Кӧрткерӧс районысь Зулӧб грездса клубын збыльмӧдӧны «Важ сундукысь мойд» уджтас, кодӧс сиӧмаӧсь Комиын Сикт волы.
Кыдзи висьталіс грездса клубӧн веськӧдлысь Нина Макарова, уджтасыскӧд йитӧдын июнь-июльын челядь да верстьӧ вермасны тӧдмасьны важ пӧлӧс аканьясӧн, аслыныс вӧчны татшӧмсӧ да, дерт, и ворсыштны. А сідзжӧ позяс пыравны Зулӧбса клубын жӧ восьтӧм «Акань музейӧ», видзӧдны сэтчӧс акань театрын «Репка» мойд. Клубса гӧсьтъясӧс ыззьӧдасны пырӧдчыны и пӧль-пӧчлӧн «Ручеёк», «Гори-гори ясно» да «Колечко» ворсӧмъясӧ, велӧдасны паньӧн ворсны йӧзкостса шылад.
«В гостях у старины» лунӧ (стӧчмӧда, уджтассӧ збыльмӧдӧм могысь аддзысьлӧмъясыс лоасны быд вӧскресенньӧӧ) Нина Макарова тӧдмӧдас гӧсьтъясӧс пӧль-пӧч эмбурӧн, кодӧс сійӧ чукӧртӧма жӧ клубӧ. Та могысь сэні воссяс выль экспозиция.
«Важ сундукысь мойд» уджтассӧ сигӧртасны «Праздник старого сундука» гажӧн. Волысьяскӧд ӧтув вӧчасны кывкӧртӧд: висьталасны, коді мыйӧ велаліс, йӧктасны хороводӧн. Коді волас став аддзысьлӧм вылас либӧ медся унаысь, сылы вичмас козин.
–Ме ог вермы весь овны, окота йӧзӧс гажӧдӧм могысь пыр мыйкӧ выльтор думыштны. Тадзитӧ и аслым тшӧтш гажаджык, – шуӧ Нина Станиславовна. – «Важ сундукысь мойд» уджтас йӧзыс ошкисны жӧ, волісны нин и ас грездса, и весиг Сыктывкарын олысьяс, кывлӧмаӧсь да. Таысь, дерт, нимкодь, ог весьшӧрӧ тільсьы да. Чайта, збыльысь интереснӧ и бать-мамлы, и челядьлы мыйкӧ ӧтув вӧчны-видзӧдны.
–Акань вӧчӧмысь ни мойд видзӧдӧмысь оз ков вештысьны?
–Мынтысьны оз ков. Тӧвнас дасьті уджтассӧ, районын ошкисны да вичмӧдісны збыльмӧдӧм вылас сьӧм. Став коланаторсӧ – дӧра, краска, кабала – сы вылӧ ньӧба. Уджтаскӧд йитӧдын жӧ снимайта видео, кыдзи вӧчны дӧра акань.
–Велӧданныд и паньӧн ворсны, а акань театрын кодъяс артистъясыс?
–Зулӧбсаяс. Паньӧн уна концерт вылын нин ворсім, тӧдӧны район пасьталаын, юркарӧ корлывлӧны. Акань театр тшӧтш восьті, ачым уна вурся да. Но и музей эм. Зэв интереснӧ, кор ловзьӧ аканьыс.
«Важ сундукысь мойд» уджтасыс эз на помась. Медводдза лунӧ сэтчӧ пырӧдчысьясӧс Нина Макарова тӧдмӧдӧма йӧзкостса аканьясӧн, накӧд йитчӧм традицияясӧн да обычайясӧн, мыйла найӧс вӧчлӧмаӧсь да кыдзи.
Киподтуя ань тӧдмӧдӧма волысьясӧс акань-видзӧгӧн, кутшӧм сылӧн тӧдчанлуныс вӧлӧма. Сэсся нуӧдӧма мастер-класс, ставӧн вӧчӧмаӧсь «Кубышка-Травница» акань, кодлы пытшкӧсас пуктӧмаӧсь чӧскыд кӧра турун.
Мӧд аддзысьлӧм дырйи йӧзӧс тӧдмӧдӧмаӧсь роч йӧзкостса аканьясӧн, кодъясӧн абу сӧмын ворслӧмаӧсь, а вӧлӧмаӧсь найӧ отсасьысьӧн. А сэсся мастер-класс дырйи быдӧн вӧчӧма аслыс «Андел» акань.
–Миян челядь чайтӧны, да и асьным, верстьӧ, сідз жӧ, мый аканьӧн сӧмын ворсӧны, а вӧлӧмкӧ, мыйта сикас. Торъялӧма и ворсанаыс, и обрядаыс (вӧдитчылӧмаӧсь йӧзкостса ыджыд гаж да тӧдчана лоӧмторъяс дырйи), видзӧг-аканьяс вӧлӧмаӧсь быд семьяын. Найӧ видзӧмаӧсь и неминучаысь, и висьӧмысь, и вомидзысь. Зэв интереснӧ ставсӧ тайӧс тӧдмавны, – висьталӧ Наталья Игушева.
Коймӧд аддзысьлӧм дырйи Зулӧб клубын ловзьӧма мойд. Акань театрысь самодеятельнӧй артистъяс петкӧдлӧмаӧсь «Репка».
Кыдзи пасйи нин, «Важ сундукысь мойд» уджтас мунас июль помӧдз. Коді эз на слӧймы, быть ветлӧй Зулӧбса клубӧ.
Ичӧт коми грездын Нина Макарова зільӧ вӧчны сиктса йӧзлысь олӧмсӧ гажаджыкӧн. Шуам, быд выльлунӧ 12 часын позьӧ видзӧдны кино. И бара жӧ дон вештытӧг. Кӧрткерӧс районса администрация козьналӧма проектор да экран.
–Зэв нимкодь, мый миян грездын ӧні эм позянлун паськыд экран вылын видзӧдны челядьлы и верстьӧлы кино. Петкӧдлі нин «По щучьему велению», «Чебурашка 2» да ӧтуввезйысь босьтӧм мукӧд фильм. «Коми кино» тшӧтш могмӧдӧ миянӧс фильмъясӧн. Волӧй миян клубӧ, миянкӧд гажа, – сьӧлӧмсяньыс корӧ йӧзӧс клубса кӧзяйка, енбиа коми ань Нина Станиславовна.
<> Екатерина Макарова. Снимокъясыс Нина Макаровалӧн.