Зонкалы – кыйсьыны, нывкалы – печкыны…

Ухта карса историко-краеведческӧй музейын кыпыд чукӧртчылӧм дырйи восьтісны «Ремесло – не коромысло» интерактивнӧй выставка.

Тайӧ уджтассӧ лои збыльмӧдӧма «ЛУКОЙЛ» компаниялӧн социальнӧй да культурнӧй проектъяслӧн быдвося конкурслӧн грант весьтӧ.

Выставкасӧ дасьтысьяс босьтчӧмаӧсь тайӧ уджтасас медвойдӧр сы могысь, медым бурджыка тӧдмӧдны челядьӧс да том йӧзӧс коми войтырлӧн традицияясӧн, важся бур оласногӧн. Экспозицияын – гортын вӧдитчан дозмук да уна сикас мукӧд эмбур. Содтӧд шуӧма нуӧдны выставка вылӧ волысьяслы и мастер-классъяс.

–Талунъя томуловӧс колӧ тӧдмӧдны, кыдзи овлісны налӧн тшӧтшъяясыс сё во сайын, – висьталіс уджтассӧ дасьтысь, музейысь этнография юкӧнӧн веськӧдлысь Татьяна Пащак. – Зонкаяс вермасны тӧдмасьны тані кыйсьысь-вӧралысьлӧн угоддьӧясӧн, велӧдчыны туявны звер-пӧткаӧс, а нывкаяс – вӧдитчыны печканӧн да чӧрсӧн, а сідзжӧ кысьыны.

А.Я.Кремслӧн музей-кабинета историко-краеведческӧй музейса директор Оксана Гриценколӧн эскӧдӧм серти, талун гранта отсӧгыс сетӧ налы позянлун водзмӧстчыны да збыльмӧдны унатор, мый йӧзыслы колана да тӧдчана.

–Мусир перйысьяслӧн гранттӧг ӧдвакӧ эськӧ вермим дасьтыны тайӧ интерактивнӧй выставкасӧ, – висьталіс сійӧ. – И водзӧ вылӧ миян зэв на уна быдсикас дум-кӧсйӧмыс.

Интерактивнӧй выставкасӧ котыртӧм могысь музейын ӧти зал ставнас выльмӧдӧмаӧсь. Стенъяссӧ серпасалӧмаӧсь-вӧчӧмаӧсь вужвойтырлӧн важся пу керкаын моз, и аслыспӧлӧс экспонатъяснас тӧдмасигӧн син водзӧ ясыда сувтӧ ылӧ бӧрӧ кольӧм кадыс.

Выставкасӧ восьтан лунӧ Ухтаын олысьяс локтісны музейӧ дзонь семьяясӧн.
Томуловлы торйӧн нин воисны сьӧлӧм вылас мастер-классъяс.

–Ёртъяскӧд бара на вола татчӧ, – кӧсйысис витӧд классын велӧдчысь Ксения Азиз. – Меным ёна кажитчис серпасавны дӧра вылын важся сер-орнамент.

Снимокъясыс «ЛУКОЙЛ-Коми» ООО-са пресс-службалӧн.

Зонкалы – кыйсьыны, нывкалы – печкыны…

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх