Коми Республикаын олысьяслӧн эм позянлун пырӧдчыны «Лица Победы» войтыркостса уджтасӧ.
Айму вӧсна Ыджыд тыш дырйи миян странаысь пӧгибнитіс 26,6 миллионысь унджык морт.
Ыджыд шог вайис вир кисьтана война став войтырлы, зэв уналысь торкис-дзугис-пузувтіс олӧмсӧ.
Мужичӧйяскӧд ӧтвылысь Чужан му вӧрӧгысь дорйисны аньяс да челядь, лун и вой мырсисны тылын уджалысьяс.
Талун миян странаын быд семьяын видзӧны югыд паметьсӧ рӧдвуж да матыссаяс йылысь, кодъяс венісны фашистъясӧс да пуктісны Победа матыстӧм-дорӧмӧ ассьыныс ыджыдысь-ыджыд пай.
Айму дорйысьяслӧн подвигыс некор оз вун. Буретш та могысь Москваын Победа музей лӧсьӧдіс «Лица Победы» историческӧй депозитарий (хранилище), кӧні чукӧртӧма нин 150 миллионысь унджык снимок да гижӧд.
Тайӧ зэв тӧдчана проектас вермӧны пырӧдчыны оз сӧмын Россияын, но и суйӧр сайын олысьяс. Быдӧнлӧн эм позянлун гижны Айму вӧсна Ыджыд тышдырся кадӧ матыссаяслӧн олӧм йылысь, йӧзӧдны налысь важ фотояссӧ. Семья архивысь юӧрсӧ позьӧ ыстыны уна ног:
1) историческӧй депозитарийлӧн ӧтуввезйын historydepositarium.ru сайт пыр;
2) «Лица Победы» мобильнӧй приложение отсӧгӧн;
3) пошта пыр 121170, Москва, Фонченко вокъяслӧн уличаса 10-ӧд номера керка, Победа музей адрес серти;
4) аслыд вайны музейӧ материалсӧ Москва, «Парк Победы» метро, Победалӧн площадь, 3-ӧд номера керка адрес серти.