Кольӧм вежонӧ Сыктывкарын кыпыда восьтісны «Коми рытъяс» фестиваль, кодӧс сиӧма коми драматургия чужӧмсянь 100 волы.
Медводдзаӧн петкӧдчисны Кӧрткерӧс районысь йӧзкостса да самодеятельнӧй котыръяс. А матысса кадӧ искусство радейтысьясӧс виччысьӧны Ухта да Сыктывдін.
И сідз, ноябрь 9 лунӧ Ухтаысь «Радлун» петкӧдлас В. Савинлӧн, Г.Юшковлӧн, А.Поповлӧн, В.Ардовлӧн, Н.Обрезковалӧн, А.Власовлӧн, З.Роговалӧн серамбана гижӧдъяс серти ӧти акта тешъяс.
Мӧд лунас позяс видзӧдны Сыктывкарса 18-ӧд, 36-ӧд номера школаясын да Коми национальнӧй гимназияын велӧдчысь енбиа челядьлысь ворсӧмсӧ. Ворсасны найӧ Ёртасян керкаын «Оліс-выліс мойд…».
Ноябрь 10 лунӧ жӧ петкӧдчас Сыктывдін районса Сёськаысь «Енбиа йӧз» котыр. Ворсасны «Кодкӧ сайӧ пета на…» шылада теш. Сьылан да ворсан котыръяснас веськӧдлӧ нималана коми композитор Ирина Ивановна Чувьюрова.
А ноябрь 11 лунӧ видзӧдысьяслы вӧзъяс ассьыс «Югъялан кодзув» постановкасӧ Выльгортысь С.Ермолин нима народнӧй театр. Веськӧдлысьыс Валентина Николаевна Леканова гижис буретш артист Степан Ермолинлӧн олӧм да удж йылысь. Котырыс петкӧдчас В.Савин нима драмтеатрлӧн ичӧт сцена вылын.