Йӧз дорӧ восьса да бур сьӧлӧмӧн

Тавося ноябрь помын тырис эськӧ 85 арӧс Зинаида Григорьевна Зиновьевалы, но, жаль, сійӧ муніс мӧдаръюгыдас 31 во сайын нин.

Ми сыкӧд кыкнанным чужим-быдмим да шӧр школа помалім Сыктывкарын. Ме велӧдчи первой, а сійӧ – мӧдӧд номераын. Черчение кузя велӧдысьным, буракӧ, уджаліс кыкнан школаас да миянлы урок вылӧ вайлывліс, кыдз медбуръяссӧ, чертёжъяс, кодъясӧс вӧчлӧма Зина Зиновьева. И быд чертёжысь сылы вӧлі пуктӧма «5».

Сэсся Зина йылысь ме кывлі республикаса юннатъяслӧн станцияын, мый сійӧ быдтӧ-вӧдитӧ уна вожа шепта шобді. Ме сэтчӧ ветлӧдлі жӧ, но ёнджыкасӧ быдтылі град выв пуктас.

Дас класс помалӧм бӧрын муні велӧдчыны Москваӧ К.А.Тимирязев нима академияӧ. Сэні ми и бурджыка тӧдмасим Зинакӧд. Став велӧдчан восӧ сэсся олім ӧти жырйын. Миянкӧд тшӧтш олісны Хакасияысь кык ныв. Ас костын пыр вӧлім ӧтсӧгласаӧсь. Луннас академияын профессоръяслысь лекцияяс кывзім, а рытнас сёрӧдз пукалім «читалкаын». Вӧскресенньӧӧ гуляйтім Лиственнӧй аллеяті да академиялӧн паркын. Частӧ ветлывлім театръясӧ, кӧть мукӧддырйиыс видзӧдім спектакльсӧ эг партерсянь, а галёркасянь.

Шойччан лунъясӧ кытчӧкӧ ветлыны векджык ышӧдіс Зина. И кӧть кытчӧ вӧлі ог мунӧй, сьӧрсьыс век босьтліс фотоаппарат. Сідзи жӧ и общежитиеын олан жырйын ӧтарӧ водзмӧстчис. Босьтас вӧлі киас гитара да кутас ворсны, хакаскаяс мыла мича гӧлӧснас заводитасны, а сэсся и ставным мӧдам сьывны. Частӧ Зина чӧсмӧдліс миянӧс аслас пӧжасӧн.

Гӧрд дипломӧн академия помалӧм бӧрын Зинаида кутіс уджавны Ручейнӧй уличаса Коми государственнӧй опытнӧй станцияын научнӧй сотрудникӧн. Сылӧн водзмӧстчӧм-зільӧмӧн некымын во мысти лои вужйӧдӧма уна вося турунлысь куим сорт.

Сылӧн жӧ водзмӧстчӧмӧн котыртчис, кыдз ачыс шмонитӧмӧн шуліс, «учёнӧй сӧвет», кытчӧ веськалім Тамара Сердитова, ме да Клавдия Дилесова. Бӧръяыс специальносьт сертиыс плодоовощевод-виноградарь. Ставным ми лоим видз-му овмӧс наукаса кандидатъясӧн.

Зинаида чукӧстас вӧлі миянӧс гортас, и сэні пӧттӧдз сёрнитам, висьтасям, кыдзи-мый уджалам, сы бӧрын юам Зиналӧн чӧскыд пӧжасӧн тшай, а сэсся ворсам лотоӧн.

Зинаида Григорьевна туйдіс сідзжӧ быдмыны-сӧвмыны опытнӧй станцияын том уджалысьяслы. Бӧръя кадсӧ вӧлі учёнӧй секретарӧн. Век зілис отсавны научнӧй отчётъяс гижысьяслы. Татшӧм отчёттӧ ӧд ёна кужӧмӧн колӧ дасьтыны, оз на и быдӧнлӧн бура артмы.

Гортас сійӧ дӧзьӧритіс ыджыд арлыда нин мамсӧ да висьлӧс чойсӧ. Ачыс верӧс сайӧ эз петавлы. Зэв ёна радейтіс да мыйӧн вермис отсаліс племянникъясыслы, торйӧн нин кадысь водз кувсьӧм вокыслӧн пилы. Виталий гӧтрасьӧм бӧрас оліс Зинаида Григорьевнакӧд ӧти патераын. Бӧрынджык, кор сылӧн гӧтырыскӧд чужис кык пи, Зинаида отсаліс и найӧс быдтыны. Пыр син улас кутіс и, кыдзи быдмӧ-велӧдчӧ Володя племянникыс, ыджыд чойыслӧн пиыс.

Вот татшӧм зіль да уджач, йӧз дорӧ восьса бур сьӧлӧма вӧлі миян Зиночка – Зинаида Григорьевна Зиновьева, кодӧс ми некор ог вунӧдӧй да пыр кутам казьтывны.

Ия СЮРВАСЕВА.

Йӧз дорӧ восьса да бур сьӧлӧмӧн

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх