Октябрь 10 лунӧ Коми Республикаса войтырлӧн Ёртасян керкаын муніс асшӧр композитор Александр Уляшевлӧн коми сьыланкывъяса рыт. Сиим сійӧс авторлы 70 арӧс да «Юрган» ансамбльлы 55 во тырӧмлы.
Гажӧдчыны воліс 200 сайӧ морт. Улӧс ни лабич эз тырмы.
Сцена вылын петкӧдчис нӧшта 42 морт. Александр Егоровичлысь сьыланкывъяс сьӧлӧмсянь ливкйӧдлісны «Эжва йӧлӧга» хор, «Олан гаж», «Томлун» да «Войтъяс» ансамбльяс, Коми Республикаса народнӧй артистка Лидия Логинова да республикаса культураын заслуженнӧй уджалысь Наталья Канова, регионса шылада-драмаа театрысь Александр Канев да Ангелина Смирнова, Кулӧмдінса землячествоысь солистъяс, сьывны радейтысьяс Мария Мараева, Елена Уляшева, Екатерина Мишарина, Олег Лажанев, Ольга Рогожникова да Татьяна Осипова.
Кывбур радейтысь-землякъяс Мария Кузьбожева, Диана Холопова, Хелли Кокко, Михаил Игнатов да Виктор Кутькин лыддисны Александр Уляшевлысь радейтана мича кывбуръяс. Ачыс авторыс тшӧтш жӧ юксис видзӧдысьяскӧд шмонитана да мӧвпалана кывбуръясӧн, олӧмысь серамбана да сьӧлӧмӧ йиджана казьтылӧмъясӧн, висьтыштіс творчество йывсьыс, «Юрган» ансамбль артмӧм да удж йылысь.
«Коми войтыр» ӧтмунӧмӧн веськӧдлысь Олег Лажанев вичмӧдіс Александр Егоровичлы почёт грамота да неыджыд козин. Видзӧдысьяс тшӧтш вӧлі локтӧмаӧсь дзоридз-козинӧн.
Пӧся аттьӧала Кулӧмдінса землячествоын водзмӧстчысьясӧс рытсӧ дасьтӧмын ыджыд отсӧгысь. Торйӧн тӧдчӧда Евгений Уляшевӧс, Дмитрий Напалковӧс, Олег Лажаневӧс, Марина Лопыреваӧс, Мария Мараеваӧс, Михаил Игнатовӧс, Виктор Кутькинӧс, Мария Уляшеваӧс, Ёртасян керкаын уджалысьясӧс. Содтӧд шуа аттьӧ Кулӧмдінса администрациялы автобус сетӧмысь, став видзӧдысьлы – кекӧначалӧмысь!
Гажыс ставнас муніс комиӧн. Паськыдджыка юӧрнас позяс тӧдмасьны «Коми гор» радио да «Юрган» телеканал уджтасъясысь.
Рытсӧ дасьтісны Сыктывкарын «Кулӧмдінса войтыр» землячество да «Коми войтыр» ӧтмунӧм. Нуӧдіс гажсӧ землячествоӧн веськӧдлысь Ольга Рогожникова.
<> Ольга Рогожникова. Снимокъясыс ӧтуввезйын «Эжвайывса войтыр» котырысь.