Мый и сёям?..

Водзынсӧ кыдзи вӧлі тӧдмалан, шогмӧ али оз сёяныс? Синтӧ чӧвтлан, исыштан, а сэсся либӧ вомад сюян, либӧ помӧйӧ шыбитан.

А ӧні унджыкыс сюсьмисны да сёян-юансӧ босьттӧдзыс быть видзӧдлӧны сылысь сідз шусяна срок годностисӧ.

Но ньӧбасьыськӧд сюсьмисны тшӧтш и вузасьысьясыд, налы ӧд колӧ инавны ставсӧ, мый лавкааныс эм, мед дьӧбӧ не кольны.

Кӧть эськӧ Роспотребнадзор зільӧ эрдӧдны сёян-юан иналӧм кузя оланпас торкалысьясӧс, но, видзӧдӧмпӧръя, налӧн киныс судзсьӧ сӧмын ичӧт вузасянінъясӧдз.

Сідз, неважӧн Чилимдінын лавка кутысь аньлысь бракуйтӧмаӧсь «печатьтӧм» 80 чипан кольк. Воркутаын аддзӧмаӧсь документтӧм 12 кило чипан зад. Нӧшта ӧти вузасянінын вӧзйӧны вӧлӧм код тӧдас кытысь бось тӧм сосиски.

А со супер да гипермаркетъясыд оз гоз-мӧд килоӧн, а тоннаясӧн «бергӧдлӧны». И тані быдӧн наянитӧ, коді кыдзи кужӧ.

Уналаысь казявлан, торйӧн нин йӧла вӧлӧгаа джадж дорын, мый пачкаяссӧ, кодъяслӧн срокыс помасян выйын нин, сувтӧдӧмаӧсь воддза радас, а свежӧйджыкъяссӧ сайӧдӧмаӧсь. Коді тӧдӧ нин та йылысь, дерт, перъяс пыдіджыкысь, а коді оз, босьтас ортсысӧ.

Сэсся ыджыд вузасянінъясын эмӧсь асланыс кулинария юкӧнъяс, кӧні важмӧм калбас-сырсьыс вӧчӧны салат, пӧжасӧ пуктӧны. Весиг выль нянь шомӧс гудралігӧн пӧ пуктӧны кольӧм тупӧсьяссӧ!

Кывлі, Сыктывкарса ӧти гырысь лавкаын пӧ весиг эм торъя ӧчеред, кӧні йӧзыс босьталӧны важмыны заводитӧм сёян-юан да весиг песласянтор. Но сэтчӧ сідз-тадз он на и веськав, сӧмын тӧдсаяс пырыд. И волывлӧны пӧ татшӧмторйысла сӧмын дона машинаӧн озыр паськӧма йӧз…

Но мукӧдлаас и татшӧмторнас юрнысӧ оз висьмӧдны – шыблалӧны шогмытӧм вӧлӧгасӧ лӧп-ёг чукӧртанінӧ, кытысь сэсся сійӧс, овлӧ, ыджыд зык-шумӧн кватлалӧны орчча керкаын олысьяс.

Со Екатеринбургын весиг ӧтуввезйысь позьӧ аддзыны помӧйясысь лӧсьӧдӧм карта, кӧні пӧ позьӧ «дон босьттӧг номсасьыштны чӧскыд сёянӧн». И татшӧмторйыс ёна воӧма сьӧлӧм вылас сэтчӧссалы…

Кытчӧдз бара-й нӧшта на вайӧдас морттӧ татшӧм олӧмыс?..

Анжелика Елфимова.

Мый и сёям?..

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх