Сосногорскысь «Единая Россия» ютырлӧн юкӧнӧ пырысьяс да общественнӧй котыръясын зільысьяс донъялӧмаӧсь, кыдзи тайӧ карас збыльмӧдсьӧ «Единая страна — доступная среда» федеральнӧй партпроект. Торйӧн кӧ, видзӧдлӧмаӧсь, эм-ӧ позянлуныс вермытӧм йӧзлы пыравлыны аптекаясӧ.
—Талун миян странаын дас куим миллионысь унджык морт — инвалид. Жаль, но быдлунъя олӧмас налӧн зэв уна мытшӧд-падмӧгыс. Сідз, вермытӧм йӧзлы, кодъяс ветлӧны инвалид коляскаӧн, сьӧкыд пыравны лавкаӧ, аптекаӧ, социальнӧй да уна мукӧд учреждениеӧ, — висьталіс такӧд йитӧдын «Единая Россия» ютырлӧн Сосногорскса юкӧнысь исполнительнӧй секретарь Надежда Бочкова.
Кольӧм вежонӧ «единороссъяс» да общественникъяс кытшовтӧмаӧсь Сосногорскын карлысь кӧрт туй юкӧнсӧ, видзӧдлӧмаӧсь сэтчӧс аптекаяссӧ, сы лыдын и, эмӧсь-ӧ пыранінас лючки пандусъяс, Брайль шрифта гижӧда табличкаяс, звӧнитчан кнопкаяс да сигнализаторъяс.
—Кыдзи и водзтіджык Воркутаын татшӧм рейд дырйи, тані казялім жӧ тырмытӧмторъяссӧ. Шуам, вермытӧмъяслы некытчӧ кутчысьны кильчӧ вылӧ кайигӧн да бӧр лэччигӧн, кӧнсюрӧ ӧдзӧс порогъясыс коланасьыс джу-джыдджыкӧсь да с.в., — юӧртіс ставроссияса инвалидъяслӧн обществоысь Сосногорск карса котырӧн веськӧдлысь Валентина Матракова.
Казьтыштам, таво ноябрь заводитчигӧн Войвыв кытшсайса карас общественникъяс волӧмаӧсь дас ӧкмыс аптекаӧ, и тыдовтчӧма, мый сӧмын кыкас коляскаӧн ветлысь инвалидъяслӧн эм позянлун воӧдчыны медикаментсӧ вузалан прилавок дорӧдзыс.
Кызвын татшӧм учреждениеас эськӧ пандуссӧ вӧчӧмӧсь лючки, но аптека ӧдзӧсъясыс колана 90 сантиметрсьыс векньыдджыкӧсь да, колясканад пырны он вермы.
Снимокыс ӧтуввезйысь.