Миян курс: войнаӧн чишкалӧм томлун

Виктор Савин нима драмтеатр ноябрь 13-14 лунъясӧ петкӧдліс 1942 воын ГИТИС-ын коми студия помалысьяслы сиӧм «Наш курс» спектакль.

Кыдзи висьталісны драмтеатрын, спектакльсӧ дасьтӧмаӧсь республикаса юралысьлӧн грант весьтӧ. Пӧшти куим во сы вылын ӧтув уджалӧмаӧсь ГИТИС, драмтеатр, Коми театр котыр (СТД), а сідзжӧ регионса культура да искусство фонд.

Свинеча зэр улын

«Наш курс» спектакль сюрӧсын – збыль олӧм. 1938 воын Комиысь енбиа том йӧз, кодъяс кӧсйӧмаӧсь лоны артистӧн, мунӧмаӧсь велӧдчыны ГИТИС-ӧ.

Москваса театральнӧй вузын тайӧ вӧлӧма медводдза коми студия. Сэтшӧм шуда вӧлӧма кадыс, но заводитчӧма война, и артист-студентъяс веськалӧмаӧсь фронт вылӧ.

Некымын во сайын меным, «Коми му» газетса корреспондентлы, мойвиис сёрнитны коми театрса легенда, СССР-са народнӧй артистка Глафира Сидоровакӧд, коді казьтыліс тайӧ лоӧмторсӧ.

Артистка мукӧдыскӧд тшӧтш дорйӧма фашистъясысь Москва. И таысь сійӧс пасйӧмаӧсь «За оборону Москвы» медальӧн.

И сідз, казьтыштам 1941 вося июнь. Глафира Сидорова лӧсьӧдчӧма мунны гортас гожся каникул вылӧ. Думайтӧма козинъяс нуны гортсаясыслы, кутчысьлыны бать-мамыскӧд, аддзысьлыны ёртъясыскӧд, но…

–Ми сулалім площадь вылын, а репродукторсянь быттьӧ изйӧн юрад вачкалісны: «Война… Вӧрӧгӧс пасьвартам… Вермӧмыс миян сайын!» – казьтыліс Глафира Петровна. – Фашист вӧлі матыстчӧ Москвалань, и ми, театральнӧй институтын велӧдчысьяс, сувтім сылы паныд. Миян отряд веськаліс Смоленск дорӧ. Поездӧн мунігӧн немеч миянӧс некымынысь бомбитіс. Чеччыштам вагонысь да вӧрлань котӧртам, рӧвйӧ уськӧдчам. И кымынӧн колисны сэтчӧ нэм кежлас…

Воим да, овмӧдісны палаткаясӧ. Кодйим окопъяс. А юр весьтті лэбалісны вӧрӧг самолётъяс.

Кор войнаыс помасис, и меным ковмис ворсны сылы сиӧм пьесаын, ӧти артистлӧн оз вӧлі артмы петкӧдлыны немечӧс. И ме сылы вӧзйи виавны йӧзсӧ вашъялігтыр. Ӧд война вылын фашистъясыдлӧн ныр-вомыс збыльысь вӧлі татшӧм: жеръялӧны да лыйлӧны…

Глафира вӧлӧма медся том боечӧн. Налысь отрядсӧ унаысь бомбитӧмаӧсь. Артистка водзӧ казьтыліс:

–Коркӧ сикт помсянь мыччысисны танкъяс. Миянлы коліс саймовтчыны вӧрӧ. Но ӧд сэтчӧдз колӧ на воӧдчыны. Котӧртам. Пуляыс мусӧ гӧрӧ, снарядъяс взрывайтчӧны. И друг енэжын мыччысис самолёт. И заводитіс киссьыны свинеча зэр.

Ме сконъяси да уси, чеччи, бара уси. Кыпӧдчи, котӧртышті гоз-мӧд метр да бара тімбыльтчи турун пиас. Сэні вӧлӧма гуран. Юрӧс сэтчӧ страус моз сюйи. Меным везитіс. Но некор ог вунӧд тайӧ весьӧпӧртана лунсӧ. Медся ёна полім самолётъясысь. Кор найӧ заводитісны лэбны Москвалань, енэжыс оз вӧлі тыдав. Быттьӧ весьтаным сьӧд кымӧр ӧшйис.

Сэсся артист-студентъясӧс эвакуируйтӧмаӧсь. Сотчан Смоленскысь Глафира Сидоровалӧн курсысь ловйӧн воӧмаӧсь вит ныв, мукӧдыс пӧгибнитӧмаӧсь. Коми студияын велӧдчысьясӧс мӧдӧдӧмаӧсь Сыктывкарӧ, медым тані помаласны велӧдчӧмсӧ.

Смоленсксянь Вязьмаӧдз мунӧмаӧсь подӧн. А сэсянь салдатъяскӧд пӧпуттьӧ воӧдчӧмаӧсь Москваӧдз. Гортас ныв мӧдӧдчӧма тӧварнӧй вагонын. Тшыг, омӧлиник паськӧма, ӧдва и воӧма.

Уджалӧмаӧсь сизим драматург

Колӧ пасйыны, драмтеатрлӧн «Наш курс» спектакльыс абу сӧмын Глафира Сидорова, а сійӧ кадся лоӧмтор йылысь. Выль постановкаын казьтылісны Василий Лекановӧс, Николай Турубановӧс, Людмила Коняеваӧс, Дмитрий Кановӧс, Юлия Оботуроваӧс (Трошеваӧс), Нина Поповцеваӧс, Александр Трошевӧс, Александр Цыпановӧс да мукӧдӧс. Кыдзи шуисны театрын, спектакльсӧ сиӧма война би пыр мунӧм артистъяслы, театрлӧн сэк кадся историялы.

Кыдзи пасйи нин, спектакльсӧ дасьтӧмаӧсь пӧшти куим во. Первой ГИТИС-ысь ӧнія студентъяс нималана драматург да педагог Елена Исаевалӧн юрнуӧдӧм улын туялӧмаӧсь архив, чукӧртӧмаӧсь сэкся курс йылысь гижӧд-снимок, а сэсся пуксьӧмаӧсь гижны пьеса. Уджалӧмаӧсь сизим драматург.

–Кыдзи ладмӧдчинныд ӧта-мӧд костад, вензинныд пьеса гижиганыд? – юалі драматург Михаил Поляковлысь.

–Дерт, эз вӧв кокни ставсӧ сигӧртны ӧтилаӧ. Унатор на эз пыр пьесаӧ, дженьдӧдім да. Мыйджык пыртны, а мый киритны, бӧръя кывйыс, кыдз шуласны, вӧлі миян педагог сайын. Спектакльын уна збыльыс, но эм и мӧвпыштӧмыс. Ӧд ми ӧні ог вермӧ стӧча тӧдны сэкся студентъяслысь ӧта-мӧд кост сёрнисӧ, архивын та йылысь нинӧм абу. Драмтеар миянлы отсаліс жӧ геройлысь образъяссӧ дасьтыны, налысь сёрнитанногсӧ петкӧдлыны. Шуам, артистъяслӧн, коми сиктысь петӧмаяслӧн, кодсюрӧлӧн вӧлӧма сідз шусяна вына коми акцент. Тайӧс миянлы висьталіс драмтеатрын ворсысь Галина Аркадьевна Микова, кодлы мойвиӧма на накӧд петкӧдчыны ӧти сцена вылын, – вочавидзис Михаил Поляков.

Ловъя свидетельяс

Спектакль помын сцена вылӧ петӧны Галина Микова да Виктор Градов. Найӧ ворсӧны асьнысӧ, казьтылӧны сійӧ кадся артистъясӧс. Режиссёрлӧн мӧвп серти найӧ быттьӧ сэк кадся свидетельяс.

–Меным окота лоис петкӧдны найӧс сцена вылӧ, чайта, тайӧ лӧсялӧ, – пасйис ГИТИС помалысь, режиссёр Владимир Жуков. – Сідзжӧ меным век зэв интереснӧ туявны важсӧ. Чайта, буретш ӧнія кадӧ зэв тӧдчана казьтывны найӧс, кодъяс веськалісны свинеча шер улӧ, и коді кыдз матыстіс Победа.

Война да муслун

Сідзжӧ режиссёр пасйис, мый спектакльын ыджыдджык ин босьтӧны кык ань. Тайӧ Глафира Сидорова (ворсіс Алёна Кустышева (Доронина) да Наталья Качуевская (ворсіс Алёна Кибалина). Глафира Сидоровалы кӧ Енмыс сетӧма кузь олӧм, пӧшти 70 во ворсіс драмтеатрын, Наталья Качуевская вӧлӧма дженьыдджык нэма. Тайӧ кык ань пыр спектакльын петкӧдлӧма и ныла-зонма костын муслун.

Глафира Петровна, казьтыштам, висьтавліс, мый велӧдчигас тӧдмасьӧма верӧспукӧд – Николай Николаевич Турубановкӧд (Коми АССР-са народнӧй артист). Спектакльын сійӧс ворсӧны Артём Лазарев да Илья Кустышев. Наталья Качуевская жӧ абу вӧлӧма Комиысь, но велӧдчӧмаӧсь Глафира Сидоровакӧд ӧтлаын. Война кадӧ сійӧ мунӧма фронт вылӧ медсестраӧн, дӧзьӧритӧма госпитальын Павел Качуевскийӧс (ворсіс Дмитрий Максименко), код сайӧ петӧма верӧс сайӧ. Война кадӧ муслуныс торйӧн нин ёна вӧрзьӧдӧ видзӧдысьӧс. Да и залын пукалысьясысь ӧдвакӧ кодкӧ вермис кутны синвасӧ спектакль видзӧдігӧн.

Кодлы тайӧ колӧ

–Ёна-ӧ сьӧкыд вӧлі пырӧдчыны Глафира Петровналӧн куас? – юалі коми театрса легендаӧс ворсысь Алёна Кустышевалысь.

–Тайӧ спектакльыс абу дзик сы йылысь да, эг эськӧ шу, мый сылӧн куас пырӧдчи. Да и мукӧд уджъёртлӧн эз жӧ вӧв татшӧм могыс. Ми петкӧдлім, кыдзи артист-студентъяс веськалісны фронт вылӧ. Ми ветлім тшӧтш музейӧ, лыддьысим, видзӧдалім снимокъяс, медым тӧдны, кыдзи тайӧ вӧлі. Арлыдаджык уджъёртъяслысь, кодъяс ворслісны накӧд ӧтлаын, дерт, юасим жӧ, кыдзи найӧ асьнысӧ кутісны, этшнысӧ тӧдмалім. И, кыдзи меным висьталісны, Глафира Петровна пӧ вӧлі зэв яръюгыд, позьӧ шуны, би ньӧв кодь артистка. Но некод оз помнит, кутшӧм сійӧ вӧлӧма дзолядырйиыс. Спектакльын сылы 18 арӧс, сиктысь петӧм ныв. Ме ог вермы шуны, мый миянлы ставнымлы дзик стӧча лӧсялӧ налӧн этшыс, но, кыдзи кужим, вермим петкӧдлыны.

–Алёна, тэнад видзӧдӧм серти, колӧ оз татшӧм спектакльыс театрлы, видзӧдысьлы, лоӧ налы тайӧ интереснӧ?

–Чайта, колӧ. Сы вӧсна мый йӧзыслы колӧ тӧдны, мыйсянь заводитчӧ Рӧдина, миян театр, кодъяссянь да кутшӧмӧсь найӧ вӧліны. Весиг ме, тшӧтш сиктса ныв, колледжын велӧдчигӧн да театрӧ локтігӧн, ёнасӧ эг тӧд на йылысь. И тані уджалігӧн нин вочасӧн ӧтилысь-мӧдлысь кывлі на йылысь, заводиті тӧдмасьны театр историяӧн.

Петкӧдласны сиктын

Виктор Савин нима драмтеатрӧн веськӧдлысь Михаил Матвеев пасйис, мый «Наш курс» спектакльсӧ петкӧдласны и сиктъясын, кытысь вӧлӧмаӧсь воддза артистъясыс. И та могысь пӧ спектакльса художник Макар Максимовлы, коді тшӧтш ГИТИС помалӧма, ковмас на уджыштны сы вылын, кыдзи петкӧдлыны спектакльсӧ сиктса клубын. Ӧні декорацияыс бергалӧ сцена шӧрас, артистъяс вӧдитчӧны и сценаувса гуӧн. Гӧгӧрвоана, сиктъясын, дерт, техника боксянь татшӧм позянлуныс абу.

* * *

Коді эз вермы волыны премьера вылӧ, «Наш курслӧн» матысса петкӧдчӧмыс лоӧ декабрь 12 лунӧ.

<> Екатерина Макарова. Снимокъясыс Виктор Савин нима драмтеатрысь.

Миян курс: войнаӧн чишкалӧм томлун

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх