Медся мича нылӧс бӧръясны

Декабрь 6-7 лунъясӧ Сыктывкарын сизимӧдысь бӧръясны медся мича коми нылӧс. «Райда» конкурсын вермасясны Сыктывкарысь да Печораысь, Изьва, Койгорт, Кӧрт-керӧс, Сыктыв, Кулӧмдін да Удора районъясысь нывъяс.

Первой лунас «Тані ме ола, тані ме кола» ордйысьӧмын найӧ тӧдмӧдасны аскӧдныс, а «Тан колӧ чужны, тан колӧ кужны…» вермасьӧмын – чужаніннас.

Сэки жӧ петкӧдласны енбинысӧ да мывкыдлуннысӧ, карнанӧн ва новлӧдлан сямнысӧ.

Сцена вывсянь мичаа сёрнитны, лӧсьыдджыка петкӧдчыны налы отсаласны В.Т.Чисталёв нима культура колледжын велӧдысьяс.

Мӧд лунас гала-концерт дырйи жюри йӧзӧдас вермысьяссӧ. Первой  места шедӧдысьлы сетасны «Райда», мӧд да коймӧд местаясысь – «Катшасин» да «Пӧлӧзнича» нимъяс.

Конкурссӧ котыртӧны «Коми войтыр» ӧтмунӧмлӧн водзмӧстчӧмӧн.

Ассьыс пай пуктӧны и республикаса национальнӧй культура министерство да Сыктывкарын перымса комияслӧн национально-культурнӧй автономия. Медводдза ордйысьӧмыс вӧлі 2006 воын.

«Райда» ним шедӧдлісны Кулӧмдін районысь Яна Васильченкова, Мария Юшкова да Анастасия Терентьева, Изьваысь Ирина Терентьева, Интаысь Александра Макарова, Ухтаысь Анастасия Юдина да Емдінысь Юлия Седрисева.

Декабрь 6 лунӧ конкурссӧ позяс видзӧдны дон босьттӧг. Сійӧ лоас республикаын олысь войтыръяслӧн Ёртасян керкаын 13 чассянь. Сэні жӧ субӧтанас 15 чассянь лоас и гала-концертыс. Сэтчӧ веськалӧм могысь ковмас ньӧбны билет.

Медся мича нылӧс бӧръясны

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх