Май 29-31 лунъясӧ Сыктывкарын Виктор Савин нима драмтеатрын петкӧдчис Санкт-Петербургысь «ДРАМ.ПЛОЩАДКА» государственнӧй театр. Том котырлӧн Комиӧ волӧмыс артмис «Большие гастроли» федеральнӧй уджтас весьтӧ.
Кыдзи висьталіс журналистъяскӧд аддзысьлігӧн «ДРАМ.ПЛОЩАДКА» театрӧн веськӧдлысь Татьяна Сафонова, Россияын найӧ – медся том театр, котыртчӧмаӧсь 2022 воын. Медводз вӧлӧма асшӧр, а сэсся енбиа котырӧс государство босьтӧма ас борд улӧ.
Театрӧн художествоа веськӧдлысьыс Россияса заслуженнӧй артист Сергей Бызгу чукӧртӧма труппаас Россияса государственнӧй институтын велӧдчысьясӧс. Репертуараныс сӧмын на дас вит спектакль, но зэв аслыспӧлӧсӧсь да яръюгыдӧсь. Жанр сертиыс уна сикас жӧ: вербатим, мойд, драма, трагифарс, шмонь да весиг циркын моз петкӧдчӧм. Дерт, сэсся жанръясысь татшӧм калейдоскоптӧ интереснӧ видзӧдны и челядьлы, и верстьӧлы, и олӧмалы.
«ДРАМ.ПЛОЩАДКА» дзик на медводдзаысь гастролируйтӧ. И зэв нимкодь, мый волісны буретш Сыктывкарӧ. Сы вӧсна мый татшӧм куим яръюгыд рытсӧ миян карса олысь важӧн виччысис.
–Кор бӧрйим, кутшӧм постановкаяс вайны, мӧвпыштім, мый быть колӧ классика, – висьталӧ Татьяна Витальевна. – И зэв нимкодь, мый «Росконцерт» эскис миянлы да сетіс татшӧм позянлунсӧ. Сыктывкарын миянӧс вочаалісны зэв бура. Гашкӧ, артмас кӧ, нӧшта на волам.
Медводдза рытӧ сыктывкарсалы петкӧдлісны Владимир Набоковлӧн «Камера обскура» роман серти спектакль. Режиссёрыс Сергей Бызгу. Кыдзи пасйисны гӧсьтъяс, буретш тайӧ постановкасянь пансьӧма театрныс.
Премьераыс вӧлӧма 2014 вося октябрын. Санкт-Петербургын олысьлы, кыдзи висьталӧны, ёна кажитчӧ. Да и сыктывкарсалы воис сьӧлӧм вылас. Спектакльыс муніс куим часысь дырджык, но видзӧдсис зэв кокньыда. Тані пайыс, дерт, и режиссёрлӧн, и артистъяслӧн. Спектакль водзын Галина Бызгу (режиссёр, Сергей Бызгулӧн гӧтыр) висьталіс, мый Набоковлысь тайӧ романсӧ сійӧ сетӧма верӧсыслы лыддьыны студенталан кадас на, и сэксянь мӧвпалӧмаӧсь дасьтыны сы серти спектакль.
Кыдзи ачыс Сергей Бызгу пасйӧ, Набоковлӧн романас сійӧс крукыштӧма кык визь. Медводдзаыс «мусаник лёктор», коді кыскӧ мортӧс адӧ да пузувтӧ сылысь олӧмсӧ. А мӧдыс – семьякостса рыж олӧм. И тайӧ кык темаыс, збыльвылас кӧ, некор оз нитшсявны.
Стас Шапкин зэв бура ворсіс гӧтыра мужичӧйӧс (Кречмар), кодӧс семьясьыс нетшыштіс «томиник да мусаник стерво» Магда (ворсіс Анастасия Филиппова). Нӧшта ӧти яръюгыдсьыс-яръюгыд персонаж, гашкӧ, чӧрт, конферансье Александр Дробитько ворсіс. Содтӧд колӧ пасйыны, мый сійӧ эз сӧмын мастера ворс тайӧ спектакляс, но и гижӧма сылы ставнас шыладсӧ.
«ДРАМ.ПЛОЩАДКАлӧн» мӧд козин – Антон Чеховлӧн «Три сестры» пьеса серти «Брат Андрей» спектакль. Режиссёрыс Дмитрий Крестьянкин. Генерал Прозоровлысь семьясӧ петкӧдлӧма куим чойлӧн вок Андрей Сергеевичлӧн видзӧдлас пыр. Крестьянкинлӧн постановкаыс, кӧть и кыпӧдӧ Чеховлысь юалӧмъяс, петкӧдлӧ шудтӧм семья, абу гажтӧм. Томуловӧс татшӧмсьыс оз кут вугрӧдлыны. Да и верстьӧлы тшӧтш интереснӧ дзик выль ног видзӧдлыны классика вылӧ.
Кыдзи ачыс режиссёрыс пасйис, сылы окота лоӧма петкӧдны Андрейӧс шӧрас. Куим чой ставныс гӧгралӧны, а вок вылас быттьӧ оз и видзӧдны. И колӧ шуны, Крестьянкинлӧн творчество экспериментыс артмӧма зэв аслыспӧлӧс да яръюгыд.
Сигӧртісны гастрольсӧ Антон Чеховлӧн «Медведь» да «Предложение» водевильяс серти «Летние комедии» спектакль-шмоньӧн. Режиссёрыс Галина Бызгу.
Сюрӧс сертиыс «Медведь» да «Предложение», дерт, оз йитчыны, но театръяс век йитӧны найӧс. Некымын ногӧн нин петкӧдлісны сыктывкарсалы воддза воясӧ мукӧд регионысь гастрольӧ волігӧн. Комиысь Воркутаса Б.Мордвинов нима драмтеатрлӧн репертуарын эм, Коми Республикаса вужвойтырлӧн шылада-драма театрын дасьтӧмаӧсь весиг комиӧн. И спекталь водзын думайтсьӧ: но кыдзи нӧшта позьӧ сійӧс петкӧдлыны? Позьӧ вӧлӧм! Залыс потіс серамысла «ДРАМ.ПЛОЩАДКА» театрысь артистъяслӧн ворсӧмысь. Сюрӧссӧ, дерт, ог кут висьтавны, ставныс тӧдӧны да. Но кыдзи ворсісны-петкӧдлісны геройяссӧ артистъяс – браво!
* * *
Кыдзи пасйи нин, Санкт-Петербургысь «ДРАМ.ПЛОЩАДКАлӧн» Сыктывкарӧ волӧмыс артмис «Большие гастроли» федеральнӧй уджтас весьтӧ. А сідзкӧ, и миян томуловлӧн театр ветлас на ордӧ. Михаил Матвеевлӧн кывъяс серти, лоӧ тайӧ октябрын. Петкӧдласны «СКТВКР», «Довлатов. Роман особого назначения» да «Долина нашей памяти» спектакльяс.
<> Екатерина Макарова. Снимокъясыс Юлия Леготиналӧн.