Лыддьысьӧй, сиктсаяс, югдӧдӧй юр!

Миян регионысь ОНФ-ын водзмӧстчысьяс сувтӧмаӧсь Емдін районса Туискерӧсын библиотека пӧдлалӧмлы паныд.

«Фронтӧвикъяс» дорӧ йӧзыс шыӧдчылӧмаӧсь таво майын, кор сиктын пӧдласьӧма библиотекаыс. Висьталӧмаӧсь:

—Ми радейтам лыддьысьны, библиотекаын пыр йӧза, но реорганизациякӧд йитӧдын сійӧс век жӧ томналісны.

Кыдзи пасйӧ регионса ОНФ-лӧн штабӧ пырысь Нина Новикова, сикт-грездын библиотека, клуб, больнича, школа да мукӧд колана учреждение видзӧм-стрӧитӧм — Народнӧй фронтлӧн  мог. Общественникъяс дасьтӧмаӧсь такӧд йитӧдын «Село. Территория развития» уджтас. И «фронтӧвикъяс», дерт, босьтчӧмаӧсь отсасьны Туискерӧсын олысьяслы. Артмӧма. Ноябрсянь Туискерӧсын библиотека бара уджалӧ.

Емдін районӧ волігӧн «фронтӧвикъяслы» мойвиӧма разьны некымын гӧрӧд.

Сідз, Семуков грездын тӧкӧтьӧ абу пӧдласьӧма «Незабудка» турбаза. А сэтчӧ пӧ волывлӧ вель уна том йӧз, нуӧдӧны быдсикас аддзысьлӧм-слёт, котыртлӧны этнография да чужан му туялӧм кузя семинаръяс да мастер-классъяс.

Общественникъяслы районса чинаяс кӧсйысьӧмаӧсь видзны Семуковысь турбазасӧ.

Содтӧд на, районса чинаяс такӧдӧмаӧсь йӧзсӧ, мый  Микуньын лӧсьӧдасны пода туйяс.

А водзӧ вылӧ шуӧмаӧсь чукӧртчывны «гӧгрӧс пызан» сайӧ, медым сёрнитны, кыдзи водзӧ сӧвмӧдны районын культура, а сідзжӧ  унджыклаын  вузавны  газет-журнал да небӧг.

Снимокъясыс ӧтуввезйысь.

Лыддьысьӧй, сиктсаяс, югдӧдӧй юр!

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх