Ньӧбасьысьлы колана юӧр сетӧмӧ

«Единая Россия» ютырлысь «Народный контроль» уджтас збыльмӧдысьяс волӧмаӧсь республика пасьталаын кӧкъямысдасысь унджык лавкаӧ, тшӧтш и федеральнӧй компанияяслӧн вузасянінъясӧ, медым видзӧдлыны, оз-ӧ торкавны сэні йӧв да йӧлысь вӧчӧм вӧлӧга выль ногӧн иналӧм кузя Россияса правительстволысь шуӧмсӧ.

Казьтыштам, тавося июльсянь йӧлысь вӧчӧм сёян-юансӧ, кытчӧ донсӧ чинтӧм ради абу пуктӧма некутшӧм кослунъя вый, колӧ вӧзйыны ньӧбасьысьлы мукӧд вузӧссьыс торйӧдӧмӧн.

Кыдз тыдовтчӧма, «Пятёрочкалӧн» да «Магнитлӧн» магазинъясын унджыклаас та боксянь ставыс лючки. Кӧнсюрӧ татшӧм сёян-юансӧ торйӧдӧмаӧсь БЗМЖ («Без заменителей молочного жира») гижӧда донпасъясӧн.

Россияса правительстволӧн шуӧмкӧд йитӧдын нелючкияссӧ народнӧй контролёръяс эрдӧдӧмаӧсь кызвыннас неыджыд вузасянінъясын. Кӧкъямысдас нёльысь рейдӧ петаліганыс казялӧмаӧсь кызь куим тырмытӧмтор, унджыксӧ Чилимдінын, Воркутаын да Интаын. Такӧд йитӧдын кывкӧртӧдъяссӧ мӧдӧдӧмаӧсь Комиын Роспотребнадзорлӧн управлениеӧ.

Казьтыштам, вузасян правилӧяс торкалӧмысь штрапсӧ урчитӧма перйыны лавка кутысьлысь либӧ веськӧдлысьыслысь ӧти сюрссянь сюрсӧн-джынйӧн шайтӧдз, а вузасян организацияыслысь — комын сюрс шайтӧдз.

«Народный контроль» уджтаслӧн общественнӧй сӧветӧн веськӧдлысь Максим Абдулинлӧн висьталӧм серти, бур, мый лавка кутысьяс пиысь унаӧн асьныс водзмӧстчӧмаӧсь да йӧзӧдӧмаӧсь вузасянінас йӧв да йӧлысь вӧчӧм вӧлӧга иналан джадж-витринаясас Россияса правительстволӧн шуӧмкӧд йитӧдын ньӧбасьысьлы колана да тӧдчана юӧрсӧ. И збыльысь, таысь рӧскодыс абу ыджыд, сэк жӧ йӧзыс аддзӧны, мый лавкаас вузасьысьяс тӧждысьӧны на вӧсна.

И Дарья Шучалина, Комиын «Единая Россия» ютырлӧн «Народный контроль» проектса координатор, эскӧдӧ, мый налӧн рейдъясыс отсаласны бырӧдны йӧлӧн да йӧлысь вӧчӧм вӧлӧгаӧн вузасьӧм кузя регионса кар-районын ӧткымын лавкаын эрдӧдӧм тырмытӧмторъяссӧ.

Ньӧбасьысьлы колана юӧр сетӧмӧ

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх