«Монди Сыктывкарса ЛПК»-ын зільысьяс водзӧ донъялӧны районъясын социальнӧя ёртасьӧм йылысь сёрнитчӧм серти бергӧдӧм удж. Та пӧрйӧ найӧ волісны Кӧрткерӧс районӧ, кодлы 2019 воын комбинатсянь вичмис 7 миллион шайт. Кыдз петкӧдчис, тайӧ сьӧмыс – сикт-посёлокын олысьяслы зэв тӧдчана отсӧг.
Йӧзлысь вӧзйӧмсӧ тӧд вылӧ босьтӧмӧн
–Нимкодь, мый комбинат оз сӧмын вичмӧд сьӧма отсӧг, но и гӧгӧрвоӧ сикт-грездса войтырлысь мытшӧд-падмӧгсӧ да зільӧ найӧс бырӧдны, – пасйис Кӧрткерӧс районса администрацияӧн веськӧдлысьлысь удж вӧчысь Константин Сажин.
–Социальнӧя ёртасьӧм кузя сёрнитчӧмсӧ дасьтігӧн да вынсьӧдігӧн ми босьтам тӧд вылӧ йӧзлысь корӧм-вӧзйӧмъяссӧ, ӧд найӧ медбура тӧдӧны сиктсалысь тӧжд-могсӧ. А сэсся отсалам разьны гӧрӧдъяссӧ. Сідз, Кӧрткерӧс районын зэв тӧдчана сӧвмӧдны видз-му овмӧс, туризм да спорт, – пасйис «Монди Сыктывкарса ЛПК»-ын сертификация да экология юкӧнӧн веськӧдлысь Марина Королева.
Республикаын да и ставнас страна пасьтала район нималӧ дорччысьяслӧн «Кӧрт Айка» фестивальӧн. И тайӧ гажсӧ дасьтӧм-нуӧдӧмӧ «Монди Сыктывкарса ЛПК» быд пӧрйӧ пуктӧ ассьыс пай. Ас кадӧ весиг районса юрсиктӧ пыранінын пассӧ – Кӧрт Айкалысь мыгӧрсӧ – сувтӧдісны комбинат отсӧгӧн.
«Монди Сыктывкарса ЛПК»-лӧн сьӧм весьтӧ Кӧрткерӧс районса спорт ордйысьӧм-гаж котыртан шӧринӧ лои ньӧбӧма туристъяслы колана эмбур. И ӧні районса уна сё ныв-зонлӧн да олӧма мортлӧн эм позянлун петавны пода туйӧ – кытшовтны чужан мулысь мича пельӧсъяс, нимкодясьны вӧр-ваӧн. Котыртлӧны тшӧтш олӧма да вермытӧм йӧзлы спортивно-туристскӧй фестиваль.
Быд удж колана
Сиктса войтырӧс уджӧн могмӧдӧм вылӧ 2019 воын лои веськӧдӧма 3 миллион 800 сюрсысь унджык шайт. Кӧрткерӧс районса занятосьт шӧринӧн веськӧдлысь Александр Василевскийлӧн висьталӧм серти, тайӧ сьӧм весьтӧ котыртӧма содтӧд уджаланінъяс Керӧсын, Лӧкчимдінын, Мор-дінын, Одыбын да Кӧрткерӧсын. Удж-тӧмалысьяс мичмӧдӧны-пелькӧдӧны сикт-посёлоклысь чужӧмбансӧ, дзоньталӧны стрӧйбаяс. Сідз, Лӧкчимдінын найӧ разисны мӧдлаӧ овны вуджӧдӧм бӧрын кисьтӧм керка-сарай да гараж.
Этша вылӧ куим мортӧс уджӧн могмӧдны лӧсьӧдчӧ и Пезмӧгын «Северная Нива» видз-му овмӧсӧн юрнуӧдысь Галина Тарасевич. Сійӧ аттьӧаліс «Монди Сыктывкарса ЛПК»-ӧс выль карта кыпӧдӧмын сьӧма отсӧгысь.
–2008 восянь ми содтім скӧт юр лыдсӧ 10 пӧв. Та вӧсна шуим кыпӧдны нӧшта 450 юр вылӧ кукань карта. Комбинат та могысь вичмӧдіс миянлы 1 миллион 750 сюрс шайт – тайӧ миянлы зэв колана сьӧм! – тӧдчӧдіс Галина Тарасевич.
Тӧдчанаӧн лои отсӧгыс и крестьянско-фермерскӧй овмӧсӧн веськӧдлысь Мария Елькиналы, коді 2012 восянь рӧдмӧдӧ квайтпалич. Компаниялӧн сьӧм весьтӧ сійӧ ньӧбӧма лэбач видзӧм могысь автомат линия.
Сёрнитчӧмын урчитӧм нӧшта 1 миллион 198 сюрс шайт сетасны ас вылӧ уджалысьяслы лизингысь вештысьӧм могысь.
Томулов да олӧма вӧсна тӧждӧн
Социальнӧя ёртасьӧм йылысь сёрнитчӧм серти 100 сюрс шайт таво вичмис Кӧрткерӧсын ывлаын би выльмӧдӧм вылӧ. Кыдз висьталіс овмӧдчӧминса администрацияӧн веськӧдлысь Игорь Андреев, во джынйӧн та весьтӧ бюджетын лои видзтӧма вель уна сьӧм.
Дерт, компаниялӧн отсӧгтӧг эз кольны и велӧдчанінъяс. Кӧрткерӧс районса велӧдан юкӧнӧн юрнуӧдысь Наталья Ярцевалӧн висьталӧм серти, таво «Монди Сыктывкарса ЛПК»-лӧн сьӧм вылӧ школаясӧ ньӧбисны ЕГЭ нуӧдӧм могысь колана оборудование – принтеръяс да ноутбукъяс. Техникаыс колӧ экзамен кежлӧ колана материал дасьтӧм да печатайтӧм вылӧ.
–Шойнатыса школаын ӧтувъя экзаменсӧ сдайтӧны уна ныв-зон. Шойнатысаяс кындзи миянын велӧдчӧны Вомынысь, Важкуръяысь, Нёбдінысь томулов. Экзамен сдайтны татчӧ локтӧны тшӧтш Пӧддельнӧйысь да Висер вожысь – Одыбысь, Висерысь, Ыджыдвиддзысь челядь. Выль техниканас позяс ӧдйӧджык дасьтыны став колана документсӧ, – висьталіс Шойнатыса школаӧн веськӧдлысь Светлана Попова.
Кӧрткерӧс районса спортшкола вермӧ ошйысьны физкультурно-массовӧй удж медбура котыртӧм кузя республикаса смотр-конкурсын вермӧмъясӧн. Таво Одыбысь, Керӧсысь, Лӧкчимдінысь, Пӧдтыбокысь да Шойнатыысь том спортсменъясӧс могмӧдісны ӧнія кадся выль эмбурӧн. И медводдза шедӧдӧмторйыс – тренеръяслысь вит быдтасӧс пыртісны Коми Республикаса сборнӧйлӧн резервӧ.
Предприятие отсӧгӧн таво лои дзоньталӧма Одыбын спортзал. Ӧні сійӧ кыпыд, шоныд да став корӧмлы лӧсялана.
Комбинат оз вунӧд и вӧр овмӧсса ветеранъяс йылысь: налы котыртлӧны спортлы да культуралы сиӧм уна сикас ордйысьӧм-гаж, 20 олӧма морт таво шойччасны-ёнмӧдчасны «Монди Сыктывкарса ЛПК»-лӧн санаторий-профилакторийын.
«Коми войтыр» ӧтмунӧмлӧн Кӧрткерӧс районса юкӧнысь нырщик Любовь Кирушева аттьӧаліс компания-ӧс районса коми конференция котыртӧм-нуӧдӧмын отсӧгысь да сикт-грездын олысьяслысь корӧм-вӧзйӧмъяссӧ пыдди пуктӧмысь. Ӧд комбинат оз пӧрӧдчы йӧзыслӧн нэмӧвӧйся вотчанінъясын, звер-пӧтка кыян угоддьӧясын.
–Нимкодь, мый социальнӧя ёртасьӧм кузя сёрнитчӧмсьыс сикт-грездсалы водзӧсыс ыджыд. Сідзкӧ, йӧзыслӧн районын олӧмыс вочасӧн бурмӧ-кокняммӧ, – кывкӧрталіс Кӧрт Айка муӧ ветлӧмсӧ
Марина Королева.