И помӧсдінсалы – выльӧс да бурӧс

Помӧсдінын медводдза школасӧ, кыдзи церковно-приходскӧйӧс, восьтылӧмаӧсь 1861 воын на. 1883-ӧдын сиктса велӧдчанінсӧ босьтӧма аслас дӧзьӧр улӧ нималана коми гижысь Вениамин Чисталёвлӧн Тимофей Иванович батьыс. 1915 воын сиктас восьтӧмаӧсь вылыс тшупӧда начальнӧй училище, коді 1939-ӧдын лоӧма шӧр школаӧн. Ачыс Вениамин Тимофеевич уджавлӧма сэні велӧдысьӧн 1910-1933 воясын.

Бура велӧдчысьясӧн нималӧ тайӧ школаыс и талун. Кольӧм во кыкӧн роч кыв да химия кузя ЕГЭ сдайтӧмаӧсь 90 балл вылӧ. Ставроссияса олимпиадалӧн районса тшупӧдын 30 ныв-зон лоӧмаӧсь призёръясӧн биология, роч кыв да литература, физкультура, обществознание, география да мукӧд предмет кузя. Быд во челядь шедӧдӧны вермӧмъяс коми кыв да литература, фольклор, история да краеведение кузя республикаса олимпиадаясын.

Ёртасьӧны велӧдчысьяс и спорткӧд. Кольӧм воын волейбол кузя республикаса «Серебряный мяч» ордйысьӧм дырйи помӧсдінсаяс ворсӧмаӧсь медбура. «За здоровую Республику Коми в XXI веке» спартакиадаын шедӧдӧмаӧсь мӧдӧд места.

Школаас талун 374 велӧдчысь. И абу сӧмын Помӧсдінысь. Быд асыв кык автобусӧн вайӧны челядьӧс Скӧрӧдумысь, Выльгортысь, Кырнышаысь, Бадьёльйылысь, Мӧдлапӧлысь, Сордйылысь, Великопольеысь да Вӧльдінысь, а рытнас бӧр нуӧны гортаныс. А Пузлаысь да Ягкӧджысь ныв-зон олӧны школаса интернатын.

Помӧсдінса школа меститчӧ талун ӧкмыс пу стрӧйбаын, на лыдысь нёльыс – кык судтаа. Велӧдчанінъяссӧ лэптылӧмаӧсь 1890, 1910, 1915, 1935, 1950, 1955, 1978, 1983 да 1995 воясын. Гӧгӧрвоана, унджыкыс ёна нин важмӧма. Та вӧсна кольӧм во тані панісны 400 велӧдчысь вылӧ выль школа. Кирпичысь стрӧйбасӧ лэптӧ Архангельскысь «Белый дом» котыр.

Кыпӧдӧмаӧсь нин стенъяссӧ, босьтчӧмаӧсь вӧчны вевтсӧ. Республикаса юралысь Сергей Гапликовлӧн волігӧн стрӧитчӧм да туй овмӧс кузя министр Андрей Крикуненко висьталіс, мый выль велӧдчан стрӧйбаыс джынвыйӧ дась.

Кольӧм во школа лэптысьяс уджалӧмаӧсь график серти, но тавося зэра гожӧмыс ёна конъялӧма найӧс.

–Урчитӧм кадысь кольччам тӧлысьӧн-джынйӧн, – висьталіс «Белый дом» ООО-ӧн веськӧдлысьӧс вежысь Павел Баженов. – Но стрӧйба дорас вайӧдім нин шоныд ва сетан трубаяс, электрокабель, эмӧсь кусӧдчан ва резервуаръяс, вӧчӧма дренаж, пукталам ӧшинь рамаяс.

Ортсысяньыс стенъяссӧ шоныд кутӧм могысь кышӧны фиброцементысь панельясӧн. Тайӧ уджсӧ вӧчӧны дасӧн. Ноябрын пӧ помалам. А ставыс стрӧйка вылас зільӧ 39 морт.

Павел Баженовлӧн висьталӧм серти, кызвын стройматериалсӧ вайӧмаӧсь нин. Кирпичыс Ухтаысь.

Стрӧйба вылас ставсӧ видзасны 475 миллион шайт.

–Мыйсюрӧ вӧчам нин и школа пытшкас, медвойдӧр лӧсьӧдам электрика да сантехника, – юӧртіс компанияын уджалысь Александр Климов. – Стенъяссӧ дзикӧдз помалӧм да вевтсӧ вӧчӧм бӧрын сетам шоныд. Сэсся тыр ӧдӧн нин босьтчам пытшкӧс уджъясӧ. Ӧти бригада штукатуритӧ нин кос стенъяссӧ. Но унджык вежӧссӧ ковмас вель дыр косьтыны шоныд сетан пушкаясӧн. Чайта, тӧвнас ог нин кутӧй кольччыны, ставсӧ мӧдам вӧчны урчитӧм кадӧ. Мӧд во гожӧмнас гӧгӧр пелькӧдам. План серти 2020-2021 вося велӧдчан во кежлӧ школасӧ колӧ помавны.

Районса администрацияӧн веськӧдлысь Сергей Рубан содтіс, мый сиктас дзоньталӧны котельнӧй, сувтӧдӧмаӧсь нин сэтчӧ выль пӧрт. Коммунальнӧй овмӧскӧд колана кабалаяс кырымалӧм бӧрын урчитасны шоныдысь мынтысян донсӧ да мӧдасны шонтыны нин школасӧ.

* * *

Помӧсдінӧ волігӧн республикаса юралысь Сергей Гапликов кежаліс и 200 мӧс вылӧ артыштӧм выль картаӧ.

Стрӧйбаыс кызвыннас дась нин. Зэра поводдя вӧсна абу на дзикӧдз помалӧмаӧсь канализациясӧ, абу на жӧ удитӧмаӧсь пелькӧдны гӧгӧрсӧ. А пытшкас ставыс дась. Нюжӧдӧма йӧв да ва проводъяс, лӧсьӧдӧма куйӧд петкӧдан транспортёръяс. Кольӧма вайны да вольсавны сюрукъяслы… резина ковёръяс.

Картасӧ лэптыны заводитӧмаӧсь 2017 вося июльын. Став удж вылас вичмӧдӧмаӧсь 36,4 миллион шайт, сы лыдысь 25,5 миллионсӧ вичмӧдӧмаӧсь республикалӧн сьӧмкудйысь. Социальнӧй юкӧнын ёртасьӧм йылысь сёрнитчӧм серти 6 миллион шайт сетӧма «Монди СЛПК». Помӧсдінса СПК видзӧма жӧ аслас кудйысь 2 миллион гӧгӧр.

Выль картаыс ыджыд да югыд. Тані важас серти ёна этшаджык кипом уджыс да тӧдчымӧн унджык выль оборудованиеыс. Тайӧ пӧ ышӧ-дас босьтчыны фермаын уджӧ сиктса том йӧзӧс, а сідзжӧ бурмӧдас йӧвлысь качествосӧ, – лача кутӧны СПК-ын.

Республикаса юралысь юасис, сяммисны-ӧ овмӧсас тавося зэра гожӧмнас заптыны скӧтлы тӧв кежлӧ колана мында кӧрым.

СПК-ӧн веськӧдлысь Татьяна Уляшева веськыда висьталіс, мый кӧрымӧн налы лоас дзескыд. Видз-му овмӧс министерствоысь чинаяс пӧ вӧзйӧны йӧв содтӧм могысь тӧвнас вердны мӧсъясӧс чазӧн, патокаӧн да кукурузаӧн.

–Ӧні сюрукъяслы суткинас сод-тӧд сетам куим килограммӧн ӧтруб. Дерт, тайӧ этша. Мукӧд овмӧсас кык пӧв унджык вердӧны. Но, веськыда кӧ, и ӧтрубсӧ содтӧд ньӧбны миян сьӧмыс абу, – висьталіс Татьяна Уляшева.

–Пемӧсъясӧс вердӧм вылӧ колӧ быдтыны кукуруза да вӧчны сыысь силос. Тӧвнас, тӧданныд, кыдз мӧсъяс сёйӧны кукурузасӧ? Вура-варакылӧны быдӧн. Нӧшта кӧ сод-тӧд солыштны, – пасйис Сергей Гапликов.

–Да, совтӧ сетам жӧ, – вочавидзис Татьяна Уляшева. – Дерт, йӧлыд медводз вердӧм сайын. Но сэк жӧ колӧ и «томмӧдны» стаданымӧс. Мӧсъясӧс ӧні лысьтам кӧкъямыс во, а водзті и дас воӧдз лысьтывлім.

Юралысь торйӧн ошкис резина ковёръяс, тӧвнас пӧ мӧсъяслы лоӧ шоныд.

Сьӧлӧм вылас Сергей Гапликовлы воисны и скӧт видзысьяслӧн шойччан да мыссян вежӧсъяс.

Юркарысь чинаяс пиысь кодкӧ шмонитіс, мый йӧв содтӧм могысь суйӧрсайса фермеръяс мӧсъяссӧ гажӧдӧны классическӧй шыладӧн. А тані пӧ сюрукъяслы тырмымӧн видзӧдлыны ӧшиньӧ.

И збыльысь, выль скӧт картасянь синмыдлы воссьӧ зэв мича серпас: паськыд видзьяс, уна рӧма зарни арся вӧр да неылын – ю…

«Помоздино» СПК-ын талун ви-дзӧны 460 пемӧс, на лыдысь джынйыс – лысьтан мӧс. Суткинас найӧ сетӧны 2,5 тонна йӧв.

Овмӧсас эм йӧлысь вӧлӧга вӧчан цех. Йогурт, рысь, вый да мукӧд сёян-юан иналӧны Кулӧмдін да орчча районъясын, нуӧны вузавны и Сыктывкарӧ.

–Бур, мый лэптім выль картасӧ. Сюрукъяслы тані кажитчас, – вӧчис кывкӧртӧд республикаса видз-му овмӧс да потребительяслӧн рынок кузя министр Анатолий Князев.

Николай Размыслов.

Снимокъясыс авторлӧн.

И помӧсдінсалы – выльӧс да бурӧс

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх