Гожӧмбыд зэрис да, кӧрымыс этша

Гожӧмбыд зэрис да, видз-му овмӧсъясын кӧрымсӧ зэв этша заптісны.

Сенажсӧ вӧчӧмаӧсь урчитӧмсьыс кӧкъямысдас прӧчент, силоссӧ — ветымын прӧчент, а турунсӧ нӧшта на этшаджык. Кольччысьяс пӧвстын Удора, Инта, Княжпогост да Ухта районъяс.

Видз-му овмӧс министерство зільӧ сёрнитчыны аслыныс тырмымӧн кӧрым заптысь предприятиеяскӧд да фермеръяскӧд, медым лишаланасӧ вузаласны турун-силостӧг кольӧмаяслы. Тӧ-дӧмысь, кӧрымсӧ и мукӧд регионысь ковмас ньӧбны. Да комбикормӧн скӧтсӧ вердны — а тайӧ донсьӧдас прӧдукциясӧ.

—Уналаын, торйӧн нин Чилимдін да Изьва районъясын, юяс ойдлісны да, видзьяс веськалісны ва улӧ. Арталім да, таысь воштӧмыс лоис 240 миллион шайт. Ӧткымын овмӧслы ковмис уджйӧзӧн ньӧбны комбикорм, — висьталіс республикаса юралысь Сергей Гапликовкӧд аддзысьлігӧн видз-му овмӧсса министр Анатолий Князев. — Та вӧсна кора видзӧдлыны, позяс-ӧ сиктын уджалысьяслы отсалӧм могысь вичмӧдны кӧть нин джынсӧ — 120 миллион шайт, медым мӧсъяссӧ найӧ эз бырӧдны.

Сергей Гапликов пасйис, мый колӧ корсьны позянлунсӧ. Медвойдӧр пӧ колӧ вештыны нелямын миллион шайт — татшӧм донысь овмӧсъяс ньӧбӧмаӧсь содтӧд комбикормсӧ.

—А во помӧдз бергӧдны и омӧль поводдяысь воштӧмсӧ, — висьталіс юралысь.

Анатолий Князев вӧзйис тшӧтш пыртны республикаын сідз шусяна «чрезвычайнӧй ситуациялысь режим», мед пӧ Россияса минсельхоз оз мӧд перйыны овмӧсъяслысь урчитӧм уджсӧ вӧчтӧмысь штрап. Регионса юралысь кӧсйысис видлавны тайӧ вӧзйӧмсӧ торъя комиссиялӧн чукӧртчылігӧн. Сэки пӧ гӧгӧрбок туялам-донъялам, колӧ-ӧ татшӧм режимыс.

Зэра гожӧмыс петкӧдліс, мый Комиын, гашкӧ, колӧ стрӧитны комбикорм вӧчан завод.

—Тайӧ водзӧ кежлӧ мог. Ас регионын кӧ вӧчны комбикормсӧ, водзӧсыс ыджыдджык лоас, — висьталіс Сергей Гапликов. — Та йылысь ме сёрнитлі нин Кулӧмдін районӧ ветлігӧн. И опытыс эм жӧ — Зеленечысь чипан видзан фабрика кыпӧдӧ татшӧм заводсӧ. Но сэні кутасны вӧчны чипан-порсьӧс вердан комбикорм. А колӧ эськӧ ком-плекс, кӧні и мӧс-куклы кӧрымсӧ вӧчасны.

Гожӧмбыд зэрис да, кӧрымыс этша

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх