Локтан во кежлӧ республикаса бюджет йылысь оланпас бала видлалігӧн Госсӧветын донъялісны видз-му овмӧс сӧвмӧдан госпрограмма. Сійӧс веськӧдӧма регионын олысьясӧс Комиын вӧчӧм сёян-юанӧн могмӧдӧм вылӧ.
–Видз-му овмӧс – быд странаса экономикаын тӧдчана юкӧн, – висьталіс Госсӧветӧн веськӧдлысь Надежда Дорофеева. – Производство содтӧм, муяс бурмӧдӧм, скӧт висьӧмысь видзӧм, сиктса войтырлысь уджаланногсӧ бурмӧдӧм вылӧ 2020-2022 воясӧ шуӧма торйӧдны 5 миллиардысь унджык шайт.
Регионысь видз-му овмӧсса министр Анатолий Князевлӧн кывъяс серти, тыдалана вермӧмъяс лои шедӧдӧма чипан видзан юкӧнын. Рытыв-Войвыв кытшын пӧ сӧмын Комиын, Санкт-Петербургын да Ленинград обласьтын сӧвмӧдӧны сійӧс. Зеленечса чипан видзан фабрикаын комбикорм вӧчан завод стрӧитӧм бӧрын пӧ нӧшта на 50 прӧчентӧн унджык позяс вӧчны чипан яйсӧ да курӧг кольксӧ да тырвыйӧ могмӧдны татшӧм сёяннас республикаын олысьясӧс.
Бӧръя нёль вонас регионын кыпӧдӧмаӧсь 40 мӧс карта. Анатолий Князев эскӧдіс, тайӧ уджсӧ пӧ и водзӧ кутам нуӧдны.
Тырмымӧн град выв пуктас быдтыны отсалӧ Сосногорскысь теплицаяса овмӧс. Неважӧн сэні воӧма нин ӧгуреч-помидорлӧн медводдза урожай. Вежоннас босьтӧны град выв пуктассӧ кызь тоннаӧдз, а вомӧд мысти комплекслӧн вынйӧрыс нӧшта на содас.
Госпрограммаын урчитӧма сӧвмӧдны видз-му овмӧсын ичӧт да шӧр бизнес, котыртны потребкооперативъяс, инавны вӧчӧмторсӧ суйӧрсайса странаясӧ. Та кындзи сикт-грезд сӧвмӧдан уджтас серти республика виччысьӧ федеральнӧй бюджетысь сьӧм, медым дзоньтавны клуб-бурдӧдчанінъяс. Но муниципалитетъясын абу на дасьӧсь та кежлӧ, и видз-му овмӧс министерство кӧсйысьӧ отсавны налы лӧсьӧдны колана проектъяс да донъявны найӧс.
Госсӧветысь депутат Леонид Вокуев юаліс министрлысь, кыдзи пӧ республикаын сӧвмӧ кӧр видзан юкӧн. Анатолий Князев вочавидзис, регионса овмӧсъясын пӧ видзӧны 90 сюрс кӧр, но нӧшта содтыны пемӧс юр лыдсӧ позянлуныс абу – йирсяніныс оз тырмы да. Колӧ пӧ и ӧтувтны кооперативъясӧ асшӧр стада кутысьясӧс, сэки налы кокньыдджык лоӧ инавны прӧдукциясӧ. Ӧні суйӧр сайӧ вузалӧны кӧр ку, а яйсӧ кӧсйӧны на сӧмын.
Республикаса Общественнӧй палатаӧн веськӧдлысь Сергей Чечёткинлӧн видзӧдлас серти, видз-му юкӧнлы унджык сьӧм колӧ вичмӧдны, медым отсавны сӧвмӧдны фермер овмӧсъяс, ньӧбны колана техника, переработайтны быдтӧм прӧдукция.
Депутатъяс выльысь кыпӧдасны тайӧ сёрнисӧ ноябрь 12 лунӧ ведомствояскостса комиссиялӧн чукӧртчылігӧн.