Пӧкрӧв лун мӧдісны пасйыны 910-ӧд восянь. Константинопольын олысь йӧз сэки вичкоын кевмысьӧмаӧсь Енлы, медым сійӧ дорйис найӧс варваръясысь. Енэжті кывтысь Богородича-Ен мам пӧрччӧма юр вывсьыс уна рӧмӧн дзирдалысь чышъянсӧ да вевттьӧма сійӧн пӧгибӧ воӧм войтырӧс, мездӧма найӧс вӧрӧгысь.
Роч муын Пӧкрӧв пасйӧны 1164 восянь октябрь 14 лунӧ. Та бӧрын арыс ассьыс вӧжжисӧ сетліс тӧвлы. Кын муыс вевттьысьліс пызьыштӧм кӧч гӧн кодь лымйӧн. Сигӧртсьывліс град йӧрын став удж-нокыс. Гортса пемӧс эз нин лэдзлыны йирсянінӧ. Пансьывлісны арся кӧлысьяс, а нывъяс войпукъяс дырйи гажӧдчисны-печкисны.
Коми муын тайӧ луныс – вӧралысьяслӧн гаж. Найӧ Рӧштвоӧдз петавлісны ылі парма-ягын дзебсьӧм вӧралан керкаясӧ прӧмысла. Кыйлісны дона куа пемӧс да пӧтка. Быдса обряд, уна воӧн чӧжсьӧм традицияяс йитчӧмаӧсь тайӧ сьӧкыд, юр пудъялана нажӧтка перйӧмыскӧд да гортсаӧс тӧвбыд чери-яйӧн номсӧдлӧмкӧд. Тайӧ и вӧралан паськӧм, кыйсян понъяс, кыян-виан кӧлуй, ноддя дорын узьлӧм; дерт жӧ, став притчаыс, мойдыс, нӧдкывйыс, пулы-мулы-валы эскӧмыс да найӧс морт ногсӧн ловзьӧдӧмыс. Зонпосниӧс таӧ велӧдлісны потанас дзуртіг-лайкъялігас на.
Ӧні сиктса важӧн нин татшӧм ногӧн оз нажӧвитчыны, да и парма-ягтӧ кушӧдз чирсісны-бырӧдісны. Но век жӧ талунъя зонкаяслы пӧльяссяньыс вуджӧма-воӧма кыйсян руыс. Сідзкӧ, комилӧн вужйыс пыдын на.
Владимир Шомысов.