Геннадий Поповкӧд творческӧй аддзысьлӧм котыртлісны неважӧн Одыбын. Геннадий Иванович и кывбуръяс тэчӧ, и сьыланкывъяс гижӧ, и висьтмойд лӧсьӧдалӧ. Газетъясын йӧзӧдӧ войнаса участникъяс, тылын уджалысьяс, Кӧрткерӧс районса бур йӧз йылысь гижӧдъяс.
Киподтуя морт и сюмӧдысь вӧчасьӧ, артмӧны сылӧн и коми йӧзкостса шылада инструментъяс. Матӧ 18 во сибӧдӧма Одыбса ныв-зонпосниӧс музыка дорӧ сэтчӧс детсадъясын, а сэсся содтӧд тӧдӧмлун сетан шӧринын велӧдӧма томуловӧс гудӧкасьны да сюмӧдысь вӧчасьны. Челядьӧс быдтан-велӧдан уджлы Геннадий Иванович сетӧма 22 во.
Одыбсалӧн «Ловъя ва» ансамбльыс нималіс эз сӧмын ас районын, но и республикаын. Со и тайӧ гаж дырйи котырын сьылысьяс Вика, Ксюша да Полина Михайловаяс чолӧмалісны ассьыныс велӧдысьсӧ, сьылісны Геннадий Поповлысь сьыланкывъяссӧ. Ачыс тшӧтш сьыліс да кывбуръяссӧ лыддис. И сэтшӧм лӧсьыда гудӧкасис, мый ичӧт челядь ас окотасьыс йӧктыны чепӧсйисны. Бӧрас Геннадий Иванович козьналіс «Сырчик» детсадса муса челядьлы сьыланкывъяса диск, а школаын велӧдчысьяслы – «Мича гудӧк» небӧг.
А ми, бать-мам да велӧдысьяс, пӧся аттьӧалім Геннадий Ивановичӧс челядьӧс быдтӧм-чередитӧмӧ да найӧс бурӧ велӧдӧмӧ ыджыд пай пуктӧмысь, сиим сылы крепыд дзоньвидзалун, мед и водзӧ на гижас-лӧсьӧдас мича коми сьыланкывъяс, кывбуръяс да висьтъяс.
Бать-мам да велӧдысьяс.