Мойдысь Виктория

Кольӧм шойччан лунӧ филармонияын петкӧдлісны челядьлы Александр Пушкин серти «Сказка о золотом петушке» мойд. А мойдіс «Зарни ёль» ансамбльлӧн ворсӧм улӧ Коми Республикаса заслуженнӧй артистка Виктория Пыстина.

Кыдзи тӧдам, Дадон сарӧс ӧтарсянь и мӧдарсянь заводитӧны дӧзмӧдны вӧрӧгъяс. И медым сылысь унсӧ некод оз пальӧд, мудреч вайӧ зарни петукӧс. Тайӧ пӧткаыс сюсь синнас ылысянь аддзӧ вӧрӧгтӧ да чуксалӧ войскоӧс. Ставнысӧ пасьвартлісны сарлӧн салдатъяс. А мича шамаханскӧй сарицаӧс некод эз вермы. Том аньлӧн лэчкӧ шедіс и Дадон, а сэсся и олӧмнас вештысис…

Кыдзи пасйи нин, тайӧ мойдӧмыс вӧлі аслыспӧлӧс. Пушкинлысь гижӧдсӧ аканьясӧн ворсӧмӧн лыддис Виктория Пыстина. Искусство радейтысь тӧдӧ тайӧ артисткасӧ, кыдз зарни гӧлӧса сьылысьӧс. А тані сійӧ пӧрліс и Дадон сарӧ, и воинӧ, и мудречӧ, и шамаханскӧй сарицаӧ…

Кыдзи пасйис Виктория Пыстина, «Зарни ёль» ансамбль Борис Лагодакӧд (сійӧ вӧлӧма петкӧдчӧмыслӧн режиссёрӧн) дасьтылӧмаӧсь нин некымын мойд. Тайӧ «Кошкин дом», «Дюймовочка». Весиг петкӧдчылӧмаӧсь Сербияын «Сказ о попе и работнике его Балде» мойдӧн.

–Чайта, «ловъя» шылад улӧ мойд лыддьӧм-ворсӧмыс воӧ сьӧлӧм вылас челядьлы и верстьӧлы, – висьталӧ Виктория Пыстина.

–Ті ӧд сьылысь, мыйла колӧ тадзи петкӧдчӧмыс?

–Татшӧм уджтасыс сетӧ меным позянлун видлыны ачымӧс мӧд сідз шусяна амплуаын. Ӧд тані ме ог сьыв, а ворса, и тайӧ менӧ сӧвмӧдӧ, кыдз артисткаӧс.

–А кыдзи тіян артмӧ ворсны ӧтпырйӧ да аслыспӧлӧса некымын персонажӧс? Ёна-ӧ сьӧкыд?

–Мойдын ворсӧмыс менӧ косӧдӧ челядьдырӧ. Сэки ме вӧлі чачаясӧн тадзи ворса, мыйкӧ вӧлі мӧвпышта да гӧлӧсӧс вежлала. Школаын велӧдчигӧн бара жӧ гӧлӧс вежлалӧмӧн радейта вӧлі ёртъясӧс, велӧдысьясӧс да тӧдсаясӧс петкӧдлыны. Сідзжӧ и мультфильмъяс либӧ кутшӧмкӧ кино. Сэки быттьӧ дурӧм вӧлі, а ӧні со такӧд уджӧй йитчӧма.

Дерт, абу кокньыд геройлӧн куӧ пырны. Колӧ мӧвпавны, сідз и тадз видлыны, гӧлӧснад ворсӧдчыштны. Меным тайӧ аслым зэв ёна сьӧлӧм вылӧ воӧ. А кор артмас да челядьлы кажитчас – таысь зэв нимкодь.

Екатерина МАКАРОВА.

Мойдысь Виктория

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх