Помасьӧ октябрь, сідзкӧ, воис кад кольӧм гожӧмыслы кывкӧртӧд вӧчны. Ӧд збыльысь унатор вӧлі вӧчӧма!
Войвывса вӧрзьӧдлытӧм вӧрыс век ышӧдліс и ӧні ышӧдӧ туристъясӧс волыны «Югыд ва» национальнӧй паркӧ. А таво и поводдяыс ыръянитіс. Помтӧг зэрис, да матӧ быдса тӧлысь эз лэдз туристъяслы воӧдчыны паркса ӧткымын юкӧнӧ. Юясын ваыс медводдза кӧдзыдъясӧдз тувсовъя ытва мында вӧлі. А кӧдздӧдіс сентябрын.
Татшӧм зэра-ваа гожӧмыс вель важӧн нин эз вӧв. Дерт, туристъяс, кодъяс быд во волывлӧны паркӧ, ёна шензисны, кор аддзисны бузгысь шоръяс сэні, кӧні мӧйму на кокни кӧмӧн позис ветлыны. Но, мӧдарӧ кӧ, тайӧ и бур – важысянь тӧдса местаясыс кодъяслыкӧ выль боксянь петкӧдчисны-мыччысисны.
И век жӧ паркӧ волыны кӧсйысьыс пыр содӧ. Кодсюрӧ медводдзаысь на локтӧ. А унаӧн некымынысь нин волӧмаӧсь. Паркын уджалысьяслы нимкодь, кор туристъяс висьталӧны, ми пӧ тіян дорын во дас нин шойччам!
Бӧлбанъю да Кожим юясті, а сідзжӧ Народа да Манарага гӧраяс вылӧ кыпӧдчылӧм бӧрын Косьюті пыжӧн кылӧдчысьяс ёна радлісны ыджыд ваыслы, ӧд ӧткымынлаын байдарка-катамаранныс зэв ёна ӧддзыліс – часнас квайтымын километрӧдз.
А подӧн ветлысьяслы, нопсӧ ас пельпом вылас кыскалысьяслы видеоблогер да фотограф Олег Чегодаев дасьтӧма «Корона Урала» уджтас. Корӧ кыпӧдчывны Уралса медджуджыд гӧраяс вылӧ: Лунвыв Уралын – Ыджыд Иремель либӧ Ямантау, Шӧр Уралын – Ослянка, Войвыв Уралын – Тӧвпоз из, Войвыв кытшдорса Уралын – Народа, а дзик нин Вой саридздорса Уралын – Пайер вылӧ.
Тавося гожӧмын сизимдас ӧти лунӧн Кирилл Фронюк ӧтнасӧн муніс Урал гӧраті куим сюрс верст Оренбургсянь Вой саридз дорӧдз. «Югыд ва» паркын сійӧ кыпӧдчыліс Тӧвпоз из, Манарага, Народа вылӧ.
Но ӧд оз ставӧн асьнысӧ песны кӧсйыны. Лӧня шойччыны окотитысьяс волісны Санавожӧ, Переправаӧ, Пӧдчеремӧ. Кӧть тайӧ шойччанінъясас сьӧкыд жӧ воӧдчыны, куимнанлаас гожӧмбыд йӧза вӧлі. Переправа меститчӧ Кожим ю бокын, сэтчӧ волӧны семьяӧн, ёрт чукӧрӧн, медым лолавны сӧстӧм сынӧдӧн, нимкодясьны вӧр-ваӧн. Санаиз да Колокол гӧраяс дорсянь визувтӧ Санавож ёль. Кожимӧ усянінас лӧсьӧдӧма Санавож шойччан база. Сэсянь позьӧ подӧн ветлыны матысса скалаясӧдз. Пӧдчеремын татшӧм жӧ нима ю кузя кывтӧм бӧрын пӧттӧдз позьӧ пывсьыны жар пывсянын.
Гожӧмбыднас «Югыд ва» паркӧ воліс 4,3 сюрс морт, колляліс сэні вежон-мӧд. А нӧшта кызь сюрсысь унджыкӧн тӧдмасисны паркӧн экскурсия, выставка, туристъяслӧн слёт дырйи, пырӧдчисны мастер-классъясӧ.
Гожӧмыс помасис, но паркын зільысьяслы личӧдчывны некор. Матыстчӧ тӧв, сідзкӧ, регыд «Югыд ваӧ» локтасны тӧвся туризм радейтысьяс.
Ксения Стеценко,
«Югыд ва» паркысь пресс-секретарь.