Тӧрыт Коми Республикаса опера да балет театрысь солист Борис Калашниковлӧн вӧлі бенефис, кодӧс сиис аслас чужан лунлы.
45 арӧссӧ енбиа артист пасйис Гаэтано Доницеттилӧн «Любовный напиток» операӧн (режиссёрыс Илья Можайский).
Борис Калашников помалӧма Санкт-Петербургса консерватория, стажируйтчӧма Италияса Пезеро карын Альберто Дзедды маэстро да Валенсияын Пласидо Доминго дорын.
Енбиа тенор петкӧдчылӧма Польшаын, Германияын, Великобританияын, Францияын, Китайын войтыркостса фестивальясын да гастрольясын. Уджавлӧма Россияса нималана театръясын, стӧчджыка кӧ пасйыны, тайӧ Мордовияса, Карелияса, а сідзжӧ Санкт-Петербургса челядьлӧн «Зазеркалье» шылада театръясын. 2015 восянь служитӧ миян республикаса опера да балет театрын.
Борис Калашниковлӧн творчество кудйын кызь опера партия, а сідзжӧ опереттаын, мюзиклын да мойдын уна яръюгыд роль. Пасйыны кӧ торйӧн некымынӧс, тайӧ Гофман (Ж.Оффенбахлӧн «Сказки Гофмана»), Калаф (Дж.Пуччинилӧн «Турандот»), Альфред (Дж.Вердилӧн «Травиата»), Фауст (Ш.Гунолӧн «Фауст»), Радамес (Дж.Вердилӧн «Аида»), Пинкертон (Дж.Пуччинилӧн «Чио-Чио-сан»), Ленский (П.И.Чайковскийлӧн «Евгений Онегин»), Альмавива (Дж.Россинилӧн «Севильский цирюльник»), Водемон (П.И.Чайковскийлӧн «Иоланта») да уна мукӧд роль, кӧні колӧ и мича гӧлӧс, и драматическӧй ворсан сям.
2018 воын Борис Калашниковлы сетісны «Онегин» национальнӧй опера премия «Сказки Гофмана» операын шӧр партия (Гофман) сьылӧмысь. Сідзжӧ сійӧ С.Ермолин нима республикаса театральнӧй конкурсса лауреат да «Санкт-Петербург в зеркале мировой музыкальной культуры» войтыркостса вокалистъяслӧн конкурсса лауреат.
Кыдзи пасйи нин, аслас бенефис вылӧ Борис Калашников бӧрйис Г.Доницеттилысь «Любовный напиток» опера. Неморино, кодӧс сэні сійӧ сьылӧ, позьӧ шуны короннӧй тенор партия. «Любовный напиток» – Италияса бельканто операясысь медся серамбана да мыла шылада, дерт, и муслун йылысь. Тайӧ кыпыд операыс видзӧдысьлы зэв ёна воӧ сьӧлӧм вылас. Но колӧ пасйыны и, мый «Любовный напитокын», мед кӧ сійӧ быттьӧ зэв кокньыд сюрӧса, эм джуджыд вежӧртас: мортлӧн олӧм.
И сідз, Неморино шӧр геройыс – бур сьӧлӧма том морт, радейтӧ Адинаӧс. Сьывны тенор партиясӧ абу кокньыд, колӧ бур гӧлӧс, сям. Торйӧн нин сэки, кор колӧ петкӧдлыны постановкаысь серамбана юкӧнъяссӧ.
Сідз шусяна комедия положенийын Доницетти тӧдчӧдӧ джуджыд мӧвп: муслунтӧ оз позь ньӧбны, сійӧ ачыс чужас, кадыс воас да. Неморино оз юктӧд Адинаӧс волшебнӧй эликсирӧн (муслун зелляӧн), а асьсӧ кутӧ сы водзын сідз, кутшӧм эм збыльвылас.
Сідзжӧ колӧ пасйыны, мый «Любовный напитокын» вель уна шылад йӧзыслы тӧдса. Тайӧ и Белькорелӧн кыпыд марш, Дулькамаралӧн серамбана куплетъяс, Адиналӧн мича каватина. Но шылада медшӧр донаторйыс спектакльын – Неморинолӧн «Una furtiva lagrima» («Одна слезинка украдкой») романс.
Кыдзи пасйылі нин, тайӧ партиясӧ сьылігӧн колӧ мича да бур гӧлӧс да теш ворсан сям. Борис Калашниковлӧн жӧ эм татшӧм кужӧмлуныс, сійӧ мастера петкӧдлӧ геройсӧ и гӧлӧснас, и ворсанногнас.
* * *
–Неморинолӧн партия – менам медся радейтанаяс лыдын, – висьталӧ Борис Калашников. – Ас кадӧ тайӧ партиясӧ сьывлісны Энрико Карузо, Лучано Паваротти, Роландо Виллазон. Дерт, и меным вӧлі окота. И зэв нимкодь, мый миян театрса репертуарын эм «Любовный напиток» операыс, и менам артмис сьывны Немориноӧс. И аслам бенефис кежлӧ бӧрйи тайӧ операсӧ, сы вӧсна мый тані абу сьӧкыд драматизмыс. Муслун, мича шылад, кокньыд шмонь – зэв бура лӧсялӧ праздник пасйыны.
Пасъя, буретш тайӧ партиясьыс Борис Калашниковӧс пасйылісны С.Ермолин нима премияӧн «Медбур мужичӧй роль» нимпасын.
«Любовный напитокын» Борис Калашниковкӧд шӧр партияясӧ сьылӧны Анастасия Морараш, Дарья Гапонова, Андрей Ковалев. А аферист Дулькамерлысь партиясӧ Сыктывкарса сцена вылын медводдзаысь сьыліс Мариинскӧй театрысь солист Мирослав Молчанов.
Ӧні Борис Калашников сьылӧ и лирико-драматическӧй партияяс. И локтан сезонын енбиа артист петкӧдчас нӧшта уна на яръюгыд рольын.
<> Екатерина Макарова. Снимокъясыс Коми Республикаса опера да балет театрысь.