Комиысь ставроссияса Народнӧй фронтын зільысьяс босьтчӧмаӧсь отсавны Сьӧдкыркӧтшын Пихтӧвӧй уличаса 14-ӧд номера керкаын олысьяслы, кодъяс дас квайт во нин кынмӧны асланыс патераясын.
«Лэчкӧ» шедӧмаяс
Тайӧ стрӧйбаас олӧны сотчысь керкаысь петысьяс. 2001 вося жар гожӧмӧ Сьӧдкыркӧтшын ӧтпырйӧ ыпъяліс некымын пу керка. Йӧзыс колисны юр сюянінтӧг. Неминучаӧ веськалысьяслы посёлокын кыпӧдісны кык судтаа уна патераа куим керка. Йӧзӧс сэтчӧ овмӧдісны зэв кыпыда. Чинаяс вундісны гӧрд лента, корлісны регионса СМИ-ын зільысьясӧс. Но ошйысяна стрӧйбаыд (медся ыджыдыс — 16 семьялы Пихтӧвӧй уличаса 14-ӧд номера керка) вӧлӧма шогмытӧм.
—Октябрь 9 лунӧ тыри 16 во, кыдзи ми сэтысь мунім. Миян семья тайӧ «кӧзӧдас» йӧжгылясис сӧ-мын нёль лун. Ставыс кынмис. Весиг батареясӧ ковмис перйыны, мед дзикӧдз оз потлась.
Норасим администрацияӧ. Кыдзи позьӧ овны патераын, кӧні температураыс «нульысь» вылӧ оз кай?! Воліс миянӧ комиссия, кӧні вӧліны чина йӧз, МЧС-ын зільысьяс. Температура мерайтісны, перйӧм батареясӧ снимайтісны, асьныс кӧдзыдысла йӧжгылясисны да бӧр мунісны. Шуисны, виччысьӧй пӧ вочакыв. Воис: овны позьӧ, — висьталӧ Александр Петрович Першенков.
—Джоджсӧ косявлі, шоныдсӧ кутӧм могысь нинӧм абу вӧчлӧмаӧсь. Шлак ваялі, ӧшиньӧдзӧс сюялі, но ставыс весьшӧрӧ. Керкаыс тӧв пож кодь, сідз-тадз вӧчӧмаӧсь да, — водзӧ висьталӧ Александр Петрович. — Керканым кор ӧзйис, нывъясӧй школаын на велӧдчисны. Ӧні быдмисны нин — асьныс кык челядя мамъяс. Дас ӧти во ӧтилаын да мӧдлаын олӧны. А ми гӧтыркӧд йӧршитчим гожся кухняӧ. Стрӧйбаыслы ветымын во, тьӧщасянь кольліс.
Першенковъяслӧн ыджыд семьялӧн (пенсионер гозъя, кык ныв да нёль внук) сідз шусяна пропискаыс Пихтӧвӧй уличаса керкаын. Кӧть и сэні оз овны, коммунальнӧй услугаысь вештысьны быть колӧ.
—Быдӧн тӧдӧ, мый шоныдыс оз во, би счётчик кусӧдӧма, но квитанцияяс ыстӧны. Первой вештыси, сэсся сьӧлышті, мися, чӧрту! Но коммунальнӧй услугаясӧн могмӧдысьяскӧд люкасьны он вермы. Пенсияысь сьӧмсӧ кульыштісны. Кредит на вӧлі мынта да, сёйӧм вылӧ куим сюрс сӧ-мын коли. Весиг машинаӧс арестуйтісны. Важиник «Нива» менам. Со бара воис энергетикъяссянь кабала, кык вося уджйӧзӧй 24 сюрс сайӧ шайт нин.
Ӧтарӧ майшасьӧмысь гӧтырӧй синтӧммыны кутіс. Нывъяс висьмисны жӧ. Ме ӧдва жӧ кутчыся, дзоньвидзалунӧй лигышмуніс. Сэтшӧм «лэчкӧ» шедім, кӧть ӧшӧдчы, — дзикӧдз нин шогӧ усьӧма Александр Петрович.
Весьшӧрӧ тільсьӧм
Тадзи жӧ матӧ воӧмаӧсь и мукӧд олысьыс. Ӧтияс рӧдвуж ордас олӧны, мӧдъяс — патера кӧртымалӧны. А кодсюрӧлы быть «кӧзӧдын» ов, кыдзи, шуам, Першенковъяслӧн суседка Антонина Денисовалы.
—Кодлы некытчӧ муннысӧ, дзикӧдз изӧймитӧмысь обогревательӧн шонтысям. Электрическӧй пачтӧгыс температураыс «минуса». Тӧвнас счётчик сэтшӧма бисӧ гартлӧ, мый тӧлысьнас 11 сюрс шайт колӧ вештыны. Гын сапӧгӧс, шапкаӧс, шоныд свитерӧс да жилетӧс ог и пӧрччыв. Сідзи и узьла, — висьталӧ Антонина Ивановна.
Пихтӧвӧй уличаса «кӧзӧд»-керкаын олысьяс первойсяньыс элясьӧмаӧсь чинаяслы. Весиг ёрдӧ шыӧдчылӧмаӧсь. 2012 вося сентябрын Сыктывкарса ёрд кыскӧма кывкутӧмӧ юркарса администрацияӧс. Экспертизаяс отсӧгӧн эрдӧдӧмаӧсь стрӧитчӧмын вель уна торкалӧм, на лыдын и шоныд сетан система шогмытӧма вӧчӧм. Став нелючкисӧ ёрд тшӧктӧма бырӧдны Сыктывкарса админи-страциялы. Но…
—Весьшӧрӧ тільсим. Карса чинаяс ӧнӧдз нинӧм эз лӧсьӧдны. Бӧръя лача кутам Народнӧй фронтын зільысьяс вылӧ. Гашкӧ, на отсӧгӧн доддьыс вӧрзяс, — надейтчӧны Пихтӧвӧй уличаса керкаын олысьяс.
Сьӧдкыркӧтшсалы отсавны гӧрӧдсӧ разьны, кыдзи пасйылі нин, босьтчисны миян республикаысь «фронтӧвикъяс». «Коми мулы» ОНФ-лӧн регионса штабӧ пырысь, «Жильё и городская среда» уджтасын модератор Валентина Анфилатова висьталіс:
—Мед йӧзыс дас квайт (!) во гегдісны муниципальнӧй керкаын — татшӧмыс эз на вӧвлы! Сыктывкарса чинаяс пикӧ воӧмаяслы «отсасисны» сӧмын кабала вылын: ёрдлӧн шуӧм серти дасьтісны уна сикас документ, урчитісны, мый колӧ вӧчны. Но, кыдзи тыдовтчӧ, мӧдарӧ помӧн жель эз бергӧдны. Ми, Народнӧй фронтын зільысьяс, тайӧс сідз ог кольӧй.
Екатерина МАКАРОВА.
Снимокъясыс ставроссияса Народнӧй фронтлӧн Коми юкӧнысь.