Историяыс ловзьыліс: Ухталы 90 во тырӧм кузя гажыс пансис Войвылӧ медводдзаясӧн овмӧдчысьяслы казьтылан пас дорын.
Сэні чукӧртчӧмаяслӧн син водзын быттьӧ карлӧн историяыс ловзис: Уква ю берегӧ, кыдзи и 1929 вося август 21 лунӧ, чеччисны геологъяс.
Экспедицияыс Вой саридзті локтӧма Печора вомӧдз, катӧма Печора да Изьва юясті.
Медся сьӧкыд туйкостыс вӧлӧма Укваті: кык лунӧн дас кык километр вуджигӧн венӧмаӧсь дас ӧти кось.
Помтӧм-дортӧм вӧр шӧрӧ воӧмаӧсь 125-ӧн.
Экспедицияӧн юрнуӧдысь Сидоров пасйӧма аслас гижӧдъясӧ: «Талун воим местаӧдз – Чибью шорӧдз». А Иван Косолапкин шуӧма: «Ӧні тані вӧр быдмӧ, а некымын во мысти нин ми ог тӧдӧй Ухтанымӧс – быдмас кар, лунвывсянь кӧрт туй воас». И сылӧн кывъясыс збыльмисны.
Быттьӧ ставнас карыс сьыліс
Юбилейлы сиӧм гажыс водзӧ муніс Комсомольскӧй изэрд вылын. Ярманга вылын ассьыныс вӧчӧмторъяссӧ сэні вӧзйисны Ухтаысь, Сыктывкарысь, Улыс Новгород обласьтса Семёнов карысь мастеръяс. Мастер-класс дырйи киподтуя войтыр петкӧдлісны кысян, акань вӧчалан, пуысь да сёйысь вӧчасян, дорччан сямсӧ. Ирина Жукова кык во нин нойысь гын сапӧг, кепысь-шапка мастеритӧ. Таӧдз пӧ кыси-вурсьылі, а пенсия вылӧ петі да нойысь вӧчасьны куті.
Вузасьысьяс жӧ весиг пӧжасас серпасалӧмаӧсь Ухталы 90 во тырӧмлы сиӧм пасъяс, а тэчӧмаӧсь кӧвдум-шаньгасӧ няньшомысь жӧ вӧчӧм кӧрзинаясӧ.
Рытнас карса шӧр площадь вылын сьылісны Натали да Андрей Державин, йӧктіс «United Bit» котыр. Унджык сьыланкывйыс важӧн нин мусмылӧма ухтасалы, да найӧ артистъясысь эз кольччыны, чайтсис, быттьӧ став карыс сьылӧ. Ӧткымынлы и сцена вылӧ кайлыны удайтчис.
Ухтаса администрацияӧн веськӧдлысь Магомед Османов аттьӧаліс сьылысьясӧс да козьналіс карлӧн серпасъяса тасьтіяс. И тӧдчӧдіс на, торйӧн пӧ любӧ вӧлі, мый праздник вылӧ воис землякным – Андрей Державин.
Ухтасалы козинӧн лоис и «Хор Турецкого» котырлӧн сьылӧмыс. Концерт заводитчытӧдз ухтасаӧс чолӧмаліс республикаса юралысь Сергей Гапликов:
–Бӧръя воясӧ карын унатор вежсьӧ. Гашкӧ, оз на сэтшӧм ӧдйӧ, кыдзи ми кӧсъям. Но ме кӧсъя эскӧдны тіянӧс, мый ми и водзӧ мӧдам вӧчны ставсӧ, мед эз сӧмын Ухта, но и ставнас Коми Республика лоис мичаджыкӧн.
«Хор Турецкого» котырлысь «Праздник песни» шоусӧ шулӧны народнӧй караокеӧн, ӧд артистъяскӧд сьылӧны тшӧтш и йӧзыс. 2015 восянь мир пасьтала шоуас пырӧдчӧма вит миллион морт.
Аскиа луныс – миян сайын
Ухтаын юбилей кежлӧ восьтісны образование юкӧнлы сиӧм музей. Ми пӧ пыдди пуктам велӧдан традицияяс, найӧ пӧ вайӧдісны миянӧс ӧнія вермӧмъясӧдз.
Юбилей кежлӧ жӧ пелькӧдісны и Газӧвикъяслӧн набережнӧйлысь юкӧн. Сергей Гапликовлӧн кывъяс серти, ухтасаяс пӧ важӧн нин виччысисны тайӧс, и налӧн кӧсйӧмыс ӧні збыльмӧ.
–Нимкодясям выль набережнӧйнас. Тӧдам, мый ухтаса радпырысь кутасны волывлыны татчӧ, – висьталісны карын олысьяс Екатерина Ядрышникова да Раиса Волошина.
Пелькӧдӧны и уличьяс да керка йӧръяс: вольсалӧны асфальт, сувтӧдалӧны лабичьяс.
Ухталӧн тшупӧда паслы сиӧм чукӧртчылӧм дырйи Магомед Османов пасйис, юбилейыс пӧ нӧшта ӧтчыд тшӧктӧ казьтыштны кольӧм кадсӧ.
–Ӧкмысдас воыд – абу ичӧт кадколаст, – шуис сійӧ. – Но миянкӧд орччӧн олӧны на тшӧтш и найӧ, кодъяслӧн арлыдыс та мында жӧ. Найӧ пуктісны ассьыныс пай Ухта быдмӧм-паськалӧмӧ. И налы таысь ми улӧдз копыртчылам. Аскиа лунным – миян сайын. Вайӧ и водзӧ кутам зільны, медым карным водзӧ сӧвмис-мичаммис.
Ухтаса юралысь Григорий Конёнков тшӧтш чолӧмаліс карын олысьясӧс:
–Ми гӧрдитчам асланым карӧн, и миян медыджыд озырлуныс – тані олысь войтыр. Ми вылӧ донъялам уджсӧ налысь, кодъяс заводитлісны кыпӧдны карнымӧс, и налысь, кодъяс ӧні вӧчӧны Ухтанымӧс мичаджыкӧн, сӧстӧмджыкӧн, югыдджыкӧн.
Та бӧрын чукӧртчӧмаяс водзын петкӧдчисны «Асъя кыа», «Встреча», «Ёлочка», «Инфинити», «Метаморфозы», «Фейерверк Проджект» сьылан-йӧктан котыръяс.