Ставнымӧс арталасны

Во мысти Россияын заводитчас перепись. Йӧзӧс арталасны-гижасны 2020 вося октябрь 1-31 лунъясӧ. Комистатын пресс-конференция дырйи юӧртісны журналистъяслы, кыдзи кутас мунны та кузя уджыс.

Пасъям, миян странаын переписьсӧ нуӧдӧны оз нин медводдзаысь. Бӧръяысьсӧ артасисны-гижасисны 2010 воын. Бӧръя воясӧ, дерт, унатор вежсис. Йӧзыс вуджӧны овны-уджавны мӧд регионъясӧ, сиктсаяслӧн лыдыс чинӧ, олысьыс пӧрысьмӧ. Та йылысь стӧчджык кывкӧртӧд вӧчны отсалас буретш перепись.

Кыдзи висьталіс Комистатӧн веськӧдлысь Марина Кудинова, локтан воын гижасьӧмыс мунас выль ног. Быд морт вермас ас йывсьыс висьтасьны Госуслуга порталын («Пройти перепись населения»), а сідзжӧ воласны гортӧдзыд. Комиын мӧвпалӧны медавны 1.500 мортӧс. Кызвынсӧ том йӧзӧс, сы вӧсна мый ӧтуввезйын найӧ писькӧсджыкӧсь. Быдӧнкӧд кырымаласны сёрнитчӧм, удждонсӧ мынтасны 15 сюрс гӧгӧр шайт.

—Ставроссияса переписьыс пансьӧ октябрь 1 лунӧ, но сы кежлӧ дасьтысян уджыс заводитчис нин. Ылі сикт-грездӧ переписчикъяс мӧдӧдчасны водзджык, апрель 1 лунсянь. Да и уджыс сэні нюжалас декабрь 20 лунӧдз. Комиын татшӧмыс 15 муниципалитетын 130 овмӧдчанін, — юӧртіс Марина Кудинова.

Сылӧн кывъяс серти, овлӧ пӧ, йӧзыс оз лэдзны переписчикӧс гортас. Та вӧсна шуӧма котыртны торъя пунктъяс МФЦ-ын, администрацияын, культура керкаын. Но мед пӧ стрӧйбасӧ бура дӧзьӧритӧны. Ӧд юасьӧмыс гуся (конфиденциальнӧй) да мед юӧрыс некытчӧ оз пет.

Сідзжӧ Комистатын пасйисны, мый налӧн уджалысьяслӧн лоӧ удостоверение, торъя паса паськӧм, шапка, сумка да планшет. А йӧзлысь найӧ некутшӧм документ оз кутны корны (ни паспорт, ни керка либӧ патера вылӧ документ, ни удждон йылысь юӧр). Юаласны арлыд, национальносьт, образование, кӧні уджалан… Ставыс 23 юалӧм. И ӧтувъя базаын лоӧ сӧмын арталан номерныд, а оз ним-вичныд.

Комистатын зільысьяс сідзжӧ сёрнитчӧны МВД-сакӧд. Погона йӧз отсӧгӧн кутасны артавны омӧль оласногаясӧс. Переписчикъяслы лӧсьӧдасны и неминучаысь видзан торъя страховка. Овлӧ пӧ, и шӧйтысь понъяс на вылӧ уськӧдчылӧны.

—Дерт, ставроссияса переписьӧ пырӧдчӧмыс — ас кӧсйӧм серти. Воддза артасьӧм дырйи нёль прӧчентыс эз кӧсйысьны юӧртны ас йывсьыс нинӧм. Татшӧмъяссӧ тшӧтш арталісны, сӧмын стӧч юӧрыс на йылысь абу.

Тайӧ уджыс колана. Переписьыд — стӧч статистика. Сы вылӧ подуласьӧмӧн чина йӧз мӧвпалӧны, колӧ оз кыпӧдны сійӧ либӧ мӧд сикт-карын больнича, школа, вузасянін, дасьтыны оланпасъяс, сідзкӧ, быть колӧ ставлы пырӧдчыны, — шыӧдчис республикаса олысьяс дорӧ Марина Кудинова.

Ставроссияса переписьлӧн медводдза серпасыс тыдовтчас 2020 вося декабрын. А Росстат медводдза кывкӧртӧдсӧ вӧчас 2021 вося февральын, уджсӧ сигӧртасны 2021-2022 воясӧ.

Екатерина МАКАРОВА.

Ставнымӧс арталасны

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх