Мырпомӧн да шаньгаӧн чӧсмӧдлісны

Кольӧм четвергӧ искусство гимназияса этнокультура шӧринӧ волісны Сыктывкарса университетын велӧдчысь суйӧрсайса студентъяс. Индияысь Аппикатла Паван Кумар, Ганаысь Сам Эндрю Кеннет да Опоку Акомуа Адуофуа тӧдмасисны Комиын олысь войтырлӧн традицияясӧн, культураӧн, нималанаинъясӧн.

Гимназистъяс Генрих Немчинов, Дарья Вокуева, Валентин Булышев, Кира Сорокина, Дана Белых, Иван Балин англия кывйӧн висьталісны гӧсьтъяслы изьвасалӧн «Луд» гаж, Кулӧмдін районысь Кадам ты, Сыктывдін районса Сёйты грездысь вежа Модестлӧн часовня, а сідзжӧ коми вӧралысьяслӧн кыйсьӧм, перымса зверинӧй стильын вӧчӧм видзӧгъяс йылысь. Суйӧр сайысь воӧм студентъяслы окота вӧлӧм унджык тӧдмавны Коми му йылысь да зіля юасисны ныв-зонлысь, мый налы гӧгӧрвотӧм на.

Дерт, челядьлы англия кывнад сьӧкыд на мытшасьлытӧг сёрнитны, та вӧсна и рочасьлісны на, но аддзысьлӧмыс и налы воӧма сьӧлӧм вылас. Найӧ козьналісны гӧсьтъяслы ас кинас вӧчӧм видзӧгъяс, коми культура йылысь небӧгъяс. А бӧрас ставӧн ӧтлаын юисны чай. Дерт, шаньгаӧн да войвывса медчӧскыд вотӧсӧн – мырпомӧн.

Индияысь да Африкаысь воӧм студентъяс висьталісны, окота пӧ ветлыны коми сиктӧ, ас синмӧн аддзывны комияслысь оланін-гортсӧ. Эска, налӧн кӧсйӧмыс збыльмас.

Ксения Таскаева.

Мырпомӧн да шаньгаӧн чӧсмӧдлісны

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх