Усвавом сиктса школалы тыри 115 во. Юбилейсӧ пасйыны чукӧртчылісны сэні велӧдысьяс да велӧдчысьяс, школасӧ кольӧм каднас помалысьяс да педагог-ветеранъяс.
Тшупӧда паснас усвавомсаӧс чолӧмавны волісны Усинск карса администрацияӧн веськӧдлысьяс да «ЛУКОЙЛ-Коми» ООО-ын зільысьяс.
Тайӧ важся коми сиктас олысьясӧс грамотаӧ велӧдны босьтчӧмаӧсь 1904 воын. Сэки сиктса вичко бердын восьтӧмаӧсь грамота сетан школа. Велӧдчысьяслы урокъяссӧ первой нуӧдӧмаӧсь крестьяналысь кӧртымалӧм олан керкаясын, а 1909 воын кыпӧдӧмаӧсь пуысь торъя стрӧйба.
Ӧнія ыджыд да кыпыд школаас велӧдчан жыръясысь ӧтдор эм краеведческӧй музей, кӧні позьӧ тӧдмасьны войвывсалӧн быдлунъя олӧм-удж йылысь аслыспӧлӧс экспонатъясӧн да нималана художник, Усвавомса школасӧ помалысь Василий Игнатовлӧн серпасъясӧн.
Сиктса ныв-зон окотапырысь волывлӧны асланыс школаӧ и урокъяс бӧрын: тані налы котыртӧма быдсикас кружок да секция, томулов дасьтӧны да петкӧдлӧны спектакльяс, дерт жӧ, сьылӧны да йӧктӧны.
Ӧні тані велӧдчӧны Усвавомысь да орчча Нӧвикбӧж грездысь 160-ысь унджык челядь. Найӧс велӧдысьяс пӧвстысь кызвыныс помалӧмаӧсь тайӧ жӧ школасӧ.
Юбилейыслы сиӧм концерт дырйи велӧдчысьяслӧн да велӧдысьяслӧн вермӧмъяс йылысь висьталіс школаса директорыс Екатерина Дьячкова. Сійӧ тӧдчӧдіс, мый школаыс вӧлі и век лоас ныв-зонмӧс бурас туйдысь-ышӧдысьӧн, челядьлы зумыд бур тӧдӧмлун сетысьӧн, да сиис сылы водзӧ сӧвмыны-дзоридзавны.
Юбилейкӧд йитӧдын чолӧмалана гижӧд сетіс Екатерина Дьячковалы Усинск карса кытшын юралысь, муниципалитетса администрацияӧн веськӧдлысь Николай Такаев. Сійӧ пасйис, мый карса кытшын велӧдан юкӧнын Усвавомса школалӧн тӧдчанлуныс зэв ыджыд. Сылӧн подув вылын збыльмӧдсьӧны челядьӧс велӧдӧм-сӧвмӧдӧм могысь ӧнія гырысь проектъяс. Сідз, таво гожӧмнас тані вӧлі восьтӧма муниципалитетас медводдза на «Точка роста» велӧдан шӧрин, кӧні челядьлы сетӧны лыдпаса ӧнія технологияяс да гуманитарнӧй предметъяс кузя зумыд тӧдӧмлун.
«ЛУКОЙЛ-Коми» ООО-ысь генеральнӧй директор Александр Голованев тӧдчӧдіс, мый оз на быд школа вермы гӧрдитчыны татшӧм озыр историяӧн, коді топыда йитчӧма войвывса важся коми сиктлӧн аслыссикас культураӧн да озыр традицияясӧн.
–Кольӧм 115 вонас тайӧ школасӧ помалісны зэв уна ныв-зон, кодъяс лоисны асланыс уджын збыльысь профессионалъясӧн. И та могысь ыджыдысь-ыджыд пай пуктісны найӧс велӧдысьяс, кодъяс асланыс бур тӧдӧмлунӧн да сямӧн нималӧны район да республика пасьталаын. Эска, и талунъя велӧдчысьяс кутасны шоныда казьтывны ассьыныс школасӧ да велӧдысьяссӧ, кодъяс ышӧдӧны-туйдӧны найӧ бура велӧдчыны да радейтны чужан мунысӧ. Сиа, медым школаныд век лоас тіянлы радейтанаӧн, донаӧн да мусаӧн, мед некор оз чусмыны сылӧн бур традицияясыс, мед сійӧ водзӧ сӧвмас да дзоридзалас, – висьталіс Александр Голованев.
Усвавомса школаын велӧдчысьяслы да велӧдысьяслы мусир перйысьяс козьналісны мобильнӧй интерактивнӧй компьютернӧй класс. Александр Голованев сетіс школаса директор Екатерина Дьячковалы сійӧс ньӧбӧм вылӧ сьӧма сертификат.
Кыдзи пасйисны педагогъяс, татшӧм классыс – ӧнія медся выль велӧдан технологияясысь ӧти, коді сетӧ позянлун нуӧдны урокъяссӧ выльпыртӧмъяс вылӧ подуласьӧмӧн. Содтӧд на, татшӧм оборудованиесӧ, сы лыдын ноутбукъяссӧ да смарт-экрансӧ, позьӧ вуджӧдны классысь классӧ.
Школалӧн тшупӧда паслы сиӧм праздник вылӧ чукӧртчысьясӧс сьӧлӧмсяньыс гажӧдісны Усвавомысь да Нӧвикбӧжысь творческӧй самодеятельнӧй котыръяс. Челядькӧд бур уджысь Почёт грамотаясӧн да аттьӧалана письмӧясӧн пасйисны юбиляр-школаын зільысьясӧс.