Монди котыр да Россияын WWF (вӧрзьӧдлытӧм вӧр-ва видзан ставмирса фонд) сёрнитчисны збыльмӧдны «Сохраним северного оленя вместе» уджтас. Могыс сылӧн – содтыны тундраын да тайга-вӧрын олысь мевйӧдтӧм кӧр лыдсӧ. Тшӧтш и Комиын, кӧні уджалӧ «Монди Сыктывкарса ЛПК».
Монди зільӧ уджавны вӧр-ва вӧсна тӧждысьӧмӧн, и Россияын WWF фондкӧд ӧтувъя уджтасыс та вылӧ жӧ веськӧдӧма. Монди кӧть и оз запты вӧрсӧ вӧлявывса кӧръяслӧн оланінын, но уджтасыс компаниялы тӧдчана. Ӧд Монди кывкутӧмӧн матыстчӧ вӧр да вӧрын олысьясӧс видзӧм дорӧ оз сӧмын сэні, кӧні уджалӧны сылӧн предприятиеяс, но и мукӧдлаын тшӧтш.
Тайгаын да тундраын олысь мевйӧдтӧм кӧрыс бӧръя кадӧ ёна чинӧма. Россияса ӧткымын регионын найӧс пасйӧмаӧсь весиг «Гӧрд небӧгӧ», дзикӧдз пӧ вермас бырны да.
А кӧр лыдыс чинӧ медвойдӧр морт понда. Морт тшыкӧдӧ налысь йирсянінсӧ, урӧстӧ вӧрсӧ, лыйлӧ-виалӧ пемӧсъяссӧ. Да и туристъяс повзьӧдлӧны вӧля вылын олысь кӧръяссӧ, и налы быть лоӧ вешйыны йӧзысь ылӧджык.
Мондилӧн отсӧгӧн тайӧ уджтассӧ збыльмӧдігӧн Россияын WWF кӧсйӧ туявны, Коми Республикаса кутшӧм местаясын олӧны мевйӧдтӧм кӧръясыс да кытъясті ветлӧны. Тайӧс колӧ тӧдны, медым дорйыны пемӧсъяссӧ браконьеръясысь, а сідзжӧ наысь, кодъяс шызьӧдӧны-повзьӧдлӧны вӧлявывса кӧръяссӧ. Камчаткаын вӧчасны пемӧсъяслысь генетическӧй анализ, медым сэсся йывмӧдны-содтыны кӧр лыдсӧ.
Уджтаслӧн пасӧн лоис Монди компанияӧн вӧчан «Снегурочка» кабалалӧн брендыс.
–Тайӧ брендыс зэв лӧсялӧ проектыслы, – висьталіс «Монди Сэйлз СНГ» компанияса генеральнӧй директор Алексей Шамин. – Роч мойдъясын Лымныв век тӧждысьысь, зіль, дась быдӧнлы отсавны. Миян видзӧдлас серти, мевйӧдтӧм кӧр лыдсӧ содтӧмыс – колана водзмӧстчӧм. И ми отсалам збыльмӧдны тайӧ проектсӧ.
Мевйӧдтӧм кӧръясӧс видзан уджтасыс Монди котырлӧн да WWF-лӧн абу медводдза. Водзынджык найӧ сёрнитчылісны нин кабала вӧчигӧн идӧра вӧдитчыны вӧр-васа озырлунӧн. Уна вын пуктӧны Кардор обласьтын да Коми Республикаын вӧрзьӧдлытӧм на парма-яг видзӧмӧ. Россияса Рытыв-Войвылын татшӧм вӧрыс кольӧма сӧмын тайӧ кык регионас. Сідз, Монди котыр, Россияын WWF да «Эзысь тайга» фонд костын вӧлі кырымалӧма сёрнитчӧм, медым видзны Комиын миллионысь унджык гектар вӧрзьӧдлытӧм парма-яг.
Вӧлявывса кӧръясӧс видзӧм кузя уджтас йылысь паськыдджыка позьӧ тӧдмавны ӧтуввезса www.wwf.ru/snegurochka да www.snegurochka-paper.ru/wwf лист бокъясысь.