Олӧма войтыр вӧсна тӧждӧн

Регионса правительстволӧн чукӧртчылігӧн видлалісны «Старшее поколение» уджтас бала.

–Сійӧс урчитӧма дасьтыны «Демография» нацпроект серти, медым  бурмӧдны ыджыд арлыда войтырлысь олӧмсӧ, – висьталіс республикаса юралысь Сергей Гапликов. – А та могысь колӧ сӧвмӧдны медицина да социальнӧй юкӧн, а сідзжӧ ышӧдны олӧма йӧзӧс дзоньвидза оласногӧ.

Удж, уджӧн могмӧдан да йӧзӧс социальнӧя доръян министерствоӧн веськӧдлысьӧс вежысь Валерий Коротинлӧн кывъяс серти, ставсӧ тайӧс программаын индӧма. 2020-2024 вояс кежлӧ артыштӧм уджтасын пӧ пасйӧма, мый бурджыка кутасны видзӧдны гырысь арлыда войтырлӧн дзоньвидзалун бӧрся, туйдны найӧс водзмӧстчыны общественнӧй уджын, спортын, культураын.

–Торйӧн кӧ, программаас индӧма тӧждысьны олӧма да вермытӧм йӧз понда, – висьталіс Валерий Коротин. – Сідз, шуӧма, мый ыджыдджык водзӧс лоас, бурдӧдчанінын куйлӧдӧм дорысь кӧ отсавны  налы гортас либӧ лунся стационарын.

Та кындзи ветеранъяслӧн госпитальын лоӧ восьтӧма олӧма войтырлы медицина отсӧг сетан шӧрин, а Сыктывкарын, Воркутаын, Ухтаын, Печораын, Сосногорскын, Интаын, Усинскын, Луздор, Кӧрткерӧс да Сыктывдін районъясын – содтӧд 12 жыр.

«Старшее поколение» уджтасын тшӧтш индӧма, мый гырысь арлыда йӧз пӧвстын кутасны нуӧдны спартакиада. Налӧн лоас унджык позянлун и ассьыныс сям-киподтуйсӧ сӧвмӧдны-петкӧдлыны.

Олӧма войтыр вӧсна тӧждӧн

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх