Комиын олысьяс асланыс тӧжд-могӧн юксисны республикаса юралысь Ростислав Гольдштейнкӧд сыкӧд син на син аддзысьлігӧн.
Емваысь ань корис вайӧдны пӧрадокӧ Дзержинский уличаса Паметь сквер.
–Сэні лабичьясыс важмӧмаӧсь нин, ӧткымын жугалӧма – колӧ вежны, – шыӧдчис сійӧ юралысь дорӧ.
–Бур, мый кыпӧдінныд Емваын олысьясӧс майшӧдлан тӧждъяс. Карыс зэв мича, но сійӧс колӧ пелькӧдыштны. Казьтышта, Сыктывкарын эм производство, кӧні вӧчӧны сідз шусяна ичӧт архитектураа формаяс. И вӧчӧны тырмымӧн, медым позис могмӧдны республикаса став кар-ра-йонсӧ. И мый зэв тӧдчана – ас регионын вӧчӧмыс бокысь вайӧм дорысь ёна донтӧмджык. Бюджетысь быд шайт ӧд колӧ видзны ыджыд водзӧсӧн, – висьталіс Ростислав Гольдштейн.
Княжпогост районса веськӧдлысь Анатолий Немчинов юӧртіс, мый таво ичӧт архитектураа формаяссӧ сувтӧдасны Емваса Мечников, Коммунистическӧй, Первомайскӧй да Победалы 30 во нима уличаяс бокӧ да тшӧтш и Паметь скверӧ.
Ростислав Гольдштейн юаліс сылысь, мый нин вӧчӧма ва дасьтан станция выльмӧдӧм могысь.
Районӧн веськӧдлысь вочавидзис, ӧні пӧ сэні оборудование сувтӧдӧны, и гожӧм помӧдз ставсӧ лоӧ вӧчӧма.
Кӧрткерӧс районса Висерысь нывбаба элясис, сикт шӧрын туйыс пӧ шогмытӧм.
Ростислав Гольдштейн тшӧктіс муниципалитетӧн веськӧдлысь Константин Сажинлы гожӧмнас дзоньтавны туйсӧ.
Сыктывдін районса Выльгортын 1-ӧд номера шӧр школа кыпӧдлӧмаӧсь 1968 воын, и велӧдысьяс да сэні велӧдчысь ныв-зонлӧн бать-мам корисны капитальнӧя дзоньтавны сійӧс. Уджсӧ панасны таво арнас да эштӧдасны 2027 во помын.
Сыктывкарын олысь шыӧдчис, медым И.А.Куратов нима педколледж дорын Октябрь шӧртуй вылын подаяслы вуджанінсӧ югзьӧдасны торъя оборудованиеӧн, кыдзи уналаын нин вӧчӧмаӧсь.
Ростислав Гольдштейн тшӧктіс юркарса администрациялы во помӧдз лӧсьӧдны такӧд йитӧдын став коланасӧ.
2025 вося декабрӧдз Сыктывкарын да Ухтаын вӧлі тадзи югзьӧдӧма 501 татшӧм вуджанін, и та бӧрын неминучаыс юркарын чинӧма комын, а Ухтаын ветымын прӧчент.
<> Гижӧдсӧ дасьтiс Павел Симпелев. Снимокъясыс ӧтуввезйысь.