Семьяад кӧ быдмӧ висьлӧс кага

Ноябрь 26 лунӧ республикаса юралысьлӧн Общественнӧй приёмнӧйын «веськыд йитӧда» телефон пыр шыӧдчысьяс юасисны, коді да кыдз вермас отсавны семьялы, кӧні быдтӧны сьӧкыда нёрпалысь да вермытӧм кагаӧс.

Налӧн юалӧмъяс вылӧ вочавидзисны вермытӧм томуловлӧн «Надежда» реабилитация отделениеӧн веськӧдлысь Нелли Надточей, сэтчӧс социальнӧй удж кузя специалист Елена Калинина, Сыктывкарса кага керкаысь главнӧй врач Светлана Захарова, семьялы да челядьлы социальнӧй отсӧг сетан Сыктывкарса шӧринысь юрисконсульт Константин Моисеев.

Медводз звӧнитіс юркарысь ӧти ань. Верӧсыскӧд быдтӧны кагаӧс, кодлӧн абу ставыс лючки сідз шусяна опорно-двигательнӧй аппаратас. И найӧ кӧсйӧны мам капитал весьтӧ ньӧбны ки-кок песан-ёнмӧдан оборудование, но оз тӧдны, позьӧ-ӧ тадзсӧ вӧчны.

Константин Моисеев туйдіс, медводз пӧ колӧ видзӧдлыны Россияса правительстволысь 831 номера постановление, кӧні лыддьӧдлӧма, кутшӧм оборудование лыддьыссьӧ реабилитация нуӧданӧн. На лыдын кӧ эм аньӧн бӧрйӧмаыс, смела позьӧ вештысьны сыысь мам капиталӧн. Медунасӧ вит лун мысти вузӧссӧ ньӧбӧм йылысь актсӧ да чексӧ колӧ нуны Пенсия фондӧ либӧ МФЦ-ӧ.

Мӧд ань «веськыд йитӧда» телефон пыр юӧртіс, мый быдтӧ инвалид-нылӧс. Кӧсйӧма шыӧдчыны отсӧгла, но та могысь пӧ колӧ корлыны кутшӧмкӧ комиссия, мед пӧ видзӧдлас, кӧні да кыдзи найӧ олӧны.

Нелли Ивановна такӧдіс аньӧс, таысь повнысӧ пӧ нинӧмла. Медводз пӧ колӧ шыӧдчыны семьялы да челядьлы социальнӧй отсӧг сетан Сыктывкарса шӧринӧ, коді меститчӧма Чернов уличаса коймӧд номера керкаын. Россияын, республикаын, юркарын эмӧсь фондъяс, кодъяс вермасны отсавны пикӧ воӧм йӧзлы, но та могысь найӧ корӧны сідз шусяна жилищно-бытӧвӧй условиеяс йылысь акт.

«Надеждаӧн» веськӧдлысь висьталіс, мый комиссияас вермасны пырны социальнӧй уджалысьяс, полицияысь, тыр арлыдтӧмъяслӧн инспекцияысь, больничаысь либӧ поликлиникаысь, санэпидстанцияысь специалистъяс. Найӧ видзӧдласны, кӧні да кыдзи олӧ семьяыс. Медводз донъяласны керка-патерасӧ: кутшӧм джоджыс, стеныс, пӧтӧлӧкыс, ӧдзӧс-ӧшиньыс, кыдзі шонтӧны да тӧлӧдӧны оланінсӧ, сӧстӧм-ӧ асмогасяніныс. Сідзжӧ видзӧдласны, кӧні каганыс узьлӧ, ворсӧ, нуръясьӧ, вӧчӧ урокъяссӧ, эм-ӧ сылӧн чача, ручка-тетрадь, мыссян-пывсян кӧлуй, быд лун новлан кокньыд да шоныд паськӧм. Комиссияса восьтласны и холодильниксӧ да видзӧдласны, мыйӧн вердӧны кагасӧ. Тӧдмаласны, эм-ӧ патераас пон-кань, чери да лэбач, кыдзи найӧс дӧзьӧритӧны да сідз водзӧ. Ставыс тайӧ вӧчсьӧ сы могысь, медым тӧдмавны, вермас-ӧ мыйыськӧ омӧльтчыны кагалӧн дзоньвидзалуныс.

Нӧшта ӧти мам, коді быдтӧ инвалид-кагаӧс, юаліс, кӧні налы позьӧ ёнмӧдны дзоньвидзалунсӧ.

Елена Семёновна корис волыны на дорӧ Катаев уличаса 21 номера керкаӧ. «Надежда» отделениеын отсалӧны и пузчужӧмалы, и 18 арӧсалы. /ні сэні ёнмӧдӧ дзоньвидзалунсӧ 453 кага.

Нелли Ивановна висьтыштіс сыӧн веськӧдлан отделение йылысь. Сэтчӧс зільысьяс быд боксянь велӧдӧны вермытӧм кагаӧс да сылысь бать-мамсӧ, сетӧны физиология, гигиена, медицина кузя медшӧр тӧдӧмлунъяс, тӧдмӧдӧны челядьлысь дзоньвидзалун видзан правилӧясӧн да санитарно-гигиеническӧй нормаясӧн.

Нелли Надточейлӧн висьталӧм серти, отделениесьыс специалистъяс тшӧкыда асьныс шыӧдчӧны нёрпалысь да инвалид-кагаӧс быдтысь мам-бать дорӧ, висьтавлӧны, кӧні да мыйӧн вермасны отсавны татшӧм семьяыслы. Декабрын котыртасны мобильнӧй бригадаяс, кытчӧ пырасны педагогъяс, медработникъяс, юрист. Найӧ мӧдасны волывлыны сьӧкыда висьысьяс ордӧ гортас. Талун юркарын татшӧмыс 14 кага, кодъяс оз вермыны некытчӧ петавлыны.

«Веськыд йитӧда» телефон пыр бара жӧ нывбаба юаліс, кытчӧ позьӧ пырны велӧдчыны вермытӧм зонлы ӧкмысӧд класс помалӧм бӧрын.

Константин Константинович вӧзйис пыравны «Всё можем» ставроссияса сайт вылӧ. Сэні пӧ лыддьӧдлӧма став велӧдчанінсӧ, кӧні виччысьӧны вермытӧм том йӧзӧс. А юркарын пӧ инвалид вермас велӧдчыны политехническӧй, торгово-технологическӧй техникумъясын, сервис да связь колледжын. Позьӧ шыӧдчывны и мукӧдлаӧ.

Светлана Александровна тайӧ юалӧмсьыс неуна чуймис:

–Вермытӧм да висьлӧс ныв-зонлы водзӧ велӧдчӧм йылысь колӧ мӧвпавны оз ӧкмысӧд классын, а ёна водзджык. Быд школаын велӧдчысьяс пӧвстын нуӧдӧны сідз шусяна проф-ориентационнӧй удж. Дас арӧсӧн нин ичӧт мортлы колӧ гӧгӧрвоны, мый сылӧн висьӧмӧн, шуам, астмаӧн, эпилепсияӧн, оз позь мӧвпавны космонавтлӧн, пӧжарнӧйлӧн да мукӧд профессия йылысь. Бӧрйыны колӧ сэтшӧмӧс, мед велӧдчӧм бӧрас сійӧ вермис уджавны профессия сертиыс.

Николай Размыслов.

Семьяад кӧ быдмӧ висьлӧс кага

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх