Республикаса юралысь Сергей Гапликов аттьӧаліс Коми Госсӧветысь депутатъясӧс регионлӧн бюджет йылысь оланпас дасьтан ӧтувъя уджын зільӧмысь.
Государственнӧй Сӧветӧн веськӧдлысь Надежда Дорофеевакӧд да сійӧс первой вежысь Александр Макаренкокӧд уджмогъяс кузя аддзысьлігӧн Сергей Гапликов тӧдчӧдіс, мый исполнительнӧй власьт тэчасӧн веськӧдлысьяс и водзӧ кутасны видлавны республикаын олысьяслы тӧдчана став могсӧ да юалӧмсӧ парламентарийяскӧд ӧтув.
Казьтыштам, ноябрь 28 лунӧ Госсӧветлӧн чукӧртчылӧм дырйи вӧлі вынсьӧдӧма 2020-ӧд, а сідзжӧ 2021-ӧд да 2022-ӧд вояс кежлӧ Коми Республикалӧн бюджет йылысь оланпас.
Тайӧ закон сертиыс, локтан воӧ сьӧмкудйын чӧжӧсыс лоас 86 миллиард шайт, а рӧскодсӧ артыштӧма 93,4 миллиард. Тӧдчымӧн унджык сьӧм шуӧма видзны регионын йӧзлысь олӧм бурмӧдӧм могысь. Медвойдӧр шуӧма босьтны тӧд вылӧ со-циальнӧй юкӧн, национальнӧй проектъяс да туйяс.
Республикаса юралысь сідзжӧ пасйис, мый национальнӧй проектъяс збыльмӧдӧмын парламентлӧн пайыс зэв тӧдчана, да вӧзйис депутатъяслы ёнджыка пырӧдчыны такӧд йитӧдын уджӧ.
—Сергей Анатольевич, ми уджъёртъяскӧд босьтчим нин видлавны тіянлысь вӧзйӧмнытӧ, — висьталіс Александр Макаренко. — Ми гӧгӧрвоам, мый миянсянь колӧ оз сӧмын сідз шусяна контроль. Депутатъяслӧн могыс — тӧдмӧдны кар-районын, асланыс бӧрйысян кытшъясын олысьясӧс национальнӧй проектъяснас, тшӧтш и уна-ӧ сьӧм торйӧдӧма найӧс збыльмӧдӧм вылӧ, мед йӧзыс тӧдісны, кӧні мый шуӧма вӧчны, да кутісны тайӧс син уланыс. И матысса кадӧ нин юӧртам, кыдзи Госсӧветысь депутатъяс кутасны пырӧдчыны нацпроектъяс олӧмӧ пӧртӧм ку-зя йӧзкӧд уджӧ.
Снимокыс ӧтуввезйысь.