Мед туй вылын ставыс вӧлі лючки

Бӧръя дас воӧн ГИБДД-лӧн Кулӧмдін районса юкӧнын эз на вӧв сэтшӧмыс, мед ӧти воӧн локтіс уджавны нёль том морт.

Участокса уполномоченнӧйяслӧн юкӧнысь вуджис татчӧ да лоис туйвывса инспекторӧн Виталий Кузнецов. Патрульно-постӧвӧй службаысь локтіс Кирилл Ильченко. Сійӧ государственнӧй инспектор, сувтӧдӧ учёт вылӧ техника, киритӧ шогмы-тӧм да уджӧдны позьтӧм машинаяс вылӧ документъяс, сеталӧ шоперлысь удостоверениеяс да вӧчӧ колана кабалаяскӧд йитӧдын мукӧд удж. Кыкнанныс ветлісны босьтны содтӧд тӧдӧмлун пытшкӧс делӧяс министерстволӧн велӧдан шӧринӧ.

Февральсянь туйвывса патруль службаысь инспекторлӧн уджӧн тӧдмасьӧ Зимстанысь Антон Лютоев.

–2015 воын помалі Выльгортса видз-му овмӧс техникум. Лои автомеханикӧн. Специальносьт кузя инась-ны эг вермы да, уджалі пилорамаын. Армияысь локтӧм бӧрын шыӧд-чи пытшкӧс делӧяс министерство- лӧн районса юкӧнӧ. Вӧзйисны уджав-ны патрульно-постӧвӧй службаын либӧ ГИБДД-лӧн юкӧнын. Бӧрйи ГИБДД, – висьталіс Антон Эдуардович.

Кык тӧлысь сійӧ тӧдмасис туйвыв-са патруль службаын административнӧй законъяс олӧмӧ пӧртӧм бӧрся видзӧдысь инспекторлӧн уджӧн. Туйдіс-велӧдіс сійӧс Ольга Борисовна Юшкова.

Дежуритны унджыкысьсӧ петавлӧ старшӧй инспектор Андрей Юрьевич Поповкӧд, коді кывкутӧ туйвывса патруль службалӧн удж вӧсна, а сідзжӧ ыджыд сяма мукӧд инспекторкӧд.

Александр Цгоев велӧдчис экономистӧ Вяткаса социально-экономическӧй институтын. Ветліс армияӧ. Радейтіс видзӧдны телевизор пыр лоӧмторъяс йылысь петасъяс. Сьӧ-лӧмсӧ йирыштлісны туйвывса неминучаяс йылысь юӧръяс. Окота лоис уджавны ГИБДД-лӧн юкӧнын. Муса Алина нылыскӧд (вужйыс сылӧн миян районысь, быдмис Эжваын) тӧдсаӧсь школасянь, велӧдчисны да тшӧтш олісны Кировын. Сэні жӧ и кӧсйис Александр пырны уджавны ГИБДД-ӧ. Но Кулӧмдін районса бурдӧдчанінын дзоньвидзалунсӧ видлалігкостіыс Кировса ГИБДД-ӧ уджалысьсӧ аддзӧмаӧсь нин.

Босьтчис керка-патера вузалан-ньӧбан котырын уджӧ. Но, ӧти-кӧ, кыскис чужанінас, мӧд-кӧ, эз эновт-чы дум-кӧсйӧмсьыс уджавны ГИБДД-ын. Тӧвнас воліс гортас, Кулӧмдінӧ, шыӧдчис пытшкӧс делӧяс министерстволӧн районса юкӧнӧ. И тавося апрельсянь пырӧдчӧ туйвывса ин-спекторлӧн уджӧ. Туйдысь-велӧ- дысьӧн индісны Роман Михайлович Рассыхаевӧс.

–Уджыс зэв кывкутана. Муртса кӧ сорсьыштан, вермас лоны, мый туй выв правилӧяс торкалысьӧс оз кыскыны кывкутӧмӧ, да сійӧ мӧдас вывтіасьны и водзӧ. Колӧ бура тӧд-ны законъяс, та вӧсна кӧсъя велӧдчыны юристӧ, – тӧдчӧдіс Александр Сергеевич.

А сэсся сійӧ казьтыштіс туй вылын лоӧмторъяс йылысь. Ӧти посёлокын шопер казялӧма госавтоин-спекторъясӧс да ӧддзӧдчӧма, машинанас пырӧма ягӧ, пышъялӧма-чук-льӧдлӧма пуяс костӧд. Но век жӧ погона йӧз суӧдӧмаӧсь сійӧс. Садь, шоперлӧн удостоверениеа, машинасӧ пасйӧма ГИБДД-лӧн юкӧнын, но абу вӧлӧма страхуйтан полисыс. Колӧ жӧ лоны, мый та понда муртса абу пасьвартӧма машинасӧ.

Мӧдлаын гажа юра морт абу казялӧма инспекторъясӧс, вӧрзьӧдчӧма мотоциклӧн, кӧть эськӧ тӧдсаясыс сійӧс ӧлӧдӧмаӧсь, ӧвтчӧмаӧсь кияснаныс. Мортыс вӧлӧма наушника. Но абу дыр журъялӧма керкаяс кос-тӧд шылад кывзӧмӧн. Инспекторъяс сійӧс тшапкӧмаӧсь.

Александр да Алина быдтысьӧны нин. Андрей пиныслы кык тӧлысь. Водзӧ вылӧ Александр кӧсйӧ кы-пӧдны керка.

Пасъям, Александр Сергеевичлӧн батьыс тшӧтш уджавлӧма пытшкӧс делӧяс министерстволӧн юкӧнын уголовнӧй розыскын. Абу вӧлӧма паныд, медым пиыс бӧрйис ГИБДД-ын удж. Абу паныд и мамыс, коді бура тӧдӧ да гӧгӧрвоӧ, мый уджыс кӧть и сьӧкыд, но колана.

Инспекторъяслӧн уджӧн бурджыка тӧдмасьӧм бӧрын томъяс во джын кежлӧ ветласны босьтны содтӧд тӧ-дӧмлун пытшкӧс делӧяс министерстволӧн велӧдан шӧринӧ.

Марина Дадашова.

Авторлӧн да ГИБДД-са юкӧнлӧн снимокъяс вылын: Антон Лютоев, Александр Цгоев да Андрей Попов.

Мед туй вылын ставыс вӧлі лючки

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх