Утка кыйӧмыд – нэм кежлӧ висьӧм…

Мужикулов-гижысьяс пӧвстысь унаӧн радейтлӧмаӧсь кыйны утка. Со и Нёбдінса Виттор та йылысь жӧ гарыштӧма: «Аттӧ, уна жӧ Печора вылад утка быдтысьӧ. Вуджа вӧлі мӧдлапӧлас да, быд тыын сьӧд пукалӧ уткаыд. Меысь кындзи сэні сэсся некод эз вӧв кыйсьысьыд да, тырмӧ тай вӧлі, майбыр. Сӧмын пищальӧй чукля вӧлі да, этша жӧ сюрліс-а. Пищальтӧ Ӧльӧксан Макарович Мартюшев, учитель, шыбитліс кыркӧтш горулас да, чукыльтчис. Менам гыпкӧм-лыйлӧмысь вӧлі зэв ёна дӧзмӧма. Абу дивӧ: весиг стволыс вӧлі доналӧ, китӧ сотӧ».

А утка кыйӧмыд, ёртъяс, тайӧ висьӧм. Пысасяс кӧ – нэм кежлад. Мужикулов арся либӧ тувсовъя кыйсян сезон воссьӧмсӧ виччысьӧ школаӧ медводдзаысь мунысь моз. Кӧть ставыс важӧн нин дась ва пӧтка кыйигкежлӧ: ружье, патрон, кӧм-пась, чучелаяс, кодсюрӧлӧн пыж-байдарка, а душ-мӧдлӧн и усьӧм утка ю-тыысь судзӧдны сяммысь пон – оз узьсьы, ӧдва войыс кольӧ. Сӧмын на асыввылас визьӧн гӧрдӧдыштас кыаыс да горӧдасны медводдза петукъяс – кыйсьысьяс дзебсьыштӧмаӧсь вадорӧ тэчӧм лыска чомъясӧ да дзоргӧны пемыдас. И пансьӧ ордйысьӧм: либӧ тэ шковган уткасӧ, либӧ сійӧ тэнӧ жогнитас. Кыянторйыд истребитель кодь: он на удит ружье прикладтӧ дзенгыны пельпомад – вошӧма нин.

Со шутьлялан шыӧн вӧзь партия быз пуксис чучелаяс костӧ. Кӧні утка, кӧні чучела, кӧні ва турун – ӧдва торйӧдан. Рӧмыд на. Шков! Утка кельӧб ракетаӧн качис сынӧдӧ. Гугасьӧма некымын чучела, но и ӧти лэбалысь кольӧма, швачӧдчӧ борднас. Ружье кутан киӧс босьтӧма тіран висьӧм. Тайӧ – романтика, и нывбабаяс сійӧс швач оз гӧгӧрвоны.

Владимир Шомысов.

Утка кыйӧмыд – нэм кежлӧ висьӧм…

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх