Анонс

«Войвыв кодзувлӧн» ноябр тӧлысся номер бара вӧзйӧ коми кыв радейтысьяслы лов гажӧдантор, сьӧлӧм бурмӧдантор.

 

 

 

 

Мича арӧ, зарни арӧ

Кая гортӧ шума карысь.

Сӧмын тані шойччас лолӧй,

Вывті гежӧда кӧть вола

Сӧмын татысь сьӧлӧм кывзас

Югыд арлысь сьыланкывсӧ.

Керка ӧдзӧсӧс кор восьта,

Кыла арлысь небыд воськов.

Кыла, гылалӧ кыдз муӧ

Гӧрдов корйӧн пелысь пуӧй:

Юрӧд шыльӧдыштас сійӧ

менӧ аслас шоныд киӧн.

Сӧмын ӧтчыд тадз и лолӧ

Шань да югыд лоӧ лолын.

Сэсся, кор нин мӧда карӧ,

Шуд мен сиас мунысь арыс.

 

Восьтӧ номерсӧ Алёна Ельцовалӧн. «Паметь гы» кывбуръяса да миниатюраяса подборка. Поэтлӧн творчество йылысь гижӧ Наталья Горинова «Сьӧлӧм кылӧм кывбур визьӧн лоӧ…»: А.Ельцовалӧн «Кодзула зэр» кывбур чукӧр йылысь» статьяын. Тайӧ лоӧ отсӧгӧн коми кыв да литература велӧдысьяслы. Сідзжӧ выль пӧв восьтӧма лоӧ нималана коми гижысь да туялысь Павел Григорьевич Доронинлысь олан туйсӧ, аслыспӧлӧслунсӧ. Таво ми пасъям сылӧн чужлӧмсянь 115 во.

 

Войвыв кыа

Тані аслыспӧлӧс енэж

Пемыд войынсизим рӧма

Войвыв кыа, тешкодь кыа,

Гӧгӧр ставсӧ югзьӧдӧма.

Уна рӧмыс войын ворсӧ.

Бара дивуйтчӧны йӧзыс:

Здукӧн вошис алӧйгӧрдыс.

Бара нин со вермис лӧзыс.

«Сиктын олӧм» медводдза кывбуръясӧн журнал лист бокъясын мыччысис Максим Уляшев.

Интереснӧй, збыль вӧвлӧмтор подув вылын гижӧм «Витька-Корабел» висьт петіс Олег Уляшевлӧн.

Нӧшта ӧти бурторӧн лои «Выль нимъяс» конкурс вылӧ ыстылӧм гижӧдъясысь медбуръяссӧ йӧзӧдӧм. «Том гӧлӧсъяс», кыдзи шуим нимтыны юкӧнсӧ, — тайӧ и збыль том, мича гӧлӧсъяс. Мед жӧ ми кылам найӧс и водзӧ, мед жӧ найӧ лоӧны коми литературалӧн аскиа да ве-сиг и талунъя лунӧн.

Лыддьӧй «Войвыв кодзув», гижӧй журналӧ.

Анонс

«Войвыв кодзув» журналысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх