшта ӧтчыдысь видлалӧны врачьяс да психологъяс. Специалистъяс видзӧдӧны, кодлӧн эм нин профессия да кытчӧ бурджык сійӧс ыстыны. Тані жӧ зонъясӧс пасьтӧдӧны лӧсялана войскалӧн военнӧй формаӧ, а сідз шусяна гражданскӧй кӧм-паськӧмсӧ найӧ мынтысьтӧг ыстӧны пӧсылкаӧн гортас. Аскиа салдатъясӧс луннас куимысь вердӧны пӧсь сёянӧн, петкӧдлӧны налы концертъяс, кинофильмъяс. Призывникъяскӧд аддзысьлыны волывлӧны ветеранъяс.
Регионса юралысьлӧн волігӧн 26 том морт дасьӧсь нин вӧлі мунны служитны Национальнӧй гвардиялӧн воинскӧй часьтъясӧ. Найӧс колльӧдігӧн Сергей Гапликов сиис призывникъяслы лючки служитны.
–Дона призывникъяс, тіян олӧмын ӧні зэв кывкутана кад. Тіян пиысь ӧтияс мӧдасны служитны Росгвардияын, мӧдъяс – Войвыв флотын, кодъясӧскӧ ыстӧмаӧсь нин спецназӧ. Эска, кӧть кытчӧ ті веськаланныд, мӧданныд кывкутӧмӧн да бура видзны-дорйыны чужан мунымӧс. Эн вунӧдӧй, мый ті – Войвылын олысьяс, кодъяс пыр служитлісны зэв бура. Сиа ставныдлы бӧр воны гортаныд ловйӧн, дзоньвидзаӧн, зумыд лолӧн, аддзыны выль ёртъясӧс, лоны Россиянымӧс збыльысь дорйысьӧн. Ме гӧрдитча тіянӧн. Муӧдз копыр бать-мамныдлы. Бура служитӧй, – сиис том йӧзлы Сергей Гапликов.
Юралысь сідзжӧ видзӧдліс, кыдзи призывникъяс олӧны сборнӧй пунктын, сёрнитіс накӧд, кодъясӧс матысса лунъясӧ ыстасны жӧ армияӧ.