Видзӧдысь, коді локтӧ театрӧ, аддзӧ сцена вылын ворсысьясӧс, но гежӧда думыштчылӧ на йылысь, кодъяс ассьыныс уджсӧ мыркӧны-вӧчӧны сцена сайын. И мукӧддырйи татшӧм тыдавтӧм уджалысьыс овлӧ актёр серти ёна унджык. Найӧ лӧсьӧдӧны сценавывса би, шылад, кӧлуй, паськӧм…
Талун ми сёрнитам буретш сыкӧд, код отсӧгӧн артистъяс петӧны сцена вылӧ мича да шензьӧдана паськӧмӧн.
Ворсысьяслы кызвын паськӧмсӧ дасьтӧны театрын. Коми Республикаса вужвойтырлӧн шылада-драмаа театрын вурсян юкӧнӧн веськӧдлӧ Надежда Леонидовна Колпак. Аслас уджын сійӧ зільӧ нелямын во нин, а шылада-драмаа театрын – матӧ кӧкъямыс во.
–Надежда Леонидовна, кыдзи ті веськалінныд театрӧ?
–Нем виччысьтӧг! И аслам семьяын ме ӧтнам вурсьысьыс. Но рӧдвуж пиын эмӧсь серпасасьысьяс. Гашкӧ, тасянь и петӧ менам творчествоа нырвизьӧй?..
–Мый вӧсна ті кывкутанныд?
–Ме, кыдз серпасасьысь-модельер, дасьта паськӧмсӧ сідз, мед сійӧ лоис актёрлы, позьӧ шуны, мӧд кучикӧн, отсаліс восьтыны геройыслысь сямсӧ.
–Кыдзи паськӧмыс отсалӧ актёрлы пырӧдчыны роляс?
–Ме думысь, театрса паськӧмыс – тайӧ ворсысьлӧн уджалан паськӧм. Сійӧ, кыдз и сёрниыс, асьсӧ кутӧмыс, ветланногыс, тшӧтш гӧгӧрвоӧдӧ геройсӧ. И колӧ, медым актёрлы воис сьӧлӧм вылас тайӧ костюмнас ворсны. Выль спектакль репетируйтігӧн сылы зэв жӧ тӧдчана лоны тайӧ паськӧмнас, сэки сійӧ дзик нин мӧд ногӧн асьсӧ кылӧ.
–Кутшӧм ӧні, тіян видзӧдлас серти, театръясын олӧмыс? Эм-ӧ сӧвмӧмыс?
–Сӧвмытӧг-быдмытӧг театрыд оз вермы лоны. Сэні век сы мында выльыс да нимкодьыс! Да и асьным ми зілям, мед видзӧдысь окотапырысь волывліс театрӧ.
–Мый медся сьӧкыдыс да медся шензьӧданаыс тіян уджын?
–Медся шензьӧданаыс – аддзыны уджыдлысь кывкӧртӧдсӧ, водзӧссӧ, кутшӧмӧн кӧть сійӧ оз ло. Театрса вурсьысь – тайӧ аслыспӧлӧс удж. Театр сӧвмӧдӧ мӧвпаланногтӧ, пельклунтӧ. Тані колӧ лоны унатор кужысь мортӧн, лоны ас дорад стрӧгӧн, пыр сӧвмӧдны сямтӧ.
–Сценавывса кутшӧм медся сьӧкыд костюм ковмыліс вурны?
–Медся сьӧкыд дасьтыны паськӧмсӧ историякӧд йитчӧм спектакльяслы, кыдзи Владимир Тиминлӧн «Эжва Перымса зонка» повесьт серти мюзикллы. Колӧ видлавны вель уна гижӧд да серпас, бура тӧдны сійӧ кадколастсӧ. Ӧд сэки вӧлі аслыспӧлӧс вуранног, вӧліны торъя дӧраяс, торъя серъяс. Чуймӧдӧ, мыйта дӧра ковмывлӧ ӧти костюмсӧ вурны!
–Кутшӧмкӧ костюм йиджліс лолӧдзныд?
–Меным ас киӧн вурӧм быд паськӧм – кыдзи невесталы кӧлысьса платтьӧ. Быд костюм колӧ донъявны творчествоа видзӧдласӧн, аддзыны сэтысь мыйкӧ торйӧданаӧс.
–Сьӧкыд абу уджавны артистъяскӧд?
–Да, «заказчикным» миян тшӧкыда ыждавлӧ, но ми водзвыв думыштам, мед паськӧмыс лӧсьыда «пуксис». Таын отсалӧны и кужанлуныд, и аслад удж да актёръяс дорӧ муслуныд. Мый кӧть оз лолы, ме став ворсысьсӧ радейта.
–А радейтана спектакльяс ас театрын эмӧсь?
–Дерт, эмӧсь. Зэв ёна кажитчӧ меным «Парма лов». Шыладыс сэні вунӧдны позьтӧм мича. Спектакльыс мича жӧ, югыд костюмъяса. А сьылысьяслӧн гӧлӧсыс тэӧ быттьӧ сӧстӧм сынӧд лолыштӧ. Кажитчӧ и «Кабаре «Сыктывса кань». Тайӧ спектакльсӧ видзӧдігӧн ме збыльысь шойчча. Кымынысь ог видзӧд, пыр майшася геройяс вӧсна, нимкодяся актёръяслӧн ворсӧмӧн да костюмъясӧн.
–Костюм вӧчысь художниклӧн эмӧсь-ӧ гусяторъяс?
–Юрын пыр вуранноглӧн быд ичӧтик тӧдчанаторйыс: кыдзи эськӧ сійӧ либӧ тайӧ костюмсӧ ӧдйӧ пӧрччыны да пасьтавны, кыдзи кизявны. Позьӧ велавны бура вурсьыны, но театрын нӧшта колӧ пытшкӧсса гӧгӧрвоӧм, нырис, ӧд быдлунъя олӧмас паськӧмыс дзик мӧд.
–Кыдз ковмылӧ вурсьыны, сьӧмыс кӧ та вылӧ этша?
–Сьӧмыд театрын век оз тырмы. Но ми зілям рӧм, торъя вуранног либӧ аслыссяма матерье отсӧгӧн вӧчны сэтшӧм костюм, мед залсянь видзӧдсис шензьӧданаӧн!
–Некор эн кӧсйылӧй вежны уджтӧ?
–Шулӧны тай, аддзы пӧ аслыд кажитчана хобби, и некор он кут уджавны. Тайӧ ме йылысь шуӧма.
–Мый йылысь ті гусьӧн мӧвпаланныд?
–Окота уджалыштны Москваса либӧ Петербургса театръясысь модельеръяскӧд. Выляд велӧдчыны некор абу сёр!
Сёрнитіс Евгения Савина.