Меным тӧдмӧн, республикаын бӧръяысь дзик выль детсадтӧ восьтылісны во вит сайын – юркарса «Орбита» микрорайонын 220 зонпоснилы 225 миллион шайта «Родничок».
И со неважӧн кывсис, мый Емдін районса Айкатылаын бара на кыпыда восьтӧмаӧсь… Но абу нин детсад, а сэтысь… квайт выль ӧшинь да дас кык балкон ӧдзӧс. Да ӧд абу, кыдз шуласны, сьӧдас гажтӧ вӧчӧмаӧсь, а кыдзи и колӧ: гӧрд лента вундӧмӧн, ыджыд чинаяслӧн чолӧмалӧм-бурсиӧмӧн…
А таӧдз неуна водзджык тайӧ жӧ районас, сӧмын Кӧжмудор сиктын нин, восьтӧмаӧсь больничалань мунан 250 метр кузьта туйтор. Ӧні пӧ висьысьясыдлы оз нин ков важ мозыс кытшолӧн ветлӧдлыны, а позьӧ веськыда мунны дзоньвидзалуныдла кӧть туплиӧн.
Туйкостлӧн доныс сувтӧма 344 сюрс шайт, кытысь 300 сюрссӧ вичмӧдӧма республикаса бюджет, 34 сюрсыс – сиктса администрациялӧн сьӧмкудйысь, 5 сюрссӧ сетӧмаӧсь ас вылӧ уджалысьяс да нӧшта та мында жӧ чукӧртӧмаӧсь олысьясыс.
Нӧшта кӧ водзӧ нуӧдны «кыпыда восьтӧмъяс» йылысь сёрнисӧ, позьӧ казьтыштны Чилимдін районса Новый Бор посёлокын кольӧм во ӧзтӧм светофор.
Кодкӧ, гашкӧ, помнитӧ на и, кыдзи нёль во сайын Кӧрткерӧс шӧрын гӧрд лента вундісны выль остановка восьтігӧн, кодӧс вӧлі вӧчӧмаӧсь сӧмын ӧти бетон плитаысь. Да и сійӧс регыд ковмӧма бӧр идравны-нуны, сувтланінсӧ абу сӧгласуйтӧмаӧсь дорожникъяскӧд да…
Мый татчӧ шуан… Кор ыджыд стройка вылӧ сьӧмыд оз тырмы, дерт, ковмӧ и ичӧтнас миритчыны. Сӧмын меным ӧтитор абу гӧгӧрвоана: ставсӧ кӧ тайӧс вӧчӧма прӧстӧй йӧзлӧн водзмӧстчӧмӧн да сідз шусяна «Народнӧй бюджет» весьтӧ, мыйла сэн и тан мыччасьӧны чинаяс, кодъяс асланыс зептысь татшӧмтор вылас ни ӧти ур оз вичмӧдны, ни унджыкысьсӧ весиг оз тӧдны, мый збыльвылас колӧ сикт-карын олысьлы?! Кыдз шуласны, быд кай кок вильӧданінысь найӧс позьӧ казявны, быттьӧ налӧн пӧсь кисьтӧмӧн став тайӧ бурторйыс и вӧчсьӧ.
Завод-фабрикатӧ ли ГЭС-тӧ миян ва-а-ажӧн нин некӧн оз лэптыны да, чинаыдлы кольӧ татшӧм ӧшинь-ӧдзӧс восьтӧминас и волывлыны. Век нин эм помка кӧть тадзи йӧз водзас асьнысӧ петкӧдлыны…
Анжелика Елфимова.