Кывбуртӧ лыддьыны колӧ кужны

Ті радейтанныд кывбуръяс? А кужанныд найӧс юрсьыныд мичаа лыддьыны? А уна йӧз водзын петкӧдчыны смелмӧдчанныд? Верстьӧ пӧвстысь, чайта, гежӧд коді кӧсйысяс петны уна йӧз водзӧ кывбур лыддьӧмӧн. А со быдмысь войтыр оз на повны нинӧмысь, быд во окотапырысь пырӧдчылӧны кывбур лыддьысьяслӧн республикаса конкурсӧ.

Таво тайӧ аслыспӧлӧс ордйысьӧмсӧ сиисны Иван Куратовлӧн, Николай Фроловлӧн, Фёдор Щербаковлӧн да Владимир Поповлӧн чужӧмсянь тшупӧда пасъяслы. Конкурсӧ пырӧдчисны Коми Республикаса, Ненеч да Ямал-Ненеч кытшъясса школаясысь ныв-зон. Заочнӧя, юркарӧ волытӧг да видеогижӧд ыстӧмӧн, вын-сямсӧ петкӧдлісны 137-ӧн. А ноябрь 20 лунӧ Коми Республикаса войтырлӧн Ёртасян керкаӧ локтысьяс вермисны ас синмӧн аддзывны да ас пельӧн кывзыны томуловлысь петкӧдчӧмсӧ.

Кыдзи пасйис ордйысьӧмсӧ восьтігӧн регионса велӧдан юкӧн сӧвмӧдан институтӧн веськӧдлысь Галина Китайгородская, кывбур лыддьысьяс пӧвстын татшӧм конкурссӧ котыртлӧны Россияса сӧмын 3 республика-обласьтын. Миян регионын сэтчӧ пырӧдчысьыс век зэв уна. Шуам, очнӧй тшупӧдын петкӧдчисны 12 кар-районысь 31 ныв-зон.

Колӧ пасйыны, быдӧн зілис лыддьыны бӧрйӧм кывбурсӧ аслыснога: кодкӧ вӧлі синмӧ шыбитчана пасьтасьӧма-вӧччӧма, кодкӧ быдса видеофильм дасьтӧма, кодкӧ ворсіс басняса геройясӧс, кодлыкӧ шылада инструментӧн ворсӧмӧн отсалісны, а кодкӧ и сьылышталіс кадысь кадӧ.

Ӧти кывйӧн, жюрилы вӧлі сьӧкыд бӧрйыны медся медсяяссӧ. Но кывкӧртӧдсӧ век жӧ ковмис вӧчны. Сідз, 5-7 классын велӧдчысьяс пӧвстын та пӧрйӧ вермысьясӧн лоисны Сыктывдінса Выльгортысь Милена Шлопова (очнӧя) да Интаысь Александра Вокуева. 8-9 классаясысь медводдза местаяс вичмисны искусствояс гимназияын тӧдӧмлун босьтысь Элина Шлоповалы (очнӧя) да Кӧрткерӧс районса Керӧсысь Светлана Ветошкиналы. 10-11 классаяс пӧвстын медбура петкӧдчисны искусствояс гимназияысь Эвилина Филиппова (очнӧя) да Изьваса Кыдзкарысь Антон Терентьев.

Миян корр.

Кывбуртӧ лыддьыны колӧ кужны

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх