Республикаса физкультура да спорт министерствоын нуӧдісны сӧвещание-семинар, кытчӧ чукӧртчылісны кар-районъясын физкультура да спорт вӧсна кывкутысьяс.
–Талун ми мӧдам видлавны зэв колана да тӧдчана юалӧмъяс, – сёрнисӧ панігӧн пасйис министр Николай Бережной. – Эска, семинар вылас ті тӧдмаланныд уна выльсӧ да бурсӧ, мый верманныд пыртны асланыд уджӧ сикт-грездъясын.
–Россияса регионъяслы да кар-районъяслы сетӧма позянлун асланыс вынӧн дасьтыны сідз шусяна спорт резерв. Комиын та боксянь вӧчӧма унатор, торйӧн кӧ, выльмӧдӧма резерв дасьтан программа, – висьталіс «Сборнӧй командаяс дасьтан спорт шӧринысь» отделӧн веськӧдлысьӧс вежысь Евгений Лобов. – Спортын дасьтысян комплекслӧн быд тшупӧд топыда йитчӧма ӧта-мӧдыскӧд. Та дырйи быть колӧны научно-методическӧй да медико-биологическӧй удж вӧсна кывкутысь специалистъяс.
Минспортысь отделӧн веськӧдлысь Наталья Карина юӧртіс, кутшӧм спорт сикас медбура сӧвмӧ миян регионын. Комиын талун базӧвӧйӧн шуӧма тӧвся Олимпиадаса биатлон да лызьӧн котралӧм, гожся Олимпиадаса бокс, вермасьӧм, варччӧм, сьӧкыд атлетика да футбол. Мача хоккейӧн Олимпиада дырйи оз ворсны, но республикаын сійӧ базӧвӧйяс лыдын жӧ. Татшӧмӧн жӧ шуӧма спорт сикасъяс, кодъясӧс пыртӧма сурдлимпиадалӧн (сьӧкыда кылысьяс костын ордйысьӧм) да паралимпиадалӧн (кӧні вермасьӧны йӧз, кодъяслӧн торксьӧма опорно-двигательнӧй аппаратыс) программаӧ.
Республикаын талун уджалӧ физкультура да спорт нырвизя 45 учреждение да 210 торъя отделение. Бӧръяяссьыс 101-ас дасьтӧны спортсменъясӧс базӧвой дисциплинаяс кузя.
Комиын сідзжӧ эм адаптивнӧй физкультуралӧн да спортлӧн 41 отделение, кытчӧ волывлӧ 1.686 инвалид, на лыдын 375-ыс сьӧкыда кылӧ либӧ торксьӧма опорно-двигательнӧй аппаратыс.
–Олимпийскӧй спорт сикасъяс пиысь республикаын медбура сӧвмӧ лызьӧн котралӧм, – пасйис Наталья Карина. – Комиысь кызьнан муниципалитетас радейтӧны татшӧмсӧ. 2017-2018 да 2018-2019 тӧвся сезонъясын лызьӧн котралӧм кузя Коми лоис странаса субъектъяс пиысь коймӧдӧн.
Регионын спортын дасьтысян программа талун збыльмӧдӧ 39 организация. Пасъям, сизим спорт школаын, кодъяслӧн нимын эм «олимпийскӧй» кыв, кӧкъямыс отделениеын дасьтӧны том йӧзӧс базӧвӧй олимпийскӧй спорт сикасъяс кузя.
Комиын календарнӧй план серти нуӧдӧмаӧсь республика тшупӧда 200 ордйысьӧм, чемпионат да первенство, Россияса Рытыв-Войвыв федеральнӧй кытшлысь первенствояс, комплекснӧй ордйысьӧмъяс. А бӧръя вит вонас заводитӧма уджавны 98 спорт учреждение.
Базӧвӧй спорт сикас кузя дасьтан программаяс серти 2017 воын Комиын зільӧма 4.949 морт, кольӧм во налӧн лыдыс содӧма 8.885 мортӧдз. Республикаса спортсменъяс ордйысьӧны Россияса сборнӧй командаясын 8 базӧвӧй спорт сикас кузя, биатлонысь да сьӧкыд атлетикаысь кындзи.
–Таво базӧвӧй спорт сикас да дисциплина кузя мастерлысь ним сетӧма вит мортлы, – юӧртіс республикаса «Спортмероприятиеяс шӧринысь» главнӧй эксперт Нина Ермолина. – Во джынйӧн спортса мастерлысь ним да разряд сетӧмаӧсь 4,4 сюрс сайӧ мортлы, кольӧмвося тайӧ кадын дорысь ёна унджык.
Сідз, Комиын спортса заслуженнӧй мастерыс, войтыркост класса спортса мастерыс да спортса мастерыс лоӧма 35 мортӧн унджык. 238 вылӧ содӧма спортса мастерӧ кандидатыс. Первой разряд сетӧмаӧсь 464 мортлы, 3.673-лы – мукӧд разряд.
Мастер нима да разряда спортсменыс содӧ Сыктывкарын, Ухтаын, Княжпогост, Луздор, Сыктывдін, Сыктыв да Емдін районъясын. Сэк жӧ чинӧ татшӧмыс Сосногорскын, Воркутаын, Вуктылын, Изьва, Кулӧмдін, Удора, Кӧрткерӧс районъясын.