Кулӧмдін районса Помӧсдінын «Бӧръя бӧрӧзда гаж» бӧръяысь нуӧдӧмаӧсь 1987 вося тулысын.
И со матӧ нелямын во мысти сиктас бӧр ловзьӧдісны тайӧ мича традициясӧ.
–Та пӧрйӧ конкурсыслӧн мӧд ним – «Медводдза бӧрӧзда». Помӧсдін сиктлы да татчӧс олысьяслы тайӧ зэв тӧдчана. Сійӧ йитӧ видз-му овмӧсын зільысьяслысь кӧленаяс да тӧдчӧдӧ му вылын уджлысь коланлунсӧ, – висьталіс Помӧсдін сиктӧн веськӧдлысь Анатолий Уляшев.
Сиктса автодромын медбур гӧрысь ним вӧсна вермасьны петаліс Кулӧмдін районысь квайт зон. Найӧ петкӧдлісны, кыдзи сяммӧны гӧрны, веськӧдлыны тракторӧн, дӧзьӧритны да, ковмас кӧ, дзоньтавны «кӧрт вӧвсӧ».
Челядьлӧн «Патриот» творчество керкаысь специалистъяс дасьтісны ордйысьысьяслы трактор мотор кузя экспресс-юасьӧм. Колӧ вӧлі тӧдмавны, мыйсяма механизм «дзебсясьӧ» шыпасъяс сайын.
Мальӧ грездысь Антон Третьяков лыддьӧ, мый НШ 32 – тайӧ «насос широкий, 32 литра». Збыльвылас тайӧ «насос шестерёнчатый, 32 см»).
Пожӧгдін грездысь Анатолий Лопырев ГСВ сайын «гидроувеличитель сцепного веса» пыдди аддзис «главный системный вентилятор».
Помӧсдінысь Роман Калашников серти ПЛН – тайӧ «плуг лёгкий навесной». Ӧти кывйӧн торксьыштіс. Абу пӧ «лёгкий», а «лемешный».
Тайӧ жӧ сиктсьыс Дамир Попов стӧча вочавидзис, мый КШМ колӧ гӧгӧрвоны кыдз «кривошипно-шатунный механизм». Помӧсдінысь жӧ Алексей Холопов шмонитыштіс. КРН-2.1 шыпас-лыдпас сайын пӧ «кран с высотой подъёма 2,1 метра».
А гӧрысьлы колӧ тӧдны, мый тайӧ 2.1 метр пасьта покоса «косилка ротационная навесная».
Ордйысьысьяслысь тракторӧн вӧдитчан сямсӧ да тӧдӧмлунсӧ донъяліс стрӧг жюри. Главнӧй судьянас вӧлі «Патриот» керкаӧн веськӧдлысь Александр Глуханич. Сылы отсасисны «Помӧсдін» СПК-ысь опыта тракторист Роман Игнатов, творчество керкаысь тракторӧн веськӧдлыны велӧдысь инструкторъяс Руслан Попкович да Антон Уляшев.
Став очкосӧ артыштӧмӧн медбур гӧрысьӧн лоис Анатолий Лопырев. Мӧд да коймӧд местаынӧсь Антон Третьяков да Алексей Холопов.
–Зонъясӧс велӧдім-дасьтім ордйысьӧм кежлас. И найӧ петкӧдлісны, мыйӧ велалісны. Но ӧтитор – вӧчны тайӧс тэрмасьтӧг, и дзик мӧдтор – ордйысигӧн, кор тэ вылӧ видзӧдӧны сиктсаяс, ёртъясыд да стрӧг жюри. И ставсӧ колӧ вӧчны ӧдйӧ да бура. Бӧръя здукӧдз вӧлі сьӧкыд бӧрйыны медбур гӧрысьсӧ. Медтӧдчанаыс, зонъяс уджалісны му вылын, кылісны сылысь лов шысӧ. Гашкӧ, кодӧскӧ муыс и кӧрталас ас бердас, да зонъяс пиысь кодкӧ кольччас чужан сиктас, – висьталіс «Патриот» керкаӧн веськӧдлысь Александр Глуханич.
–Веськӧдлыны татшӧм вына техникаӧн сьӧкыд. Но нӧшта сьӧкыдджык лючки гӧрны. Ордйысьӧм водзвылас, дерт, майшасьышті. Гашкӧ, та вӧсна медводдза бӧрӧздаыс эзджык артмы. Ёна радейта техника, та вӧсна и велӧдча механизаторавны. Но кутшӧм профессия бӧръя олӧмын да кӧні мӧда зільны, мӧвпала на, – юксис аслас дум-кӧсйӧмӧн Дамир Попов.
Конкурссӧ восьтыны воліс Коми Республикаса видз-му овмӧс да вузасьӧм кузя министр Сергей Елдин.
–Талун регионса видз-му овмӧсын оз тырмы 350 специалист. Найӧс дасьтыны колӧ босьтчыны школаын на. Та могысь республикаын таво могмӧдам колана оборудование-техникаӧн кык агрокласс да восьтам татшӧмсӧ нӧшта куимӧс. Школа помалӧм бӧрын ныв-зон вермасны дон вештытӧг водзӧ велӧдчыны видз-му овмӧсса специалистъясӧс дасьтан учреждениеясын. Дерт, колӧ бурмӧдны и сикт-грездын олӧмсӧ. Та могысь том специалистъяслы отсалам оланінӧн. Локтан воын Луздор районын кыпӧдам нёль, а 2030 воӧдз нӧшта кӧкъямыс керка.
Зэв ыджыд аттьӧ Помӧсдінса творчество керкаын зільысьяслы конкурссӧ котыртӧмысь. Ордйысьӧмыс петкӧдлӧ, мый сикт-грездын быдмӧны томъяс, кодъяс дасьӧсь миянӧс вежны да сӧв-мӧдны видз-му овмӧс, – висьталіс министр.
Ордйысьӧм-гаж дырйи Помӧсдінын вӧлі «Бӧрйы миянлысь» ярманга, кӧні асланыс вӧлӧгаӧн да вӧчӧмторъясӧн вузасисны регионса предприятие-котыръяс. «Лӧз трактор» выставка вылын быдӧн вермис видзӧдлыны да донъявны видз-му овмӧс техника. А рытнас сиктса культура керкаын вер-стьӧӧс да челядьӧс гажӧдіс «Радлун» коллектив.
Казьтыштам, тавосянь Коми Республикаса юралысь Ростислав Гольдштейнлӧн индӧд серти «Кадры в АПК» регионса программа серти сиктӧ уджавны локтӧм том специалистлы сетасны 600 сюрс, а рабочӧйлы – 400 сюрс шайт.
<> Николай Размыслов. Снимокъясыс ӧтуввезйысь.