Неважӧн Коми Республикаса вужвойтырлӧн шылада—драмаа театр вӧчис аслас видзӧдысьяслы козин – Иван Тороповлӧн повесьт серти «Выль капитан» шылада спектакль. Дасьтіс сійӧс том режиссёр Семён Горчаков. Спектакльсӧ сиӧма том видзӧдысьлы и пуктанногнас, и теманас.
Иван Тороповлӧн кольӧм нэмся 60-ӧд воясӧ гижӧм повесьтын висьтавсьӧ сплавын уджалысь том йӧз йылысь. Сӧвет кадӧ юяс кузя кылӧдлісны кер. Сплавщикъяслы ковмыліс йӧткавны моль бӧж, мед берегас оз коль вӧрыс. Овліс и, пуръяс кылӧдлісны. Кыскисны найӧс катерӧн.
Иван Торопов чужлӧма-быдмылӧма Койгорт районын. Сизим класс помалӧм бӧрын сійӧ уджалӧма вӧр-пунктса мастерӧн, сплавщикалӧма. Дерт, сэтысь и босьтӧма ассьыс геройяссӧ. «Выль капитан» вуджӧдӧмаӧсь роч кыв вылӧ да, повесьтыс нималіс Сӧветскӧй Союз пасьтала.
Дерт, сэксянь уна ва нин визувтіс. Ӧнія том йӧз весиг оз тӧдны вӧрын мырсьӧм йывсьыд. Но кыдзи пасйи нин, выль постановкасӧ сиӧма томъяслы. Сэкся кадӧ геройяс тшӧтш радейтісны, эскисны бурас. Нӧшта на режиссёр пыртӧма спектакляс «ловъя оркестр» улӧ йӧктӧмъяс, коді вӧчӧ ӧнія русӧ.
Геройясыс — катерӧн кылӧдчысь бригада, кытчӧ капитанавны индӧмаӧсь том ныв Люся Шишкинаӧс (ворсӧ Анна Попова). Дерт, мужичӧйяслы абу окота уджавны нывлӧн веськӧдлӧм улын. Торйӧн нин чушкӧ вӧвлӧм капитан Гертруд Матевлы (ворсӧ Андрей Засухин).
Сійӧ видлӧ ыззьӧдны котырсӧ, юктӧдӧ, мед сӧмын тшытшыбылкалысь (тадзи Матев нимтӧ Люсяӧс) оз кывзысьны. А ӧтчыд шома юрнас сійӧ вӧзйӧ мырдӧнавны капитаншаӧс. Но зонъяс лёк вылӧ оз ыззьыны. Да и бортмеханик Юралы (ворсӧ Валериан Канев), матрос Аршинлы (Тимур Смирнов) мусмӧма том нылыд. Найӧ дорйӧны Люсяӧс. А ярмӧм Матевӧс домавлӧны.
Спектакль помын Гертруд Матевӧс чеччӧдӧны катерсьыс. Кӧть и мӧдыс пыксьӧ, нинӧм пӧ ог помнит…
Пӧшти ставыс вӧчсьӧ катер вылын. Но висьтавсьӧ том йӧзлӧн олӧм йылысь: мыйла Матев юсьӧма, кыдзи матросъяс да Люся капитан веськалӧмаӧсь сплавӧ.
Чайта, тайӧ постановкаыс лоӧ вужвойтырлӧн шылада-драмаа театрлӧн «зарни кудйӧ» бур содтӧдӧн.
Екатерина МАКАРОВА.