Комиысь ставроссияса Народнӧй фронтын водзмӧстчысьяс туялӧмаӧсь Сыктывкарса школаясӧ воӧдчан туйяс, йӧзыс на дорӧ шыӧдчӧмаӧсь да.
«Фронтӧвикъяскӧд» тшӧтш рейдӧ петалӧмаӧсь юркарса администрацияын зільысьяс да погона йӧз. Кытшовтӧмаӧсь и Улыс Човйысь, Вылыс Максаковкаысь, Лесозаводысь, Давпон да Лунвыв микрорайонъясысь туйяс. И шуӧны, мый медся шогмытӧмыс – Лунвыв микрорайонсянь Давпонӧдз 24 номера школаӧдз. Сэті пӧ полігтырйи колӧ ветлыны.
Кыдзи висьталӧны общественникъяс, Лесопарковӧй уличасянь Станционнӧйӧдз челядьлы колӧ вуджны кӧрт туй вомӧн. Вуджанінсӧ абу посйӧма. Пемыд. Содтӧд на и некутшӧм юӧртан пас абу сувтӧдӧмаӧсь ни поездса машинистлы, ни подӧн ветлысь-мунысьлы. А школа-ӧдзыс мӧд туй абу. Кӧрт туй вомӧн веськыдалӧмӧн 250 метр, а кытшолӧн кӧ воӧдчыны – куим километр артмӧ. И ковмас шлапсьӧдны подӧн, сы вӧсна мый школа дорӧдзыс некутшӧм автобус оз ветлы.
Содтӧд на пода туйыс няйт, гӧптӧсь. Туйсӧ эськӧ посйыштӧмаӧсь. Но плакаяссӧ сідз-тадз пукталӧмаӧсь да, костъясас вермас веськавны весиг верстьӧлӧн кокыс. Шогмытӧминӧд восьлалігӧн верман и коктӧ музгыльтны. Би сюръяяс абуӧсь жӧ. Станционнӧй улича помын эновтӧм гаражъяс сулалӧны, а матігӧгӧрыс рассялӧма да борщевикӧн тырӧма.
– Ми весьӧпӧрлім, кор тайӧ туйӧдыс школаӧдзыс воӧдчим. А ӧд таті челядь ветлӧны. Быть колӧ сэті лӧсьӧдны: вӧчны пода туй, югзьӧдны, кӧрт туй вомӧныс посйыны. Содтӧд на и автобус маршрут урчитны, мед йитны Лунвыв да Давпон микрорайонъяссӧ. Та кузя вӧзйӧмӧн шыӧдчим нин меставывса чинаяс дорӧ да кӧрт туй кутысь дорӧ. Дерт, гӧгӧрвоам, мый ставсӧ ӧдйӧ вӧчны оз артмы, но кутам корны тайӧс. Чинаяслы быть колӧ тӧждысьны челядьлӧн безопасносьт вӧсна, – пасйис регионса ОНФ штабӧ пырысь Елена Шумилова.
Общественникъяс казялӧмаӧсь тырмытӧмторъяс и мукӧд велӧдчанінӧ воӧдчан туйяс вылысь. Сідз, Улыс Чов посёлокын 11 номера школаӧ ныв-зон ветлӧдлӧны сідз шусяна коллекторнӧй юкмӧс дорті, коді восьса. Он и тӧдлы, кага вермас сэтчӧ усьны. Содтӧд на и туйсӧ оз жӧ югзьӧдны.
Лесозаводса Банбан да Серов туйвежын, коді нуӧдӧ 33 номера школаӧ, «зебраыс» абу. «Фронтӧвикъяс» та кузя шыӧдчӧмаӧсь меставывса чинаяс дорӧ да полицияӧ.
– Збыльвылас кӧ, тырмытӧмторйыс нӧшта на унджык. Та вӧсна «Школаӧ туй» акциякӧд йитӧдын ми и водзӧ кутам туясьны, а сідзжӧ, котыртлам «гӧгрӧс пызан», кытчӧ корлам регионса чинаясӧс, – тӧдчӧдіс Елена Шумилова.