Йӧзлысь олӧмсӧ бурмӧдӧмӧн

«ЛУКОЙЛ» ПАО кутас водзӧ отсавны сӧвмыны Коми Республикалы. Октябрь 7 лунӧ Усинскын та йылысь сёрнитчисны регионса юралысь Сергей Гапликов да мусир перъян компанияса президент Вагит Алекперов. Найӧ кырымалісны 2020-2024 воясӧ ёртасьӧм кузя сёрнитчӧм, кӧні урчитӧма Коми Республикалысь экономика да социальнӧй юкӧн сӧвмӧдӧмкӧд йитӧдын мед-шӧр могъяс.

—Воддза воясӧ «ЛУКОЙЛ» компания вичмӧдіс регионлысь экономика да социальнӧй юкӧн сӧвмӧдӧм вылӧ кӧкъямыс миллиард сайӧ шайт. Тайӧ зэв уна. И ӧні ми Вагит Юсуфовичкӧд воим сӧгласӧ, мый налӧн компания кутас водзӧ на вичмӧдны пыр унджык сьӧм. Сёрнитчӧмыс, кодӧс кырымалім талун, сетӧ миянлы позянлун пӧртны олӧмӧ став вынсьӧдӧм уджтассӧ. Ме аттьӧала Вагит Юсуфовичӧс да «ЛУКОЙЛ» компанияӧс сыысь, мый век мунӧны миянлы воча. Талун ми кутам збыльмӧдны ассьыным уджтасъяс найӧс ӧтув видлалӧмӧн да сійӧс тӧд вылӧ босьтӧмӧн, мый шуис вӧчны Россияса президент Владимир Путин миян странаын олысьяслысь нэмсӧ нюжӧдӧм да дзоньвидзалунсӧ ёнмӧдӧм кузя нацпроектъяс весьтӧ, — тӧдчана документсӧ кырымалӧмкӧд йитӧдын висьталіс Сергей Гапликов.

—Ми водзӧ корсям-туялам Коми Республикаын мупытшкӧсса озырлунъяс. Миянлы талун торйӧн нин тӧдчана ӧддзӧдны-сӧвмӧдны тайӧ уджсӧ Ярегаын да такӧд тшӧтш бурмӧдны посёлокас олӧмсӧ — кыпӧдны сэні и выль олан керкаяс, и социальнӧй стрӧйбаяс.

«ЛУКОЙЛ» компаниялы зэв жӧ тӧдчана и Усинск дорын мупытшкӧсса озырлуныс. И мусир туялӧм-перйӧм могысь шуӧма быд во торйӧдны 60 миллиард сайӧ шайт.

Геологъяс туясьӧны и Коми Республикалӧн рытыв-лунвылын. Та вӧсна инвестициясӧ ог мӧдӧй чинтавны. Миян компания кывкутӧ и социальнӧй тӧжд-мог олӧмӧ пӧртӧм вӧсна, да регионса юралысьлӧн индӧд серти шуӧма вӧлі стрӧитны Усинскын медицина шӧрин, олан керкаяс да социальнӧй тӧдчанлуна мукӧд стрӧйба, — пасйис Вагит Алекперов.

Водзӧ ёртасьӧм йылысь выль документ сертиыс компания да республика костын бур йитӧдъясыс нӧш-та на ёнмасны. Шуӧма ӧтув сӧвмӧдны минерально-сырьевӧй база, а сідзжӧ ломтас да энергетика юкӧн. Таысь ӧтдор, ӧтув зільӧмӧн жӧ лӧсьӧдны республикаын олысьяслы «ЛУКОЙЛ» группалӧн предприятие-организацияясын выль уджалан местаяс, отсавны техническӧй вуз-техникумъясысь студентъяслы прӧйдитны практика да сэсся велӧдчӧм помасьӧм бӧрас инасьны удж вылӧ.

И воысь-во компания пыр унджык сьӧм торйӧдӧ регионлысь социальнӧй инфраструктурасӧ выльмӧдӧм-ёнмӧдӧм вылӧ.

2018 восянь «ЛУКОЙЛ» компания заводитіс кыпӧдны гырысь стрӧйбаяссӧ дзик став уджсӧ ас вылас босьтӧмӧн, а такӧд тшӧтш вужвыйӧныс дзоньтавны важъяссӧ. Торйӧн кӧ, 2019 во кежлӧ кырымалӧм сёрнитчӧм серти лои стрӧитӧма Усинскын «Югдӧм» йиа дворечлӧн спорткомплекслысь мӧд корпус, Мутнӧй Материк да Щельябӧж сиктъясын помалӧма сиктса врачебнӧй амбулаторияяс. Ярега посёлокын кыпалӧны уна патераа олан керкаяс да бассейна физкультурно-оздоровительнӧй комплекс, а Чилимдін районса Мӧскашор сиктын — культура керка. Сідзжӧ лоӧ дзоньталӧма Щельяюрын да Вуктылын шӧр школаяс, ньӧбӧма Улыс Одесса 1 номера больничалы бурдӧдчан оборудование.

Октябрь 7 лунӧ жӧ республика- са юралысь Сергей Гапликов да «ЛУКОЙЛ» ПАО-са президент Вагит Алекперов волісны «Югдӧм» йиа дворечлӧн выль корпусӧ, кодӧс лои кыпӧдӧма мусир перъян компания да регион костын социальнӧя ёртасьӧм йылысь сёрнитчӧм серти. Выль стрӧйба вылас, став колана оборудованиесӧ тшӧтш артыштӧмӧн, видзӧма 200 миллион гӧгӧр шайт.

Сергей Гапликов да Вагит Алекперов чолӧмалісны Усинскын олысьясӧс мирса стандартъяслы быд боксянь лӧсялана выль спорткомплекссӧ восьтӧмӧн, кӧні первой судтаас вӧчӧма 188 видзӧдысьлы трибуна ыджыдысь-ыджыд спортзал, а мӧдас вын-эбӧснысӧ кутасны песны вермасьӧм да дзюдо радейтысьяс.

Тані позяс нуӧдны оз сӧмын республикалӧн, но и федеральнӧй тшупӧдын гырысь ордйысьӧмъяс. И, дерт жӧ, дасьтыны енбиа спортсменъясӧс, кодъяс нимӧдасны миянлысь республикаӧс оз сӧмын Россияын, но и мир пасьталаын.

—Тайӧ спорткомплекссӧ восьтӧмыс Усинскын олысьяслы зэв тӧдчана. Сійӧ сетас позянлун ёна унджык йӧзлы нырччыны дзоньвидза оласногӧ да кыпыда видзӧдны аскиа лунӧ, — тӧдчӧдіс Сергей Гапликов. — Миян социальнӧй уджъёртным, «ЛУКОЙЛ» компания, зэв уна вӧчӧ республикалы бурсӧ. И тайӧ спорткомплексыс кыпаліс сылӧн жӧ зільӧмӧн. А талун ми кырымалім водзӧ ёртасьӧм йылысь сёрнитчӧм да босьтім ас выланым зэв тӧдчана выль могъяс. «ЛУКОЙЛ» компаниякӧд миян ӧтувъя зільӧмысь водзӧсыс ыджыд, и тайӧс ті аддзанныд нин.

—Миян компанияӧн кыпӧдӧм быд выль социальнӧй стрӧйба — абу сӧмын республикаӧн веськӧдлысьяскӧд, но и Комиын став олыськӧд ӧтувъя удж, — висьталіс Вагит Алекперов. — Регионын мусир перъян промышленносьт вӧчис ыджыд воськов водзӧ. Дерт жӧ, производство сӧвмӧ-дӧмкӧд тшӧтш збыльмӧдам и социальнӧй тӧдчанлуна могъяс, торйӧн кӧ, кыпӧдам выль олан керкаяс, медицина да спорт шӧринъяс. И зумыда эскам, мый республикакӧд миян топыда ёртасьӧмыс отсалас бурмӧдны регионын йӧзлысь олӧмсӧ.

Снимокъясыс

Александр ГРЫЗЛОВЛӦН.

Йӧзлысь олӧмсӧ бурмӧдӧмӧн

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх